តាមការប៉ាន់ស្មាន របស់ក្រសួងបរិស្ថាន នៅក្នុងទីក្រុងធំៗ ប្រជាពលរដ្ឋកម្ពុជាម្នាក់បានបង្កើតសំរាមប្រមាណ ១ គីឡូក្រាមក្នុងមួយថ្ងៃ និងប្រជាពលរដ្ឋរស់នៅតាមជនបទបង្កើតសំរាមប្រមាណកន្លះគីឡូក្នុងមួយថ្ងៃ។ ជារួម ក្នុងមួយឆ្នាំ ប្រទេសកម្ពុជា បានបង្កើតសំរាម ប្រមាណជិត ៤ លានតោន ក្នុងនោះ ២០% ជាសំណល់ថង់ប្លាស្ទិក។
នេះបើតាមការលើកឡើងរបស់ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន ក្នុងឱកាសយុទ្ធនាការ “កាត់បន្ថយការប្រើប្រាស់ថង់ប្លាស្ទិក និងផ្សព្វផ្សាយពីកន្ត្រកបរិស្ថាន» ដែលរៀបចំធ្វើឡើងនៅតំបន់ផ្សារចាស់ខេត្តសៀមរាម នាព្រឹកថ្ងៃទី២៧ ខែកក្កដា ឆ្នាំ ២០១៩។
ព័ត៌មានជាតិ ថ្មីៗ
ឯកឧត្តម នេត្រ ភក្ត្រា បន្តថា៖សំណល់ថង់ប្លាស្ទិក បានផ្តល់ផលប៉ះពាយ៉ាងធ្ងន់ធ្ងរដល់សង្គម សុខភាពប្រជាពលរដ្ឋ និងគុណភាពបរិស្ថាន ក្នុងនោះរួមមាន៖
– ការធ្វើឱ្យស្ទះប្រព័ន្ធបង្ហូរទឹកលូ នាំឱ្យមានទឹកជំនន់នៅរដូវភ្លៀងធ្លាក់
– ការធ្វើឱ្យបាត់បង់សោភ័ណភាពទីក្រុង
– នៅពេលគេបោះចោលថង់ប្លាស្ទិកគ្មានសណ្ដាប់ធ្នាប់ បង្កឱ្យមានគ្រោះថ្នាក់ដល់ប្រព័ន្ធអេកូឡូស៊ី ជាពិសេសជីវៈចម្រុះនៅក្នុងទឹក
– ជាជម្រកភ្នាក់ងារចម្លងជំងឺមួយចំនួនធំ និងមួយផ្នែកទៀតផ្ទុកដោយសារធាតុគីមីពុលអាចជ្រាបចូលទៅក្នុងដី និងធ្វើឱ្យប៉ះពាល់ដល់គុណភាពដី ទឹកលើ និងក្រោមដី
– ថង់ប្លាស្ទិក ប្រើសម្រាប់ច្រក ឬខ្ចប់ម្ហូបអាហារ ជាពិសេសអាហារក្តៅ អាចបង្កផលប៉ះពាល់ដល់សុខភាពមនុស្សដោយសារតែសារធាតុគីមីផ្ទុកក្នុងថង់ប្លាស្ទិក។
មានវត្តមានក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា៖ យុទ្ធនាការអប់រំ និងការផ្សព្វផ្សាយបរិស្ថាន នាពេលនេះ មានគោលបំណង បញ្ជ្រាបការយល់ដឹងដល់បងប្អូនប្រជាពលរដ្ឋ អាជីវករ ក្មួយៗយុវជន សិស្សានុសិស្ស អំពីការគ្រប់គ្រង ការញែក និងការកាត់បន្ថយកាកសំណល់រឹង ដើម្បីធានាបាននូវកិច្ចគាំពារបរិស្ថាន ការអភិរក្សធនធានធម្មជាតិ និងជីវៈចម្រុះ និងការរស់នៅប្រកបដោយចីរភាព ជាពិសេសការអនុវត្តន៍តាមគោលការណ៍ Three R (៣R) ដូចជា ១. ការកាត់បន្ថយ (Reduce), ២. ការប្រើប្រាស់ឡើងវិញ(Reuse) និង ៣. ការកែច្នៃសំណល់(Recycle) ។
សូមបញ្ជាក់ថា៖ដោយពិនិត្យឃើញក្តីបារម្ភខាងលើ អគ្គនាយកដ្ឋានចំណេះដឹង និងព័ត៌មានបរិស្ថាន នៃក្រសួងបរិស្ថាន បានរៀបចំយុទ្ធនាការ “កាត់បន្ថយការប្រើប្រាស់ថង់ប្លាស្ទិក និងផ្សព្វផ្សាយពីកន្ត្រកបរិស្ថាន» នៅខេត្តសៀមរាប ហើយ ដែលគ្រោងនឹងធ្វើឡើងនៅតាមទីប្រជុំជនទូទាំងរាជធានី-ខេត្ត-ក្រុង និងស្រុក ជាច្រើនទៀតដោយផ្តល់ជូនជាកន្ដ្រកយួរបរិស្ថានផលិតពីកញ្ចោរ ដែលជាធនធានក្នុងស្រុក សម្រាប់ប្រជាពលរដ្ឋដែលចូលទិញម្ហូបអាហារ និងសម្ភារៈផ្សេងៗនៅក្នុងផ្សារនានា តាមទីប្រជុំជនដែលកំណត់។
យុទ្ធនាការនេះមានគោលបំណងសំខាន់ៗដូចជា៖
១-ផ្សព្វផ្សាយជាផ្លូវការនូវចលនាទូលំទូលាយការកាត់បន្ថយសំណល់ប្លាស្ទិកនៅកម្ពុជាតាមគោលការណ៍ស្ម័គ្រចិត្ត ក៏ដូចជាជំរុញការអនុវត្តអនុក្រឹត្យរបស់រាជរដ្ឋាភិបាលស្តីពីការគ្រប់គ្រងថង់ប្លាស្ទិក
២-ជំរុញ និងលើកទឹកចិត្តដល់អាជីវករឱ្យបញ្ឈប់ជាអចិន្ត្រៃយ៍ នូវការផ្តល់ថង់ប្លាស្ទិកដោយមិនគិតថ្លៃដល់អតិថិជន
៣-ចូលរួមចំណែកលើកស្ទួយជីវភាពរស់នៅរបស់ប្រជាជននៅតាមសហគមន៍ផលិតកន្ត្រកកញ្ចោរ។
ក្រសួងបរិស្ថានរំពឹងថា ប្រជាពលរដ្ឋនៅក្នុងទីប្រជុំជន និងអ្នកលក់ដូរនៅតាមផ្សារចាប់ផ្ដើមយល់ដឹងពីបញ្ហាបរិស្ថានដែលកើតមានឡើងដោយសារការប្រើប្រាស់ប្លាស្ទិកច្រើនលើសលប់ ផ្លាស់ប្តូរទម្លាប់របស់ប្រជាពលរដ្ឋពីការប្រើប្រាស់ថង់ផ្លាស្ទិកច្រើន មកជាការប្រើប្រាស់កន្ត្រងបរិស្ថានដែលធ្វើឡើងពី កញ្ចោរ ផ្ដៅ ឬ ក្រណាត់ និងតាមវិធីផ្សេងៗទៀតដើម្បីកាត់បន្ថយការប្រើប្រាស់ថង់ផ្លាស្ទិកនៅតាមទីប្រជុំជនសំខាន់ៗ។
អត្ថបទ និង រូបភាព ៖ លោក យូ វង្ស និង លោក ស៊ាន សុផាត
កែសម្រួលអត្ថបទ៖ លោក សេង ផល្លី
