នេះបើតាមការលើកឡើងរបស់ ឯកឧត្តម ឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន ៣១៧ សៀមរាប ថ្លែងសំណេះសំណាលទៅកាន់ មន្ត្រីក្រោមឱវាទ ជា នាយករង នាយរងការិយាល័យ នាយនាយរងផ្នែក និងពលទាហ៊ាន យោធិនពិការ និងពលរដ្ឋ នាព្រឹកថ្ងៃទី ១៧ខែកក្កដាឆ្នាំ២០១៩ ក្នុងឱកាសដែលឯកឧត្តម និងសហការី នាំយកនូវទៀនចំណាំវស្សា និងទេយ្យវត្ថុទៅ ប្រគេនដល់ព្រះសង្ឃគង់នៅវត្តព្រះខ័នសែនជ័យ ស្ថិតនៅភូមិស្នារតេជោ ឃុំបាល្ល័ង ស្រុកប្រាសាទបាគង ខេត្តសៀមរាប។
ឯកឧត្តម ពៅ ស៊ា មានប្រសាសន៍ថា៖តាំងពីចាប់បង្កើតមជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន ៣១៧ សៀមរាប បងប្អូនយោធិនពិការដែលរស់នៅក្នុងមជ្ឈមណ្ឌលទាំងអស់ក្រៅពីការងារស្នូលនិងការងារបង្កបង្កើនផលចិញ្ចឹមសត្វសម្រាប់ជីវភាពគ្រួសារ បងប្អូនយើងនៅបានចូលរួមជាមួយការងារសង្គមជាច្រើន និងតែងតែចូលរួមធ្វើបុណ្យទាន គោរពនិងជឿទៅតាមលំអានព្រះពុទ្ឋសាសនាមិនដែលដាច់ តែប្លែកត្រង់ថាកន្លងមកយោធិនពិការនៅមជ្ឈមណ្ឌលនេះ មិនដែលបានគ្រោងឯកសណ្ឋានយោធាចូលរួមពិធីបុណ្យផ្សេងៗបានស្រុះគ្នាដូចពេលនេះឡើយ ពីមុនពួកគាត់ប្រើឯកសណ្ឋានស៊ីវិលចំរុះ។
ការស្លៀកពាក់ឯកសណ្ឋានយោធាចូលរួមក្នុងទីអារាមសាសនានាពេលនេះ ឯកឧត្តម ចង់បង្ហាញថា៖កាលអំឡុងស្រុកយើងមានសង្គ្រាម កងកម្លាំងប្រដាប់អាវុធគ្រប់ប្រភេទ ជាពិសេសយោធា មិនដែលមានឱកាសបានមកថ្វាយបង្គំនិងអង្គុយស្តាប់ព្រះសង្ឃទេសនាឬសូត្រធម៌ឡើយ កុំថាឡើយយោធា សូម្បីប្រជាពលរដ្ឋទូទៅ ម្នាក់ៗភ្នែកស្ទើរតែនៅកញ្ចឹងក ព្រោះថា យោធាក្តាប់អាវុធប្រយុទ្ឋជាប់ក្នុងសមរភូមិ ដើម្បីការការពារបូរណភាពទឹកដី ពីការបៀតបៀនរបស់ខ្មាំងសត្រូវ ចំណែកប្រជាពលរដ្ឋបំរុងតែបង្វិចនិងរត់រកទីសុវត្ថិភាព ដើម្បីការពារអាយុជីវិតខ្លួនឯងនិងក្រុមគ្រួសារ ដោយសារការប្រយុទ្ឋដោយអាវុធ ជាដើម។
ឯកឧត្តម ពៅ ស៊ា បញ្ជាក់ថា៖ប៉ុន្តែពេលនេះកម្ពុជាទទួលបានសុខសន្តិភាពពេញលេញហើយ សន្តិភាពនេះកើតឡើងដោយសារ ការផ្សះផ្សារជាតិ និងការបង្រួបបង្រួមជាតិ និងជាពិសេសនយោបាយឈ្នះ ឈ្នះ របស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនាំឱ្យប្រទេសជាតិយើងមានសុខសន្តិភាពស្ថេរភាពនិងភាពរីកចំរើនលើគ្រប់វិស័យ ប្រជាពលរដ្ឋគ្រប់ទីកន្លែងរាប់តាំងពីទីក្រុងរហូតដល់ទីជនបទដាច់ស្រយាល គឺមានសិទ្ឋិសេរីភាពដើរហើរ មានសេរីភាពខាងជំនឿ នាំគ្នាដើរធ្វើបុណ្យទាន គ្រប់ច្រកល្ហកដោយគ្មានក្តីបារម្ភពីអស្ថេរភាពដូចមុនទៀតទេ ពោលគឺយើងម្នាក់ៗទទួលបានសុខសន្តិភាពទាំងផ្លូវកាយនិងផ្លូវចិត្តអាចមកអអ្គុយស្តាប់ព្រះសង្ឃសូត្រធម៌ និងធ្វើការប្រកបរបរគ្រប់បែបយ៉ាងដោយគ្មានការភ័យខ្លាច។
ឯកឧត្តមបានអុជធូបទៀន សម្តែងការដឹងគុណចំពោះអតីតយុទ្ឋជនយុទ្ឋនារីនិងគ្រួសារកងទ័ពទាំងអស់ដែលបានលះបង់សាច់សារលោហិតប្តីសីប្រពន្ឋកូនចៅដែលបានបំរើក្នុងជួរកងទ័ពហើយបានលះបង់សាច់ ស្រស់ឈាមស្រស់ពលីជីវិតដើម្បីបុព្វហេតុឯករាជជាតិមាតុភូមិយើង។ ឯកឧត្តម ពៅ ស៊ា ថា៖ការនាំយកទៀនចំណាំវស្សានិងទេយ្យវត្ថុបន្តិចបន្តួចប្រគេនព្រះសង្ឃនាពេលនេះគឺ ដើម្បីសម្តែងការដឹងគុណដល់អ្នដែលស្លាប់ទៅយើងអ្នកនៅរស់ទាំងអស់គ្នាត្រូវតែគោរពដឹងគុណចំពោះឧបការគុណដ៍ធំធេងទាំងនោះ ព្រោះថាសន្តិភាពបានមកដោយសារការបូជាជីវិតបូជាសាច់ស្រស់ឈាមស្រស់ក្រោកឈរឡើង តស៊ូដើម្បីរំដោះប្រទេសជាតិឱ្យផុតពីការកាប់សម្លាប់ពីរបបប្រល័យពូជសាសន៍នៅឆ្នាំ១៩៧៩និងការតស៊ូរំដោះប្រទេសឱ្យមានសន្តិភាពស្ថេរភាពនិងមានការអភិវឌ្ឍរហូតមកដល់ពេលនេះ ក្រោមការដឹកនាំដ៍ឈ្លាសវៃនិងប៉ិនប្រសព្វរបស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីកម្ពុជាយើង។
សម្ភារៈដែលបានប្រគេនព្រះសង្ឃមាន៖ទៀនចំណាំវស្សាមួយគូរ និងទេយ្យទាន១៦មុខអស់ទឹកប្រាក់១៥៨២៥០០រៀល(មួយលានប្រាំសែនប្រាំបីម៉ឺនពីរពាន់ប្រាំរយរៀល) រួមទាំងថវិកា ១៤១០០០០(មួយលានបួនសែនមួយម៉ឺនរៀល) និង
បានប្រគេនបច្ច័យដល់ព្រះសង្ឃចំនួន០៩អង្គ ចំនួន២០០០០០រៀល (ពីរសែនរៀល)។ សរុបទឹកប្រាក់ទាំងអស់ចំនួន ៣១៩២៥០០រៀល (បីលានមួយសែនប្រាំបួនម៉ឺនពីរពាន់ប្រាំរយរៀល) ។
គួររំលឹកផងដែរថា៖មជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន ៣១៧ សៀមរាប បានកាត់ខ្សែបូរសម្ពោធជាផ្លូវការក្រោមអធិបតីភាពដ៍ខ្ពង់ខ្ពស់ សម្តេចអគ្គមហាសេនាបតី តេជោ ហ៊ុន សែន និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន កាលពីថ្ងៃទី៣១ខែកក្កដាឆ្នាំ២០១០រហូតមកដល់ ខែកក្កដាឆ្នាំ២០១៩នេះ មានរយះពេល០៩ឆ្នាំហើយ ។បច្ចុប្បន្នមានបងប្អូនយោធិនពិការ បានចូលមករស់នៅ ក្នុងមជ្ឈមណ្ឌល ចំនួន២៧០គ្រួសារ ក្នុងនោះយោធិនពិការ សរុបចំនួន២៤៥គ្រួសារ និងមានសមាជិកសរុប ១,២៧០នាក់ ស្ត្រី៦១៤នាក់។
ក្រៅពីនេះ មានគ្រូបង្រៀនស្ម័គចិត្ត ចំនួន២៣គ្រួសារ, ពេទ្យឆ្មបស្ម័គ្រចិត្ត២គ្រួសារ, និងព្រះសង្ឃគង់នៅវត្ត ព្រះខ័នសែនជ័យ ចំនួន៥អង្គ។ បងប្អូនយោធិនពិការ លោកគ្រូអ្នកគ្រូ និងពេទ្យឆ្មបស្ម័គ្រចិត្ត ក្នុងរយៈពេលកន្លងមក សុទ្ធតែបានទទួល នូវរបបគោលនយោបាយដូចៗគ្នា ពីប្រមុខរាជរដ្ឋាភិបាលគឺ ដីចំនួន០១ហិតាកន្លះ លំនៅដ្ឋាន ០១ខ្នង ក្នុងមួយគ្រួសារ សម្រាប់ស្នាក់នៅនិងបង្កបង្កើនផល។ ដោយបានការយកចិត្តទុកដាក់ ឧបត្ថមជាបន្តបន្ទាប់ពី សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានធ្វើអោយ បងប្អូនយោធិនពិការ និងគ្រួសារ មានលំនឹងលើផ្នែកជីវភាពរស់នៅ បានល្អប្រសើរហូតមកដល់សព្វថ្ងៃនេះ។
អត្ថបទ និង រូបភាព ៖ លោក យូ វង្ស
