លោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំ បានឲ្យដឹងថា កាលពីវេលាម៉ោង២០និង៤០នាទី នាថ្ងៃទី១៥ ខែកក្កដា ឆ្នាំ២០១៩នេះ មានអគ្គិភ័យមួយបានកើតឡើង នៅវត្តវេឡុវ័ន ដោកពោយគោកក្រោល ស្ថិតក្នុងឃុំជ្រោយនាងងួន ស្រុកស្រីស្នំ ខេត្តសៀមរាប ដោយឆេះកុដិ០១ខ្នងអស់ទាំងស្រុង មានទំហំ១២ម៉ែត្រគុណនឹង៩ម៉ែត្រ ធ្វើអំពីឈើ ប្រក់ក្បឿង ជញ្ជាំងក្ដារ បណ្ដាលឲ្យ ខូច ខាតរថយន្ត០១គ្រឿង , រទេះគោសម្រាប់ទុកតាំងលម្អ ១០គ្រឿង , ងាប់កូនឆ្កែចំនួន០៦ក្បាល , ឆេះគម្ពីរព្រះត្រ័យបិដក១០០ក្បាល (1995) , អដ្ខកថា មួយចប់ , គម្ពីរស្លឹរឹត , ស្បង់ចីពរ ព្រមទាំងសម្ភារមួយចំនួនទៀត ហើយបានរលត់ទៅវិញម៉ោង២២:០០នាទី ។
លោកវរសេនីយ៍ឯក អ៊ុន ស្រស់ បានឲ្យដឹងទៀតថា ទោះបីជាបានចេញរថយន្តពន្លត់អគ្គីភ័យរបស់អធិការស្រុកចំនួន០១គ្រឿងចេញអន្តរាគមន៍ ប្រើទឹកអស់២ឡានក៏ដោយ ក៏មិនអាចសង្គ្រោះបានដែរ ហើយមូលហេតុនៃអគ្គិភ័យនេះ គឺបណ្ដាលមកពីភ្លើងទៀនដែលព្រះសង្ឃអុជថ្វាយបង្គំព្រះជាប្រចាំ ប៉ុន្តែពុំបណ្តាលឲ្យរងគ្រោះថ្នាក់ដល់មនុស្សឡើយ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
