នៅថ្ងៃទី១៦ ខែកក្កដា ឆ្នាំ២០១៩នេះ ក្រសួងទេសចរណ៍ បានប្រកាសឱ្យប្រើប្រាស់ជាផ្លូវការ នូវកម្មវិធីទូរស័ព្ទឆ្លាតវៃ Mobile Application “ Kingdom of Wonder ” នៅក្នុងសិក្ខាសាលាមួយ ស្តីពីការផ្សព្វផ្សាយគោលដៅទេសចរណ៍កម្ពុជា តាមប្រព័ន្ធឌីជីថល (Digital System) នៅសណ្ឋាគារសុខា រីសត និងសាលសន្និសីទ ក្នុងក្រុងសៀមរាប ដើម្បីបង្កើនការយល់ដឹង និងចែករំលែកបទពិសោធន៍ដល់ភាគីពាក់ព័ន្ធក្នុងវិស័យទេសចរណ៍ ស្តីពីការប្រើប្រាស់ប្រព័ន្ធឌីជីថល ក្នុងការផ្សព្វផ្សាយគោលដៅទេសចរណ៍ ក៏ដូចជាការប្រែក្លាយសេវាកម្មនានាក្នុងវិស័យទេសចរណ៍ឱ្យកាន់តែមានភាពទាក់ទាញ និងមានប្រសិទ្ធភាពខ្ពស់ស្របតាមនិន្នាការថ្មីនៃសកលលោកនាយុគសម័យឧស្សាហកម្ម ៤.០។
សិក្ខាសាលានេះ បានប្រព្រឹត្តទៅក្រោមអធិបតីភាពឯកឧត្តម គុជ បញ្ញាសា អនុរដ្ឋលេខាធិការ និងតំណាងដ៏ខ្ពង់ខ្ពស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និង លោក នាក់ ណេរ៉ុន អភិបាលរងខេត្ត និងតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ដោយមានការចូលរួមពីវាគ្មិនល្បីៗ និងមានបទពិសោធន៍ច្បាស់លាស់មកពីបណ្តាប្រទេសនានាជុំវិញពិភពលោក រួមមាន កម្ពុជា សហរដ្ឋអាមេរិក សឹង្ហបុរី ឥណ្ឌា ចិន និងថៃ ព្រមទាំងមាន តំណាងស្ថាប័នពាក់ព័ន្ធមកពីផ្នែករដ្ឋ សាលាខេត្តសៀមរាប អាជ្ញាធរជាតិអប្សរា អាជ្ញាធរជាតិព្រះវិហារ គ្រឹះស្ថានអង្គរ សារមន្ទីរជាតិអង្គរ មន្ទីរទេសចរណ៍រាជធានី – ខេត្ត និងផ្នែកឯកជននានា រួមមានសមាគមទីភ្នាក់ងារទេសចរណ៍ CATA, PATACC, សហព័ន្ធទេសចរណ៍កម្ពុជា (CTF) ប្រតិបត្តិករទេសចរណ៍ (Travel Agent) សមាគមមគ្គុទ្ទេសក៍ទេសចរណ៍ បណ្តាញសារព័ត៌មាន និស្សិតដែលកំពុងសិក្សាជំនាញទេសចរណ៍ ព្រមទាំងភ្ញៀវជាតិ-អន្តរជាតិប្រមាណជាង៥០០នាក់ ។
ឯកឧត្តម គុជ បញ្ញាសា បានមានប្រសាសន៍ថា និន្នាការនៃការប្រើប្រាស់ប្រព័ន្ធឌីជីថល (Digital) ទទួលបានការពេញនិយមកាន់តែច្រើនពីសំណាក់ប្រជាជនក៏ដូចជាទេសចរជុំវិញពិភពលោក ដោយគិតត្រឹមឆ្នាំ២០១៨ មានអ្នកប្រើប្រាស់រហូតដល់៤,១ ពាន់លាននាក់ ក្នុងនោះ Facebook មានអ្នកប្រើប្រាស់ចំនួន២,៣២ ពាន់លាននាក់ និង YouTube មានអ្នកប្រើប្រាស់ចំនួន១,៨ ពាន់លាននាក់ ដូច្នេះដោយមើលឃើញពីសារៈសំខាន់នេះហើយ ទើបក្រសួងទេសចរណ៍រៀបចំ Mobile Application “Kingdom of Wonder” នេះឡើង និងស្នើភាគីពាក់ព័ន្ធ ក៏ដូចជាផ្នែកឯកជនក្នុងវិស័យទេសចរណ៍ ចូលរួមផ្សព្វផ្សាយដល់បណ្តាញ និងអតិថិជនរបស់ខ្លួនឱ្យបានកាន់តែទូលំទូលាយ និងត្រៀមខ្លួនឆក់យកឱកាស ទាញយកប្រយោជន៍ពីប្រព័ន្ធឌីជីថលឱ្យបានច្រើនតាមដែលអាចធ្វើបាន ជាពិសេស ប្រែក្លាយសេវាកម្មនៃអាជីវកម្មរបស់ខ្លួនឱ្យស្របតាមនិន្នាការថ្មីនៃសកលលោក។
ព័ត៌មានជាតិ ថ្មីៗ
ឯកឧត្តម គុជ បញ្ញាសា មានប្រសាសន៍ទៀតថា ជាមួយគ្នានេះដែរ ក្រសួងទេសចរណ៍ក៏បានយកចិត្តទុកដាក់ខ្ពស់ក្នុងការជំរុញការផ្សព្វផ្សាយគោលដៅទេសចរណ៍កម្ពុជា តាមរយៈប្រព័ន្ធឌីជីថលទៅកាន់ទីផ្សារអាទិភាពមួយចំនួនដូចជា ចិន ជប៉ុន កូរ៉េ រុស្ស៊ី និងអាស៊ាន ដោយបានផលិតកម្មវិធីទូរស័ព្ទឆ្លាតវៃមួយ ដែលមានឈ្មោះថា Kingdom of Wonder ដែលដាក់ឱ្យទេសចរជាតិ-អន្តរជាតិ ទាញយក (Download) ក្នុងប្រព័ន្ធប្រតិបត្តិការ IOS (App Store) និង ក្នុងប្រព័ន្ធប្រតិបត្តិការ Android (Play Store) ដោយឥតគិតថ្លៃ ហើយកម្មវិធីទូរស័ព្ទឆ្លាតវ័យ Kingdom of Wonder នោះ គឺជាបណ្តុំព័ត៌មានទេសចរណ៍សំខាន់ៗរបស់កម្ពុជា ដែលរួមមានគោលដៅទេសចរណ៍ ព្រឹត្តិការណ៍ទេសចរណ៍ ផែនទីទេសចរណ៍ ជើងហោះហើរ អាកាសធាតុ ភោជនីយដ្ឋាន កន្លែងស្នាក់នៅ មធ្យោបាយធ្វើដំណើរក្នុងស្រុក និងព័ត៌មានសំខាន់ៗដទៃទៀតដែលផ្តល់ភាពងាយស្រួល ព័ត៌មានកាន់តែសម្បូរបែប និងគ្រប់ជ្រុងជ្រោយថែមទៀតដល់អ្នកទេសចរដែលមានបំណងទស្សនាកម្ពុជាទាំងបច្ចុប្បន្ន និងទៅអនាគត ។
ឯកឧត្តមអនុរដ្ឋលេខាធិការក្រសួងទេសចរណ៍ មានប្រសាសន៍បន្ថែមទៀតថា ក្នុងឆ្នាំ២០១៨ កម្ពុជាទទួលបានទេសចរអន្តរជាតិ ៦,២លាននាក់ ក្នុងកំណើន ១០,៧ភាគរយ និង នៅក្នុងត្រីមាសទី១ ដើមឆ្នាំ២០១៩ កម្ពុជាទទួលបានទេសចរអន្តរជាតិ ១លាន ៨៧ម៉ឺននាក់ កើនឡើង ៩,៧ភាគរយ ហើយតាមរយៈកម្មវិធីទូរស័ព្ទឆ្លាតវៃនេះ ក្រសួងទេសចរណ៍សង្ឃឹមថា អ្នកទេសចរជាតិ-អន្តរជាតិ និងក្រុមហ៊ុនទេសចរណ៍ទាំងអស់ មានភាពងាយស្រួលក្នុ្ងងការស្វែងរកព័ត៌មានទេសចរណ៍ តាមរយៈAppខាងលើ ដើម្បីសម្រេចនូវកំណើនទេសចរ ៦.៦លាននាក់ ក្នុងឆ្នាំ២០១៩ និង ជាង៧លាននាក់ នៅឆ្នាំ២០២០ ។
លោកនាក់ ណេរ៉ុន អភិបាលរងខេត្តសៀមរាប មានប្រសាសន៍ថា នៅក្នុងពេលដែលពិភពលោកកំពុងរីកចម្រើនលើប្រព័ន្ធបច្ចេកវិជ្ជា ប្រទេសនៅក្នុងតំបន់អាស៊ាន រួមទាំងកម្ពុជាផង ហាក់បីដូចជាបោះជំហានយឺត ប៉ុន្តែយ៉ាងនេះសង្ឃឹមថា វាជាការចាប់ផ្តើមដ៏ល្អមួយសម្រាប់វិស័យទេសចរណ៍របស់ប្រទេសកម្ពុជា ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
