នៅក្នុងឱកាសអញ្ជើញចូលជួបសំដែងការគួរសម និងពិភាក្សាការងារជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន នៅព្រឹកថ្ងៃទី ១៧ ខែ កក្កដា ឆ្នាំ ២០១៩ លោក រីទ្ធី តូម៉ាស់ នាយកប្រតិបត្តិ ក្រុមហ៊ុន OPENNET PHNOM PENH បានស្នើសុំការគាំទ្រពី ឯកឧត្តម រដ្ឋមន្ត្រី ដើម្បីអាចឲ្យក្រុមហ៊ុនធ្វើប្រតិបត្តិការ ប្រពន្ធ័ទូរទស្សន៏ចល័ត OTT នៅក្នុងប្រទេសកម្ពុជា ។
លោក រីទ្ធី តូម៉ាស់ បានជម្រាបជូនថា ក្នុងរយៈពេលជាង ៦ ឆ្នាំមកនេះ ក្រុមហ៊ុន OPENNET PHNOM PENH បានប្រតិបត្តិការ ផ្តល់សេវាអ៊ីនធើរណែត ដល់អ្នកប្រើប្រាស់នៅក្នុងប្រទេសកម្ពុជា ជាមួយនឹងការគាំទ្រច្រើនពីអតិថិជន ជា ច្រើន។ តាមរយៈភាពរីកចម្រើននេះ ទើបក្រុមហ៊ុន OPENNET PHNOM គ្រោងបង្កើតប្រព័ន្ធ ផ្សព្វផ្សាយ ដែលមាន OTT និង ID TV ដែលអាចឲ្យអ្នក ប្រើទូរសព្ទ័ដៃឆ្លាតវៃ និង ទូរទស្សន៍ អាចមើលប៉ុស្តី ទូរទស្សន៍ នៅក្នុងស្រុក បានទាំងអស់ និងប៉ុស្តិបរទេសជាច្រើនទៀត លើកលែងតែប៉ុស្តិ កុនល្បីៗមួយចំនួន ដែល តម្រូវឲ្យបង់លុយ ។ លោក នាយកប្រតិបត្តិ ក្រុមហ៊ុន OPENNET PHNOM បានជម្រាបជូនដែរថា នៅក្នុងប្រទេសវៀតណាម ក្រុមហ៊ុនបានដាក់ឲ្យដំណើរការប្រពន្ធ័ OTT នេះ ជាយូរមកហើយ ដែលបានដាក់បញ្ជូលប៉ុស្តិទូរទស្សន៍ រហូតដល់ ១២០ ប៉ុស្តិ តែមិនផ្សាយតាមរលកធាតុអាកាសនោះទេ គឺផ្សាយតាម ប្រព័ន្ធ អ៊ីនធើរណែត ។
ទាក់ទងទៅគម្រោងរបស់ ក្រុមហ៊ុន OPENNET PHNOM នេះ ឯកឧត្តម រដ្ឋមន្ត្រី ខៀវ កាញារីទ្ធ បានសំដែងនូវការគាំទ្រ ចំពោះដំណើរការងារ ប្រព័ន្ធ OTT នៅក្នុងប្រទេសកម្ពុជា តែ ឯកឧត្តម ក៏បានលើកឡើងដែរថា ក្នុងរយៈ ពេលកន្លងមកនេះ មានក្រុមហ៊ុនមួយចំនួន ហើយបានដាក់ឲ្យដំណើរការ ប្រព័ន្ធ OTT នេះ តែដួចជាការរៀបចំ ការគ្រប់គ្រង មិនបានល្អ ទើបមិន មានការចាប់អារម្មណ៍ពីសំណាក់ប្រជាជន ជាអ្នកប្រើប្រាស់នោះទេ។
បើតាមការបញ្ជាក់របស់ លោកនាយកប្រតិបត្តិក្រុមហ៊ុន OPENNET PHNOM PENH បានឲ្យដឹងថា គម្រោងការងារប្រព័ន្ធ ទូរទស្សន៍ចល័ត OTT នេះ ក្រុមហ៊ុន នឹង រៀបចំទីតាំង បំពាក់សំភារៈ បរិក្ខារផ្សេងៗ ដើម្បីអាចដំណើរការផ្សាយបាន ប្រហែលរយៈពេល ១ ឆ្នាំ ៕
អត្ថបទ និង រូបភាព ៖ ក្រសួងព័ត៌មាន
