ជំងឺគ្រុនឈាម បានផ្ទុះឡើងខ្លាំង នៅក្នុងតំបន់មជ្ឈមណ្ឌលយោធិនពិការសម្តេចតេជោហ៊ុនសែន៣១៧ គូលែន សៀមរាប។ ប៉ុន្តែប្រធានមណ្ឌលសុខភាពនៅទីនោះនិយាយថា អ្នកជំងឺទាំងនោះភាគច្រើនជាអ្នកមានរោគសញ្ញាគ្រុនឈាមដំបូង ។
ថ្លែងតាមទូរស័ព្ទនារសៀលថ្ងៃទី២៨ ខែកក្កដា ឆ្នាំ២០១៩នេះ លោកហឿន ផានី ប្រធានមណ្ឌលសុខភាព៣១៧ គូលែន បានឲ្យដឹងថា ចាប់តាំងពីមានជំងឺគ្រុនឈាមផ្ទុះឡើង មានអ្នកជំងឺប្រមាណជាង១០០នាក់ហើយ បានមកទទួលការព្យាបាលនៅក្នុងមជ្ឈមណ្ឌល ជាពិសេសកាលពីប៉ុន្មានថ្ងៃមុន មណ្ឌលសុខភាពទទួលអ្នកជំងឺមកព្យាបាលមិនក្រោម៣០ទៅ៤០នាក់ទេ ក្នុងមួយថ្ងៃៗ ។ “២ថ្ងៃនេះស្រាកបន្តិច មួយថ្ងៃមានតែ២០នាក់អីទេ បើកាលពីប៉ុន្មានថ្ងៃមុនក្នុងមួយថ្ងៃពី៣០ទៅ៤០នាក់”។
បច្នប្បន្ននៅមណ្ឌលសុខភាព៣១៧ គូលែន សៀមរាប មានគ្រូពេទ្យព្យាលបាលត្រឹមតែបីនាក់ប៉ុណ្ណោះ។ ក្រៅពីយោធិនពិការ និងក្រុមគ្រួសាររបស់ពួកគាត់ដែលរស់នៅក្នុងមជ្ឈមណ្ឌលយោធិនពិការនេះ ប្រជាពលរដ្ឋដែលរស់នៅជុំវិញមជ្ឈមណ្ឌល ក៏មកទទួលសេវានៅក្នុងមណ្ឌលសុខភាពនេះដែរ ។
លោកហឿន ផានី បានត្អូញត្អែរថា គ្រូពេទ្យរបស់គាត់មានការនឿយហត់ខ្លាំងដោយសារតែមានគ្រូពេទ្យតិចតួច ។ ប៉ុន្តែទោះជាយ៉ាងណាក៏ពួកគាត់ខិតខំព្យាបាលអ្នកជំងឺយ៉ាងអស់ពីសមត្ថភាព ។
បើទោះជាយ៉ាងនេះក្តីលោកហឿន ផានី បញ្ជាក់ថា រហូតមកដល់ពេលនេះ មិនទាន់មានអ្នកជំងឺគ្រុនឈាមណាម្នាក់រងគ្រោះថ្នាក់ដល់ជីវិតឡើយ ដោយសារថា មុនពេល និងអំឡុងពេលផ្ទុះជំងឺគ្រុនឈាមនេះ ខាងមណ្ឌលសុខភាព ក៏ដូចជាផ្នែកពាក់ព័ន្ឌ បានចុះផ្សព្វផ្សាយអប់រំដល់ប្រជាពលរដ្ឋបានទាន់ពេលវេលា ។ ” យើងបានប្រាប់គាត់មុន ថាបើក្តៅខ្លួនលើសពី៣៨អង្សារ ត្រូវប្រញ៉ាប់ទៅជួសឈាមមើលមេរោគ ។ ដូច្នេះពួកគាត់សុទ្ធសឹងតែយល់ដឹង គាត់មកភ្លាមៗ ហើយបើអ្នកឈឺធ្ងន់យើងបញ្ជូនគាត់ទៅពេទ្យខេត្ត”។
ពាក់ព័ន្ធករណីនេះ ប្រធានមន្ទីរសុខាភិបាលខេត្តសៀមរាប លោកក្រុស សារ៉ាត់ បានឲ្យដឹងថា ខាងមន្ទីរមានគម្រោង នឹងចុះទៅបាញ់ថ្នាំនៅតំបន់នោះ នៅរសៀលថ្ងៃទី២៩ ខែកក្កដា ឆ្នាំ២០១៩ស្អែកនេះ ។
សូមរំលឹកថា តាមរបាយការណ៍របស់មន្ទីរសុខាភិបាលខេត្ត កាលពីដើមខែកក្កដា ឆ្នាំ២០១៩កន្លងមកនេះ មានអ្នកជម្ងឺគ្រុនឈាម ដែលបានបញ្ជូនពីបណ្តាខេត្តផ្សេៗ មកប្រើសេវាព្យាបាលតាមមន្ទីរពេទ្យនានា នៅខេត្តសៀមរាប មានចំនួន១១,២២៣នាក់ ក្នុងនោះមានអ្នកគ្រុនឈាមចំនួន ១១នាក់បានស្លាប់ ស្មើនឹងអត្រា ០.០៩% ៕
អត្ថបទ និងរូបភាព:លោកជា ស្រស និងខេង ឧត្តម កែសម្រួលដោយលីវ សុខុន !!!
