បច្ចុប្បន្ននេះ មន្ទីរពេទ្យកុមារជ័យវរ្ម័នទី៧ខេត្តសៀមរាប កំពុងជួបបញ្ហាការផ្តល់សេវាវះកាត់ជំងឺបេះដូងពីកំណើតរបស់កុមារ ជាមួយនេះមូលនិធិគន្ធបុប្ផា គ្រោងនឹងបើកសម្ពោធបន្ទប់វះកាត់ជំងឺបេះដូងកុមារពីកំណើត នៅមន្ទីរពេទ្យកុមារគន្ធបុប្ផាទាំង៣ទីតាំង នៅរាជធានីភ្នំពេញបន្ថែមទៀត ដើម្បីដោះស្រាយកង្វល់ទាំងនោះ។
លោកវេជ្ជបណ្ឌិត យ៉ៃ ចន្ទនា ប្រធានមន្ទីរពេទ្យគន្ធបុប្ផាទី៣ ឬ មន្ទីរពេទ្យជ័យវរ្ម័នទី៧ខេត្តសៀមរាប បានបង្ហាញរបាយការណ៍ឲ្យដឹងថា ៖ គិតសម្រាប់១ថ្ងៃ នៃដើមសប្តាហ៍ទី៣ក្នុងខែកក្កដា ឆ្នាំ២០១៩នេះ មន្ទីរពេទ្យកុមារជ័យវរ្ម័នទី៧នៅខេត្តសៀមរាប បានទទួលពិគ្រោះជំងឺកុមារប្រមាណជា ២ ៤០០នាក់ កុមារសម្រាកព្យាបាលក្នុងមន្ទីរពេទ្យប្រមាណជា ១ ៦០០នាក់ វះកាត់ជំងឺកុមារ ៣២ករណី ក្នុងនេះមានវះកាត់បេះដូង ៣ករណី ពិគ្រោះជាមួយស្ត្រីនៅផ្នែកសម្ភព ប្រមាណជាជិត ៧០០នាក់ ស្ត្រីសម្រាលកូនមានចំនួន ៩១នាក់ ក្នុងនេះសម្រាលកូនដោយវះកាត់មានចំនួន១៣ករណី ។
លោកវេជ្ជបណ្ឌិតមានប្រសាសន៍ថា តាមការកត់សម្គាល់ក្នុងរយៈពេលប៉ុន្មានឆ្នាំកន្លងមកនេះ ស្ត្រីសម្រាលកូននៅក្នុងមន្ទីរពេទ្យកុមារជ័យវរ្ម័នទី៧ មានកំណើនតិចតួច ។ បើគិតជាមធ្យមទៅ ក្នុង១ឆ្នាំមន្ទីរពេទ្យកុមារជ័យវរ្ម័នទី៧ បានទទួលស្ត្រីសម្រាលកូនប្រហែលជា ២៥ ០០០នាក់ ក្នុងនេះស្ត្រីសម្រាលកូនដោយវះកាត់មានប្រហែលជា ៣ ៥០០នាក់ ។ លោកវេជ្ជបណ្ឌិតបន្តឲ្យដឹងថា ៖ លទ្ធភាពខាងលើនេះ មន្ទីរពេទ្យកុមារជ័យវរ្ម័នទី៧ធ្វើបានយ៉ាងល្អប្រសើរ ប៉ុន្តែអ្វីដែលក្នុងចង្កោមមន្ទីរពេទ្យកុមារគន្ធបុប្ផា ទាំងនៅសៀមរាបនិងនៅរាជធានីភ្នំពេញ ត្រូវយកចិត្តទុកដាក់នោះគឺ លទ្ធភាពរបស់ខ្លួនក្នុងការផ្តល់សេវាវះកាត់ជំងឺបេះដូងកុមារពីកំណើត ។
លោកបញ្ជាក់ថា ៖ បច្ចុប្បន្ននេះ បន្ទប់វះកាត់ជំងឺបេះដូងកុមារពីកំណើត គឺមានតែមួយបន្ទប់ប៉ុណ្ណោះនៅមន្ទីរពេទ្យកុមារជ័យវរ្ម័នទី៧ ឬមន្ទីរពេទ្យកុមារគន្ធបុប្ផាទី៣(សៀមរាប) នៅមន្ទីរពេទ្យកុមារគន្ធបុប្ផាទាំង៣ទីតាំង នៅរាជធានីភ្នំពេញ ពុំទាន់មានបន្ទប់វះកាត់ជំងឺបេះដូងកុមារនោះឡើយ ។ លោកបន្តឲ្យដឹងថា មកដល់ពេលនេះ ក្នុងបញ្ជីកុមារដែលត្រូវទទួលការវះកាត់ជំងឺបេះដូងពីកំណើត មានរហូតដល់ជិត ២ ០០០នាក់ ហើយក្នុង១ថ្ងៃ មន្ទីរពេទ្យជ័យវរ្ម័នទី៧ មានលទ្ធភាពប្រតិបត្តិការវះកាត់បេះដូងកុមារ បានត្រឹមតែពី ២ ទៅ ៣ករណីប៉ុណ្ណោះ ក្នុងនេះត្រូវមានករណីពិសេសបន្ថែមទៀត គឺការវះកាត់បន្ទាន់នៅពេលដែលទារកទើបសម្រាលមានបញ្ហានេះ និង ត្រូវទទួលការវះកាត់បន្ទាន់ដោយការបញ្ជូនកុមារមានជំងឺនេះ ពីមន្ទីពេទ្យកុមារគន្ធបុប្ផារាជធានីភ្នំពេញផងដែរ ។
ប្រឈមនឹងបញ្ហានេះ លោក យ៉ៃ ចន្ទនា បានបង្ហើបឲ្យដឹងថា ៖ មូលនិធិគន្ធបុប្ផា បានសម្រេចបង្កើតឲ្យមានបន្ទប់វះកាត់ជំងឺបេះដូងកុមារពីកំណើត ចំនួន៣បន្ទប់ទៀតនៅមន្ទីរពេទ្យគន្ធបុប្ផាទាំង៣ទីតាំងនៅរាជធានីភ្នំពេញ ដែលនឹងត្រូវដាក់សម្ពោធឲ្យប្រើប្រាស់ជាផ្លូវការ នាដើមខែសីហា ឆ្នាំ២០១៩ ខាងមុខនេះ ។ ក្នុងបទសម្ភាសន៍ លោកវេជ្ជបណ្ឌិត យ៉ៃ ចន្ទនា មានប្រសាសន៍យ៉ាងដូច្នេះថា ៖ ( បទសម្ភាសន៍ មានក្នុងវីដេអូខាងក្រោម )
អត្ថបទ និង រូបថត ៖ លោក ងិន គឹមឡេង
