អាជីវករលក់សាច់ជ្រូក នៅតាមផ្សារនានា ក្នុងក្រុងសៀមរាប បានអះអាងស្រដៀងគ្នាថា សាច់ជ្រូកដែលពួកគាត់លក់សព្វថ្ងៃ ជាសាច់ដែលមានសុវត្ថិភាព ពុំមានជំងឺឆ្លងណាមួយនោះទេ។
អ្នកលក់សាច់ជ្រូកមួយចំនួននៅផ្សារចាស់ ផ្សារលើធំថ្មី និងផ្សារវត្តអធ្វារ ក្នុងក្រុងសៀមរាប បានលើកឡើងថា ចាប់តាំងពីមានផ្ទុះជំងឺប៉េស្តជ្រូកអាហ្វ្រិក ការលក់ដូររបស់ពួកគាត់មានការធ្លាក់ចុះរហូតដល់ទៅ៦០ភាគរយ ដែលការលក់ធ្លាក់ចុះនេះ បានធ្វើឲ្យប៉ះពាល់ដល់ជីវភាពរបស់ពួកគាត់ ។ ពួកគាត់បានអំពាវនាវពលរដ្ឋក្នុងខេត្តសៀមរាប ងាកមកទទួលទានសាច់ជ្រូកវិញ ព្រោះសាច់ជ្រូកដែលពួកគាត់ដាក់លក់គឺមានកាតត្រួតពិនិត្យគុណភាពហ្មត់ចត់។
ជាមួយនឹងការអះអាងរបស់អាជីវករលក់សាច់ជ្រូកនេះ លោក ស៊ឹម ធរដ្ឋ អនុប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់និងនសាទខេត្តសៀមរាប ក៏បានអំពាវនាវដល់ប្រជាពលរដ្ឋ គួរតែបរិភោគសាច់ជ្រូកឡើងវិញ ចំពោះសាច់ជ្រូកណា ដែលមានបោះត្រាសម្គាល់ថា ជាសាច់មានសុវត្ថិភាព ពីមន្ត្រីជំនាញពេទ្យសត្វ ព្រោះថា ប្រសិនបើសាច់សត្វមិនមានបោះត្រាសម្គាល់ ឬសាច់សត្វគ្មានប្រភពច្បាស់ទេនោះ អាចមានជំងឺផ្សេងទៀត ដែលអាចឆ្លងដល់មនុស្ស ។
ព័ត៌មានជាតិ ថ្មីៗ
លោក ស៊ឹម ធរដ្ឋ មានប្រសាសន៍បន្ថែមថា បច្ចុប្បន្ននៅក្នុងខេត្តសៀមរាម នៅមិនទាន់កើតមានជំងឺប៉េស្តជ្រូកអាហ្វ្រិកនៅឡើយទេ ប៉ុន្តែទោះជាយ៉ាងនេះក្តី ក៏ខាងមន្ត្រីជំនាញ ចុះធ្វើការពិនិត្យតាមដានលើស្ថានភាពជំងឺនេះជាប្រចាំ និង ពង្រឹងការត្រួតពិនិត្យលើការនាំចូលសត្វជ្រូកតាមព្រំប្រទល់ខេត្តផ្សេងៗផងដែរ ។
លោក ស៊ឹម ធរដ្ឋ មានប្រសាសន៍យ៉ាងដូច្នេះ ក្នុងកម្មវិធីសន្ទនាមតិ របស់វិទ្យុFMជាតិនគរភ្នំ១០៣ MHz និង ទូរទស្សន៍ជាតិខេត្តសៀមរាប នៃមន្ទីរព័ត៌មានខេត្តសៀមរាប ដែលបានផ្សាយផ្ទាល់ កាលពីព្រឹកថ្ងៃទី១៧ ខែកក្កដា ឆ្នាំ២០១៩ ៕
អត្ថបទ និង រូបថត ៖ លោក ជា ស្រស់ លោក ខេង ឧត្តម
កែសម្រួលអត្ថបទ ៖ លោក សេង ផល្លី
