នាព្រឹកថ្ងៃទី១៧ ខែកក្កដា ឆ្នាំ២០១៩ មន្ត្រីជំនាញផ្នែកផ្លូវថ្នល់មកពីនាយកដ្ឋានទ្រទ្រង់បច្ចេកទេស និងគម្រោងអន្តរវិស័យនៃអាជ្ញាធរជាតិអប្សរា បានចុះត្រួតពិនិត្យលើកំណាត់ផ្លូវមិត្តភាព-កូរ៉េ ក្នុងគោលបំណងសិក្សាគុណភាពផ្លូវ ដែលកំពុងជួសជុល ដោយក្រុមហ៊ុនម៉ៅការ ដើម្បីត្រួតពិនិត្យពីភាពត្រឹមត្រូវតាមបទដ្ឋាន ដែលអាជ្ញាធរជាតិអប្សរាបានកំណត់។
ការចុះពិនិត្យមើលនេះ ផ្ដោតទៅលើសមស្រមតាមបទដ្ឋានបច្ចេកទេសដែលបានកំណត់ដូចជា ភាពរឹងមាំនៃគ្រឹះថ្មរបស់ផ្លូវ ដែលធានាដល់ការប្រើប្រាស់បានយូរអង្វែង និងធានាបញ្ហាខូចខាត នៅពេលរថយន្តធុនធំបើកឆ្លងកាត់(មិនលើសទំងន់កំណត់)។ ក្នុងករណីរកឃើញថាក្រុមហ៊ុនមិនបានធ្វើគ្រប់តាមបទដ្ឋានដែលបានកំណត់ទេនោះ ភាគីក្រុមហ៊ុននឹងត្រូវរកវិធីសាស្ត្រថ្មី ដើម្បីពង្រឹងកម្រិតកំហាប់នៃស្រទាប់គ្រឹះថ្មឡើងវិញ។
បន្ទាប់ពីត្រួតពិនិត្យឃើញថាត្រូវត្រូវហើយ នឹងមានការអ៊ុតកៅស៊ូពីរង្វង់មូលព្រៃគុយដល់រង្វង់មូលកូនដំរី។
អំឡុងពេលជួសជុល និង អ៊ុតកៅស៊ូពីរង្វង់មូលព្រៃគុយ ដល់រង្វង់មូលកូនដំរី អាជ្ញាធរជាតិអប្សរា សូមការអធ្យាស្រ័យពីសំណាក់ប្រជាពលរដ្ឋរស់នៅតាមដងផ្លូវ និងអ្នកដំណើរ ដែលនឹងមានការរំខាន ធូលីដីហុយ និងសូមឲ្យមានការប្រុងប្រយ័ត្នខ្ពស់ទាំងអស់គ្នាក្នុងការបើកបរ ជៀសវាងគ្រោះថ្នាក់ដោយប្រការណាមួយ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
