ថ្លែងក្នុងកិច្ចប្រជុំផ្សព្វផ្សាយសេចក្តីណែនាំលេខ០១៩សណន របស់ក្រសួងមហាផ្ទៃ ស្ដីពីការគ្រប់គ្រងប្រើប្រាស់ក្របខ័ណ្ឌមន្ត្រីនគរបាលជាតិ ការគ្រប់គ្រងប្រើប្រាស់អាវុធជាតិផ្ទុះ និងមធ្យោបាយ នារសៀល ថ្ងៃទី១៥ ខែកក្តដា ឆ្នាំ២០១៩ម្សិលមិញនេះ លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប បានដាក់បទបញ្ជាដល់កម្លាំងនគរបាលទាំងអស់ មិនត្រូវយករថយន្តស្លាកនគរបាលទៅប្រើប្រាស់ក្នុងវិស័យឯកជន ឬឲ្យជនបរទេសប្រើប្រាស់រថយន្តស្លាកលេខរដ្ឋជាដាច់ខាត ជាពិសេស កងកម្លាំងនគរបាលនិងអាវុធ មិនត្រូវឲ្យមានការចេញ ទៅការពារ តាមក្លឹបកម្សាន្ត ខារ៉ាអូខេ ឬ ការពារវិស័យឯកជន ដែលផ្ទុយពីសេចក្តីណែនាំជាដាច់ខាត ។
ក្នុងឱកាសនោះដែរ លោកស្នងការនគរបាលខេត្ត បានក្រើនរំលឹកដល់ថ្នាក់ដឹកនាំទាំងអស់ ត្រូវបង្កើនការគ្រប់គ្រង ការដឹកនាំ និង ការចាត់ចែងកងកម្លាំងក្រោមឱវាទឲ្យបានល្អ ក្នុងការបំពេញភារកិច្ចស្នូលរបស់ខ្លួន ដោយអនុវត្តន៍តាមអនុសាសន៍អភិក្រមទាំង៥ចំណុចរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺ១- ឆ្លុះកញ្ចក់ , ២- ងូតទឹក , ៣- ដុសក្អែល , ៤- ព្យាបាល និង ទី -៥ វះកាត់ ជាពិសេសកម្លាំងនគរបាលទាំងអស់ ត្រូវបង្កើនការយកចិត្តទុកដាក់បន្ថែមទៀត ក្នុងការបង្ការទប់ស្កាត់ និងបង្ក្រាបបទល្មើសគ្រប់ប្រភេទ សំដៅរក្សាការពារធានាសន្តិសុខ សុវត្ថិភាព និងសណ្តាប់ធ្នាប់សង្គម ជូនប្រជាពលរដ្ឋឲ្យកាន់តែប្រសើរឡើងថែមទៀត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
