នៅព្រឹកថ្ងៃទី១៨ កក្កដា ឆ្នាំ២០១៩ លោកឧត្តមសេនីយ៍ត្រី ហួត សុធី ស្នងការរងទទួលផែនការងារសន្តិសុខ របស់ស្នងការនគរបាលខេត្តសៀមរាប បានចុះរៀបចំកិច្ចប្រជុំផ្សព្វផ្សាយសេចក្តីណែនាំលេខ០១៩ សណន របស់ក្រសួងមហាផ្ទៃ ស្តីពីការគ្រប់គ្រងប្រើប្រាស់ក្របខណ្ឌមន្ត្រីនគរបាលជាតិ ការប្រើប្រាស់អាវុធជាតិផ្ទុះ និងមធ្យោបាយ ជូនមន្ត្រីនគរបាលនៃអធិការដ្ឋាននគរបាលស្រុកពួក ខេត្តសៀមរាប។
ក្នុងសេចក្ដីណែនាំរបស់ក្រសួងមហាផ្ទៃនេះដែល លោក ហួត សុធី បានបង្ហាញថា ការងាររដ្ឋបាលមួយចំនួនដល់កងកម្លាំងនគរបាលជាតិ ខ្លឹមសារសំខាន់ៗ បានផ្តោតទៅលើ ផែនការគ្រប់គ្រងអាវុធឱ្យបានត្រឹមត្រូវ គោរពម៉ោងការងារ ច្បាប់ឈប់សម្រាក ការរៀបចំបែងចែងមុខងារភារកិច្ចជូនមន្ត្រីនគរបាល ក្នុងថ្នាក់ដឹកនាំ ត្រូវគ្រប់គ្រងកម្លាំងរបស់ខ្លួន ដោយហាមមិនឱ្យយកកម្លាំង ទៅបម្រើការងារនៅតាមក្រុមហ៊ុនឯនជន ហាមមិនឱ្យយកយានជំនិះរបស់អង្គភាពទៅហែរហមក្រុមហ៊ុនឯកជន ឬបុគ្គលណាមួយឡើយ។ល៕
ក្រៅពីនេះ ស្នងការរងលោក ហួត សុធី ក៏បានណែនាំឱ្យមន្ត្រីទាំងអស់ត្រូវរៀបចំអនាម័យ បរិស្ថានឱ្យបានល្អប្រសើរ ក្នុងនោះត្រូវអនុវត្តន៍ការងារឱ្យបានទន់ភ្លន់ តែត្រូវម៉ឺងម៉ាត់សមជាមន្ត្រីបម្រើរាស្ដ្រពិតប្រាកដ។ ត្រូវគ្រប់គ្រងអាវុធឱ្យបានល្អ ជៀសវាងការបាត់បង់ ឬធ្លាក់ទៅលើដៃឧក្រិដ្ឋជន ដែលនាំឱ្យមានគ្រោះថ្នាក់ដល់សង្គម និងខ្លួនឯង។ លើសពីនេះ លោកស្នងការក៏បានលើកគោលការណ៍៣ ដែលកម្លាំងត្រូវអនុវត្តន៍ជាប្រចាំដើម្បីឱ្យកាន់តែមានប្រសិទ្ធភាព ដូចជា គោរពវិន័យកម្លាំងនគរបាលជាតិលេខ០០៦ និងលេខ០១៩របស់ក្រសួងមហាផ្ទៃ, ហ្វឹតហាត់ជំនាញផ្សេងៗជាប្រចាំដើម្បីបង្ការ ទប់ស្កាត់ ក្នុងករណីមានហេតុការណ៍អ្វីកើតឡើងជាយថាហេតុ, និងត្រូវថែទាំសុខភាពជាចម្បង ដោយធ្វើការហាត់ប្រាណជាប់ជាប្រចាំ ដើម្បីឱ្យមានសុខភាពរឹងមាំបម្រើប្រជាពលរដ្ឋ និងសង្គមជាតិ។
ក្នុងឱកាសនោះ លោកស្នងការរង បានណែនាំឱ្យលោកអធិការនគរបាលស្រុកពួក ត្រូវចាត់ចែងថតចម្លងឯកសារសេចក្ដីណែនាំខាងលើនេះ ជូនដល់បណ្ដាប៉ុស្ដិ៍នគរបាលរដ្ឋបាល ហើយនាយប៉ុស្ដិ៍នៅតាមមូលដ្ឋាន ប្រជុំផ្សព្វផ្សាយណែនាំដល់មន្ត្រីក្រោមឱវាទផងដែរ ដើម្បីឱ្យបានដឹងច្បាស់ពីអត្ថន័យនៃសេចក្ដីណែនាំនេះ។
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
