ថ្ងៃទី១៦ កក្កដា ឆ្នាំ២០១៩នេះ ក្រោមកិច្ចសហការរវាងអគ្គនាយកដ្ឋានទូរទស្សន៍ជាតិកម្ពុជា និងស្ថានីយវិទ្យុនិងទូរទស្សន៍ក្វាងស៊ីនៃប្រទេសចិន មានរៀបចំសិក្ខាសាលាមួយ ស្តីពីការបកប្រែ និងផលិតរឿងភាគទូរទស្សន៍ សុបិន្តសំណាក់ក្រហម នៅសណ្ឋាគារ Prince D’ Angkor Hotel ក្នុងក្រុងសៀមរាប ដែលភាគីកម្ពុជាដឹកនាំដោយលោក ជ័យ សោភា អគ្គនាយករងទូរទស្សន៍ជាតិកម្ពុជា និងមន្ត្រីជំនាញ រួមទាំងសាស្ត្រចារ្យផ្នែកអក្សរសាស្ត្រ មកពីសកលវិទ្យាល័យភ្នំពេញ និងភាគីចិនដឹកនាំដោយ លោកស្រី Huang Zeyi តំណាងស្ថានីយវិទ្យុនិងទូរទស្សន៍ក្វាងស៊ី រួមជាមួយសាស្ត្រចារ្យ និងតួសម្តែងល្បីៗមួយចំនួននៅក្នុងរឿងភាគទូរទស្សន៍ សុបិន្តសំណាក់ក្រហម ។
គោលបំណងនៃសិក្ខាសាលានេះ គឺភាគីទាំងពីរ នឹងជជែកពិភាក្សាគ្នា អំពីការបកប្រែរឿងភាគទូរទស្សន៍ សុបិន្តក្រហមសំណាក់ក្រហម ដែលជាប្រលោមលោកដ៏ល្បីល្បាញរបស់ប្រទេសចិន ជាភាសាខ្មែរ ដើម្បីចាក់ផ្សាយនៅលើកញ្ចក់ទូរទស្សន៍ជាតិកម្ពុជានៅពេលខាងមុខ។
មានប្រសាសន៍ក្នុងឱកាសនោះ លោក ជ័យ សោភា បានសម្ដែងនូវកោតសរសើរ និងថ្លែងអំណរគុណដល់រដ្ឋាភិបាលនៃសាធារណរដ្ឋប្រជាមានិតចិន ដែលតែងតែជួយគាំទ្រដល់ការអភិវឌ្ឍនប្រទេសកម្ពុជាលើគ្រប់វិស័យ ជាពិសេសកិច្ចសហការដ៏ល្អរវាងអគ្គនាយកដ្ឋានទូរទស្សន៍ជាតិកម្ពុជា និងស្ថានីយវិទ្យុនិងទូរទស្សន៍ក្វាងស៊ី ដែលមានតាំងពីឆ្នាំ២០១៤មក ។
លោក ជ័យ សោភា មានប្រសាសន៍ទៀតថា តាមរយៈកិច្ចសហការនេះ ធ្វើឲ្យវិស័យផលិត និងផ្សព្វផ្សាយ អំពីវិស័យ វប្បធម៌ ប្រពៃណី ទំនៀមទំលាប់ការរស់នៅការរីកចម្រើននៃប្រទេសយើងទាំងពីរ និងជាពិសេសលើវិស័យភាពយន្តនៃប្រទេសទាំងពីរ ឲ្យកាន់តែទំនើប និងសម្បូរបែប ស្របតាមនិន្នាការនៃការរីកចម្រើនលើវិស័យនេះ និងតាមរយៈការផ្លាស់ប្តូរទស្សនៈ និងបទពិសោធន៍ល្អៗ ពីគ្នាទៅវិញទៅមក។
លោក Zhang Quingshan ប្រធានអ្នកស្រាវជ្រាវរឿងសុបិន្តសំណាក់ក្រហម បានឲ្យដឹងថា រឿងសុបិន្តសំណាក់ក្រហម គឺប្រលោមលោកកំពូលរបស់ប្រទេសចិន ដែលបានផលិត និងចាក់ផ្សាយនៅឆ្នាំ១៩៨៧ ហើយប្រលោមលោកនេះ ទទួលបានការកោតសរសើរយ៉ាងខ្លាំងពីលោកប្រធានម៉ៅ ពីអ្នកអក្សរសាស្ត្រល្បីល្បាញរបស់ចិន និងប្រជាជនចិនទូទាំងប្រទេស និងបន្តល្បីសុះសាយនៅលើពិភពលោក ហើយនៅពេលប្រលោមលោកនេះ ត្រូវបានបកប្រែជាភាសាខ្មែរ និងធ្វើការចាក់ផ្សាយតាមកញ្ចក់ទូរទស្សន៍ជាតិកម្ពុជា វានឹងផ្តល់អត្ថប្រយោជន៍ដ៏ធំធេង ក្នុងចែករំលែកនិងផ្លាស់ប្តូរ វិស័យវប្បធម៌រវាងប្រទេសទាំងពីរ។
គួរបញ្ជាក់ថា ចាប់តាំងពីមានកិច្ចសហការរវាងអគ្គនាយកដ្ឋានទូរទស្សន៍ជាតិកម្ពុជា និងស្ថានីយវិទ្យុនិងទូរទស្សន៍ក្វាងស៊ីមក ទូរទស្សន៍ជាតិកម្ពុជា បានទទួលរឿងភាគទូរទស្សន៍ល្បីៗចំនួន ១១រឿង ស្មើនឹង៤៤០ភាគ និងរឿងភាគទូរទស្សន៍សម្រាប់កុមារ ចំនួន៨រឿង ស្មើនឹង៥៥៦ភាគ ពីស្ថានីយវិទ្យុនិងទូរទស្សន៍ក្វាងស៊ី ហើយដោយឡែក ចំពោះរឿងភាគទូរទស្សន៍ សុបិន្តសំណាក់ក្រហម សរុបទាំងអស់មានចំនួន៣៦ភាគ ដែលរឿងភាគនេះ បាននឹងកំពុងរៀបចំបកប្រែជាភាសាខ្មែរ ហើយនឹងត្រូវចាក់ផ្សាយនៅតាមកញ្ចក់ទូរទស្សន៍ជាតិកម្ពុជា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
