លោក ស៊ឹម ធរដ្ឋ អនុប្រធានការិយាល័យផលិតកម្ម និងបសុព្យា បាល នៃមន្ទីរកសិកម្មរុក្ខាប្រមាញ់និងនសាទខេត្តសៀមរាប អះអាង ថា តាមឯកសារជាច្រើនបញ្ជាក់ថា ចំពោះវីរុសដែលបង្កជំងឺប៉េស្ដជ្រូកអាហ្វ្រិកនេះ មិនអាចឆ្លងពីសត្វទៅមនុស្ស ឬ ឆ្លងពីមនុស្សទៅសត្វឡើយ ដូច្នេះសូមបងប្រជាពលរដ្ឋ គួរតែបរិភោគសាច់ជ្រូកឡើងវិញ ចំពោះសាច់ជ្រូកដែលមានបោះត្រាសម្គាល់ថាសាច់សត្វមានសុវត្ថិភាព ពីមន្ត្រីជំនាញពេទ្យសត្វ ព្រោះថា ប្រសិនបើសាច់សត្វមិនមានបោះត្រាសម្គាល់ ឬសាច់សត្វគ្មានប្រភពច្បាស់ទេនោះ អាចមានជំងឺផ្សេងទៀត ដែលអាចឆ្លងដល់មនុស្ស ។
លោក ស៊ឹម ធរដ្ឋ មានប្រសាសន៍ទៀតថា ថ្វីត្បិតតែនៅក្នុងខេត្តសៀមរាម មិនទាន់កើតមានជំងឺប៉េស្តជ្រូកអាហ្វ្រិកក៏ពិតមែន ក៏ខាងលោកតែងតែចាត់មន្ត្រីជំនាញ ចុះធ្វើការពិនិត្យតាមដានលើស្ថានភាពជំងឺនេះជាប្រចាំ និង ពង្រឹងការត្រួតពិនិត្យលើការនាំចូលសត្វជ្រូកតាមព្រំប្រទល់ខេត្តផ្សេងៗផងដែរ ។
លោក ស៊ឹម ធរដ្ឋ មានប្រសាសន៍យ៉ាងដូច្នេះ ក្នុងកម្មវិធីសន្ទាមតិ របស់វិទ្យុFMជាតិនគរភ្នំ103 MHz និង ទូរទស្សន៍ជាតិខេត្តសៀមរាប នៃមន្ទីរព័ត៌មានខេត្តសៀមរាប ដែលបានផ្សាយផ្ទាល់ កាលពីព្រឹកថ្ងៃទី១៧ ខែកក្កដា ឆ្នាំ២០១៩ ។
លោក ស៊ឹម ធរដ្ឋ បានបញ្ជាក់ទៀតថា រោគសញ្ញា នៃជំងឺប៉េស្តជ្រូកអាហ្វ្រិកគឺ ជ្រូកក្ដៅខ្លួនខ្លាំង ជ្រូកមិនស៊ីចំណី ទល់លាមក ល្ហិតល្ហៃ មានស្នាមអុជៗក្រហមលើស្បែក ជាដើម ហើយជំងឺនេះ មានការរីករាលដាលយ៉ាងឆាប់រហ័ស បើសិនជាមិនមានការតាមដានឲ្យបានជាប់លាប់ទេ វាអាចធ្វើឲ្យសត្វជ្រូកដែលមានជំងឺ ចម្លងទៅសត្វជ្រូកដទៃទៀត ដូច្នេះ ប្រសិនបើពិនិត្យឃើញអាការៈសត្វជ្រូកមិនស្រួល ឬមានភាពមិនប្រក្រតី ត្រូវប្រញាប់ផ្តល់ព័ត៌មានជាបន្ទាន់ ទៅពេទ្យសត្វភូមិ ឃុំ ឬ អគ្គនាយកដ្ឋានសុខភាពសត្វ និងផលិតកម្មសត្វឱ្យ មកជួយដោះស្រាយរឿងនេះ។
លោក ស៊ឹម ធរដ្ឋ បានបញ្ជាក់បន្ថែមទៀតថា ដើម្បីទប់ស្កាត់ និងបង្ការជំងឺប៉េស្តជ្រូកអាហ្វ្រិកនេះ ត្រូវបំបែកសត្វដែលសង្ស័យថាឈឺចេញឱ្យឆ្ងាយពីហ្វូងជ្រូកជាបន្ទាន់ ហើយកុំឱ្យជ្រូកស៊ីកាកសំណល់ផ្ទះបាយ និងដុតកម្ទេចសត្វដែលងាប់រួចជីកកប់ដីឱ្យជ្រៅដោយសុវត្ថិភាព ធ្វើអនាម័យទ្រុងជ្រូកឱ្យស្អាតជាប្រចាំ រំងាប់មេរោគដោយប្រើថ្នាំដែលណែនាំដោយអ្នកជំនាញខាងពេទ្យសត្វ បញ្ឈប់សកម្មភាពចល័តសត្វ និងសាច់សត្វ ពីកន្លែងមានផ្ទុះជំងឺ ទៅកន្លែងផ្សេងៗដែលកំពុងមានសុវត្ថិភាព និង នៅមានវិធីសាស្ត្របង្ការ និងទប់ស្កាត់ជាច្រើនផ្សេងទៀត ៕
អត្ថបទ និង រូបថត ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
