ធនាគារពិភពលោក បានសម្រេចផ្តល់ ប្រាក់កម្ចីប្រមាណ ៥០លានដុល្លារអាមេរិក ដោយក្នុងនោះថវិកា២០លានដុល្លារអាមេរិក សម្រាប់គម្រោងទឹកស្អាត និង អនាម័យ ក្នុងការសាងសង់បណ្តាញលូខ្នែង និង ខ្នែងរងទឹកកខ្វក់ក្នុងខេត្តសៀមរាប។
កាលពីព្រឹកថ្ងៃទី០៤ ខែកញ្ញា ឆ្នាំ២០១៨ ថ្លែងក្នុងកិច្ចប្រជុំ ពិគ្រោះយោបល់លើ ផែនការអភិវឌ្ឍប្រព័ន្ធបណ្តាញលូ ប្រមូលទឹកសំណល់ក្នុងក្រុងសៀមរាប លោក ទៀ សីហា អភិបាលរងខេត្តសៀមរាប បានបង្ហាញថា បន្ទាប់ពី អាជ្ញាធរជាតិអប្សរា បានកសាងរបាំងការពារទឹកជំនន់នៅផ្នែកខាងលើរួចមក ឥឡូវនេះខេត្តសៀមរាបបានចៀសផុតពីជំនន់ទឹកភ្លៀង ហូរចូលមកកាន់ក្រុងសៀមរាប ជោគជ័យជាស្ថាពរហើយ។ ប៉ុន្តែបញ្ហាចោទខ្លាំងនាពេលនេះ គឺប្រព័ន្ធទឹកកខ្វក់ និង ស្ទះជំនន់ទឹកភ្លៀងក្នុងក្រុងសៀមរាប ដោយសារខ្វះខាតបណ្តាញលូខ្នែង និង ខ្នែងរង សម្រាប់តភ្ជាប់ពីលំនៅដ្ឋានរបស់ប្រជាពលរដ្ឋក្នុងក្រុង ទៅកាន់បណ្តាញលូមេ។
លោក ទៀ សីហា បានបញ្ជាក់ថា កន្លងមក ខេត្តទទួលបានការគាំទ្រពីសំណាក់ដៃគូអភិវឌ្ឍន៍លើផ្នែកអនាម័យដូចជា ធនាគារអភិវឌ្ឍន៍អាស៊ី ធនាគារអាហរណនីហរណ និង ទីភ្នាក់ងារអភិវឌ្ឍន៍នៃ ប្រទេសបារាំងក្ដី ប៉ុន្តែបញ្ហាទឹកកខ្វក់ក្នុងក្រុងនេះ នៅមិនទាន់សម្រេចបាននៅឡើយទេ។
ដើម្បីដោះស្រាយបញ្ហានេះ ធនាគារពិភពលោក បានសម្រេចផ្តល់ប្រាក់កម្ចី ២០លានដុល្លារអាមេរិក សម្រាប់តភ្ជាប់បណ្តាញលូខ្នែង និង ខ្នែងរងទឹកកខ្វក់ពីផ្ទះប្រជាពលរដ្ឋ ទៅកាន់បណ្តាញលូមេ ដែលទឹកកខ្វក់តាមផ្ទះទាំងនោះ នឹងយកទៅច្រោះសម្អាតនៅស្ថានីយច្រោះសម្អាតទឹកសំណល់ មុននឹងបញ្ចេញទៅប្រភពទឹកសាធារណៈវិញ ដែលជាលទ្ធផលធានាបាននូវសុខភាពសាធារណៈ បរិស្ថាន និង អនាម័យសាធារណៈ នេះបើតាមប្រសាសន៍លោក កែន រដ្ឋា អគ្គនាយករង នៃអគ្គនាយកដ្ឋានសាធារណការ និងដឹកជញ្ជូន នៃក្រសួងសាធារណការនិងដឹកជញ្ជូន។
លោក កែន រដ្ឋា បន្ថែមថា តាមការពិនិត្យទៅលើបញ្ហាការបញ្ចេញចោលទឹកកខ្វក់ ក្នុងក្រុងសៀមរាប ក្នុងមួយថ្ងៃ មានប្រមាណ២៥ពាន់ម៉ែត្រគូប ប៉ុន្តែខេត្តសៀមរាប អាចគ្រប់គ្រងបញ្ហានេះបានតែ ៨ពាន់ម៉ែត្រគូបតែប៉ុណ្ណោះ ដែលកម្រិតនេះជាបញ្ហាមួយត្រូវការនូវការគាំទ្រពីសំណាក់ដៃគូអភិវឌ្ឍន៍នានាបន្ថែមទៀត។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
