ផ្ទះមនុស្សធម៌ចំនួន២ខ្នង ដែលមួយខ្នងៗ មានទំហំ ៥ម៉ែត្រគុណនឹង៦ម៉ែត្រ ធ្វើពីឈើ ប្រក់ស័ង្កសីភ្លីធំ ក្រាលក្ដារ ជញ្ជាំងក្ដារ តម្កល់លើជើងតាង កម្ពស់១,៨០ម៉ែត្រ ដែលជាអំណោយរបស់លោកជំទាវឧកញ៉ា សៀង ចាន់ហេង ផ្តល់តាមរយៈសាខាកាកបាទក្រហមកម្ពុជាខេត្តសៀមរាប ក្រោមការផ្ដួចផ្ដើមរបស់ឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ត្រូវបានប្រគល់ជូនប្រជាពលរដ្ឋទីទ័លក្រ គ្មានទីពឹង ចំនួន២គ្រួសារ ក្នុងឃុំដូនពេង ស្រុកអង្គរជុំ នៅថ្ងៃទី០៣ ខែកញ្ញា ឆ្នាំ២០១៨ម្សិលមិញនេះ ក្រោមអធិបតីភាពលោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងលោកជំទាវឧកញ៉ា សៀង ចាន់ហេង រួមនឹងសហការី ។
ផ្ទះមនុស្សធម៌ចំនួន២ខ្នងនេះ គឺផ្ទះមនុស្សធម៌ទី៥៦ ត្រូវបានប្រគល់ជូនគ្រួសារឈ្មោះ ផាវ វង់ អាយុ៣៨ឆ្នាំ ប្រពន្ធឈ្មោះ លឿង សុខា អាយុ៤៦ឆ្នាំ ជាគ្រួសារទីទ័លក្រខ្លាំង រស់នៅភូមិរកា ឃុំដូនពេង បច្ចុប្បន្នជាកសិករ និងដើរស៊ីឈ្នួល និងប្រពន្ធចិញ្ចឹមជ្រូកដើម្បីទ្រទ្រង់ជីវភាពប្រចាំថ្ងៃ មាន កូន៤នាក់នៅក្នុងបន្ទុក និងផ្ទះមនុស្សធម៌ទី៥៧ ត្រូវបានប្រគល់ជូនគ្រួសារឈ្មោះ គី គន់ អាយុ៤៩ឆ្នាំ ជាជនពិការដោយសង្គ្រាម ដែលជាអតីតយោធាស្រុកអង្គរជុំ មានប្រពន្ធឈ្មោះ ឆប ឈីវ អាយុ៣៨ឆ្នាំ ជាកសិករ រស់នៅភូមិបត់ ឃុំដូនពេង រួមជាមួយនឹងអំណោយមនុស្សធម៌បន្ថែមដែលក្នុងមួយគ្រួសារ ទទួលបានមុង២ -ភួយ២ -សារុង១ -ក្រមា១ -កន្ទេល១ -អង្ករ៥០គីឡូក្រាម -មី១កេស -ត្រីខ១យួរ ទឹកស៊ីអ៊ីវ១យួរ សម្ភារផ្ទះបាយមួយចំនួន និងថវិកា២០ម៉ឺនរៀល ៕
អត្ថបទ និង រូបថត ៖ លោក គឿន វេត និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
