តាមការឲ្យដឹងពី អភិបាលខេត្តបាដហ្គីស លោក អាប់ ឌុល ហ្គាហ្វ៊ ម៉ាលីកហ្សៃ បាននិយាយថា ពួកសកម្មប្រយុទ្ធរហូត ទៅដល់៥០នាក់ ដែលរួមបញ្ចូលទាំងមេបញ្ជាការយ៉ាងសំខាន់ម្នាក់ផង បានស្លាប់នៅនឹងកន្លែង ពេលដែលយន្តហោះយោធាបានវាយប្រហារគេឡោមព័ទ្ធនៃខេត្តបាដហ្គីស ប្រទេសអាហ្វហ្គានីស្ថានភាគខាងលិចកាលពីថ្ងៃព្រហស្បតិ៍នេះ ។
លោក ម៉ាលិក ហ្សៃ បានប្រាប់ទីភ្នាក់ងារព័ត៌មានចិនស៊ីនហួថា ដោយធ្វើសកម្មភាពតាមសេចក្តីរាយការណ៍ចារកម្មនោះ យន្តហោះប្រយុទ្ធរបស់កងកម្លាំងសន្តិសុខបានវាយប្រហារចំណុចប្រមូលផ្តុំគ្នា របស់ពួកតាលីបង់នៅក្នុងស្រុក Ab Kamari នេះនៅមុនថ្ងៃត្រង់ថ្ងៃព្រហស្បតិ៍នេះ ដែលសម្លាប់ពួកឧទ្ទាម ៥០នាក់ ដែលរួមបញ្ចូលទាំងមេបញ្ជាការដ៏ល្បីរបស់ក្រុមនេះឈ្មោះ សាយ៉េត សាផង នៅនឹងកន្លែង ហើយការវាយប្រហារពីអាកាសទៅលើពួកសកម្មប្រយុទ្ធនៅក្នុងតំបន់នោះ នឹងបន្តទៅទៀត ។
តាមការឱ្យដឹងពីពួកអ្នកស្រុកក្នុងតំបន់នោះ ពួកសកម្មប្រយុទ្ធតាលីបង់បានឡោមព័ទ្ធស្រុក Ab Kamari ក្នុងពេល ១០ថ្ងៃកន្លងទៅនេះ ហើយកងកម្លាំងរដ្ឋាភិបាលបាននឹងកំពុងវាយប្រហារមក ដើម្បីបណ្តេញឧទ្ទាមចេញ ពីតំបន់នោះ ។
ពួកសកម្មប្រយុទ្ធតាលីបង់ដែលបានបង្កើនសកម្មភាពនោះ មិនទាន់បានធ្វើអត្ថាធិប្បាយនៅឡើយ ទេស្តីពីស្ថានការណ៍នៅក្នុងស្រុកដែលមានភាពវឹកវរនេះ ៕
( ប្រភព ស៊ីនហួ បកប្រែដោយលោក ប៉ិន មឿន )
