ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល មានប្រសាសន៍ថា រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA កំពុងសិក្សាគម្រោងផ្តល់ជំនួយលើការសាងសង់អគារថ្មីធំមួយ មានកម្ពស់៤ជាន់ ស្មើនឹង ៥០០គ្រែ ដោយផ្តោតជាសំខាន់ទៅលើការផ្តល់សេវាសង្គ្រោះបន្ទាន់និងវះកាត់ នៅមន្ទីរពេទ្យបង្អែកខេត្តសៀមរាប សម្រាប់បំពេញតម្រូវការក្នុងការផ្តល់សេវាទទួលអ្នកជំងឺឲ្យសម្រាលព្យាបាល ខណៈពេលដែលបច្ចុប្បន្ននេះ មន្ទីរពេទ្យបង្អែកខេត្តសៀមរាប កំពុងប្រឈមនឹងចំនួនដ៏ច្រើននៃអ្នកជំងឺ ដែលមិនត្រឹមតែមកពីបណ្តាមូលដ្ឋានក្នុងខេត្តសៀមរាបប៉ុណ្ណោះទេ គឺមានខេត្តផ្សេងៗនៅជុំវិញខេត្តសៀមរាប ក៏ត្រូវបានបញ្ជូនមកទទួលសេវាព្យាបាលនៅក្នុងមន្ទីរពេទ្យបង្អែកមួយនេះដែរ ។
ឯកឧត្តមវេជ្ជបណ្ឌិត ម៉ម ប៊ុនហេង មានប្រសាសន៍ទៀតថា គម្រោងជំនួយរបស់ JICA នេះ នឹងធ្វើឲ្យអនាគតនៃមន្ទីរពេទ្យបង្អែកខេត្តសៀមរាប ក្លាយជាមន្ទីរពេទ្យបង្អែកស្តង់ដារមួយ ផ្តល់សេវាចម្រុះច្រើនយ៉ាង មានឯកទេសខ្ពស់ ក្នុងតំបន់នៃប្រទេស កម្ពុជា ហើយមិនត្រឹមតែជាការសាងសង់អគារទទួលអ្នកជំងឺឲ្យសម្រាកព្យាបាលប៉ុណ្ណោះទេ តែត្រូវបានបំពាក់ឧបករណ៍ សម្ភារ បរិក្ខាបច្ចេកទេស និងបណ្តុះបណ្តាលជំនាញផងដែរ ប៉ុន្តែសម្រាប់ការរង់ចាំនៅពេលដែលគម្រោងរបស់ JICA ត្រូវបានសម្រេចប្រហែលក្នុងឆ្នាំ២០២៣នោះ អគារចាស់ៗចំនួន២ខ្នង ត្រូវបានជួសជួល កែលម្អឡើងវិញ ដើម្បីបានប្រើប្រាស់ឆ្លងកាត់អន្តរកាលនោះ ។
ឯកឧត្តម ម៉ម ប៊ុនហេង មានប្រសាសន៍យ៉ាងនេះ ក្នុងឱកាសចុះទស្សនកិច្ចសិក្សា តាមដានការជួសជួល កែលម្អអគារពេទ្យ និង សួរសុខទុក្ខអ្នកជំងឺកំពុងសម្រាកព្យាបាលជំងឺ នៅមន្ទីរពេទ្យបង្អែកខេត្តសៀមរាប កាលពីព្រឹកថ្ងៃទី១៦ ខែកក្កដា ឆ្នាំ២០១៩ ម្សិលមិញនេះ ។
លោក ប៉ែន ផល្គុន ប្រធានមន្ទីរពេទ្យបង្អែកខេត្តសៀមរាប មានប្រសាសន៍ថា អគារចាស់ៗចំនួន២ខ្នង ដែលកំពុងដំណើរការជួសជុល និងអគារ១ខ្នងផ្សេងទៀត ដែលត្រូវបានជួសជុលរួចហើយនោះ គឺស្ថិតក្រោមការជួយឧបត្ថម្ភគាំទ្រយ៉ាងពេញទំហឹងរបស់លោកជំទាវឧបាសិកា សៀង ច័ន្ទហេង នាយិកាក្រុមហ៊ុន ហេងអភិវឌ្ឍ ហើយលោកសង្ឃឹមថា ក្រោយពីការជួសជុលរួច មន្ទីរពេទ្យនឹងអាចដោះស្រាយបញ្ហាប្រឈមនៃការខ្វះខាតគ្រែអ្នកជម្ងឺ យ៉ាងហោចណាស់ បានប្រហែលជា ៧០ភាគរយដែរ ខណៈបច្ចុប្បន្ននេះ មន្ទីរពេទ្យបង្អែកខេត្តសៀមរាប មានគ្រែអ្នកជំងឺចំនួន ៣០០គ្រែ ជាមួយនឹងការទទួលអ្នកជម្ងឺឲ្យសម្រាកព្យាបាលរហូតដល់ជិត៤០០នាក់ ។
លោក ប៉ែន ផល្គុន បញ្ជាក់បន្ថែមថា នៅពេលដែលគម្រោង JICA សម្រេចលើការសាងសង់អគារថ្មីប្រហែលនៅក្នុងឆ្នាំ២០២៣ខាងមុខនោះ មន្ទីរពេទ្យបង្អែកខេត្តសៀមរាប មានគម្រោងពង្រីកសេវាវះកាត់ផ្សេងៗទៀត ដូចជាសេវាវះកាត់ប្រព័ន្ធសសៃប្រសាទ ឆ្អឹងខ្នង និង ឆ្អឹងធ្គាមជាដើម ដែលនោះគឺជាការឈានទៅរកការផ្តល់សេវាវះកាត់កម្រឹតខ្ពស់ មានប្រសិទ្ធភាព រួមជាមួយការអភិវឌ្ឍឧបករណ៍ បរិក្ខា បច្ចេកវិទ្យា របស់JICA ហើយអនាគត មន្ទីរពេទ្យបង្អែកខេត្តសៀមរាប នឹងក្លាយជាមន្ទីរពេទ្យបង្អែកស្តង់ដារមួយថ្នាក់តំបន់ ផ្តល់សេវាចម្រុះច្រើនយ៉ាង ឯកទេសខ្ពស់ ជួយកាត់បន្ថយអត្រាស្លាប់ និងពិការភាពនៃអ្នកជំងឺ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
