សហគមន៍អ្នកផលិតបន្លែសុវត្ថិភាពនៅស្រុកបន្ទាយស្រី បានបង្កើតក្រុមកសិករផលិតប្រេងស្លឹកគ្រៃ ដើម្បីទាញចំណូលបន្ថែម ខណៈស្លឹកគ្រៃរបស់កសិករ កំពុងជួបបញ្ហាធ្លាក់ថ្លៃ លើទីផ្សារក្នុងស្រុក។
គម្រោងផលិតប្រេងស្លឹកគ្រៃនេះ គឺជាគំនិតផ្ដួតផ្តើមរបស់អង្គការអាគ្រីស៊ូត ដែលជាអង្គការអន្ដរជាតិផ្នែកកសិកម្ម និងជាអ្នកចងក្រងបង្កើតសហគមន៍អ្នកផលិតបន្លែសុវត្ថិភាពផងដែរ។ ហេតុផលចំបងដែលអង្គការនេះចងក្រងកសិករ ឲ្យផលិតប្រេងស្លឹកគ្រៃ ទី១ ដោយសារមើលឃើញពីតម្រូវការនៅតាមសណ្ឋាគារ ហាងម៉ាស្សាជាដើម កំពុងមានតម្រូវការខ្ពស់ និងទី២ ចង់រកទីផ្សារបន្ថែមដល់ក្រុមកសិករក្នុងមូលដ្ឋាននេះផ្ទាល់។
កញ្ញា គង់ រដ្ឋា បុគ្គលិកទទួលបន្ទុកផ្នែកទីផ្សារនៃអង្គការ អាគ្រីស៊ូត រៀបរាប់ថា គម្រោងចម្រាញ់ប្រេងស្លឹកគ្រៃ របស់អង្គការកញ្ញានេះ ដោយសារថា អង្គការសង្កេតឃើញថា បន្ទាប់ពីការដាំដុះ ផលដំណាំរបស់កសិករ ចំណាយថវិកាច្រើន ក្នុងការដឹកជញ្ជូនយកផលដំណាំផ្សេងៗ យកទៅលក់នៅក្រុងសៀមរាប មួយវិញទៀតផលដំណាំមិនសូវមានទីផ្សារ ជាហេតុនាំឲ្យឈ្មួញធ្វើការទំលាក់តម្លៃផលដំណាំរបស់កសិករ។
គម្រោងចម្រាញ់ប្រេងស្លឹកគ្រៃនេះ បានចាប់ផ្តើមដំណើរការនៅដើមឆ្នាំ២០១៨ ជាមួយនឹងក្រុមកសិករចំនួន ២០គ្រួសារ។ បច្ចុប្បន្នដើមទុនក្នុងគម្រោងនេះ មានចំនួន១លានរៀល ក្នុងនោះមិនរាប់បញ្ចូលថវិកាពីអង្គការ ដែលរៀបចំតម្លើងរោង និងឆ្នាំងចម្រាញ់នៅឡើយទេ។ សម្រាប់តម្លៃវិញ ក៏មិនទាន់បានបញ្ជាក់ដែរ ដោយបច្ចុប្បន្នសហគមន៍កំពុងស្វែងរកទីផ្សារ និងចង់បានតម្លៃខ្ពស់ជាងទីផ្សារប្រេងស្លឹកគ្រៃ ដែលនាំចូលពីបរទេស។
((((សំឡេង៣))))(មាននៅក្នុងវីដេអូខាងលើ)
ប្រធានក្រុមកសិករផលិតប្រេងស្លឹកគ្រៃ លោក ខឹម សម្រេច បានឱ្យដឹងថា ជាជំហានដំបូងលោក បានធ្វើការចងក្រងក្រុមកសិករតែ ២០គ្រួសារប៉ុណ្ណោះ ដែលពួកគាត់ទាំងនោះស្ថិតក្នុងឃុំឃុនរាម ស្រុកបន្ទាយស្រី ខេត្តសៀមរាប។ លោកបញ្ជាក់ថា ប្រសិនបើទីផ្សារមានតម្រូវការខ្ពស់ នោះលោកនឹងបង្កើនចំនួនសមាជិកក្រុម ដើម្បីបង្កើនការផលិតនៅក្នុងសហគមន៍៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្ល
