ឯកឧត្តម រដ្ឋមន្ត្រី ខៀវ កាញារីទ្ធ រដ្ឋមន្ត្រីក្រសួងព័ត៌មាន បានទទួលជួបពិភាក្សាការងារជាមួយ តំណាងក្រុមហ៊ុន ក្រុមហ៊ុន ហាវ៉ាស់ រីវើអឃើត (ខេមបូឌា) ដឹកនាំដោយ កញ្ញា Lisa Villeneuve ដើម្បីស្នើសុំការបកស្រាយពី ឯកឧត្តម រដ្ឋមន្ត្រី លើបទប្បញ្ញត្តិពាក់ព័ន្ធនឹងលិខិត អនុញ្ញាត្តសម្រាប់ការផ្សព្វផ្សាយ ពាណិជ្ជកម្ម អាហ្វីស ផ្ទាំងប៉ាណូ ប័ណ្ណប្រកាស ស្លាកសញ្ញាតាមទីសាធារណៈ ដែល មានលក្ខណៈឃោសនាមហាជន។
តាមការបញ្ជាក់របស់អ្នកតំណាង ក្រុមហ៊ុនហាវ៉ាស់ រឺវើអ ឃីត (ខេមបូឌា) នៅព្រឹកថ្ងៃទី ១៧ ខែ កក្កដា ឆ្នាំ ២០១៩ នេះ ហាវ៉ាស់ រឺវើអ ឃីត (ខេមបូឌា) ជាក្រុមហ៊ុនឯកជន ទទួលខុសត្រូវមានកម្រិត ចុះបញ្ជីពាណិជ្ជកម្ម ក្រោមច្បាប់ នៃ ព្រះរាជាណាចក្រកម្ពុជា។ ក្រុមហ៊ុននេះ គឺជាផ្នែកមួយនៃក្រុមហ៊ុន ផ្តល់សេវា ផ្សព្វផ្សាយពាណិជ្ជកម្ម និងទំនាក់ទំនងសាធារណៈ ពហុជាតិ របស់ប្រទេសបារាំង ឈ្មោះ ក្រុមហ៊ុនហាវ៉ាស់ អេស អេ ដែលមានប្រតិបត្តិការនៅជាង ១០០ ប្រទេស។ ក្រុមហ៊ុន ហាវ៉ាស់ផ្តល់សេវាដល់អតិថិជនរបស់ខ្លួន នៅប្រទេសកម្ពុជា មានដូចជា យុទ្ធសាស្ត្រម៉ាក ការរៀបចំផែនការ ប្រព័ន្ធផ្សព្វផ្សាយ ការធ្វើឲ្យអ្នក ប្រើប្រាស់ស្គាល់ម៉ាកនិងការរៀបចំព្រឹត្តិការណ៍នានា។
ជាការឆ្លើយតបទាក់ទងទៅអនុញ្ញាតសម្រាប់ការផ្សព្វផ្សាយ ពាណិជ្ជកម្ម អាហ្វីស ផ្ទាំងប៉ាណូ បណ្ណប្រកាស ស្លាកសញ្ញាតាមទីសាធារណៈ ឯកឧត្តម រដ្ឋមន្ត្រី ខៀវ កាញារីទ្ធ បានបញ្ជាក់ថា ក្រសួងព័ត៌មាន មានសិទ្ធិត្រឹមតែធ្វើការពិនិត្យខ្លឹមសារ និងរូបភាព សម្រាប់ ស្ពត ផ្សាយពាណិជ្ជកម្មទាំងអស់ ដែលមកស្នើសុំ ថាតើមានប៉ះពាល់ ដល់សីលធម៏ ប្រពៃណី វប្បធម៏ របស់ជាតិ ឬអ្នកដទៃដែរឬយ៉ាងណា បើត្រឹមត្រូវ ទើបក្រសួង អនុញ្ញាតឲ្យយកទៅផ្សព្ធផ្សាយ តាមប្រព័ន្ធផ្សព្វផ្សាយ ផ្សេងៗ និងតាមទីសារធារណៈ នៅពេលទទួលបានការអនុញ្ញាត ពីអាជ្ញាធរដែនដីថែមទៀត។ ចំពោះស្លាកយីហោ តាមបណ្តា ហាង ផ្ទះសំណាក់ សណ្ឋាគារ គឺក្រសួងព័ត៌មាន មិនមានសិទ្ធអនុញ្ញាត ឲ្យដាក់ ឬមិនដាក់នោះ ទេ នេះជាដែន សមត្ថកិច្ចរបស់ក្រសួងដទៃ ។ ចំពោះ ស្តត ផ្សាយពាណិជ្ជកម្ម ក្រសួងគ្រាន់តែជាអ្នកសម្របសម្រួល កែតម្រូវ ឲ្យបានត្រឹមត្រូវ តែប៉ុណ្ណោះ ដើម្បីអាចផ្សព្វផ្សាយបាន កុំឲ្យខុសខ្លឹមសារ ប៉ុន្តែបើក្រុមហ៊ុន ឬអ្នកផលិត ស្ពត ផ្សាយពាណិជ្ជកម្ម នោះមិនមកស្នើសុំ ពីក្រសួង ព័ត៌មាន ក៏បាន ប៉ុន្តែបើ ខុសខ្លឹមសារ ឬរូបភាពអ្វី មួយ អ្នកផលិតនោះ ជាអ្នកទទួលខុសត្រូវ ៕
ព័ត៌មានជាតិ ថ្មីៗ
អត្ថបទ និង រូបភាព ៖ ក្រសួងព័ត៌មាន
