នៅថ្ងៃទី២៩ ខែកក្កដា ឆ្នាំ២០១៩នេះ ក្រុមការងារចំរុះនៃរដ្ឋបាលខេត្តសៀមរាប និងប្រតិបត្តិករទូរគមនាគមន៍នានាក្នុងខេត្តដឹកនាំដោយលោកស្រី យូ សុភា អភិបាលរងខេត្ត បានបន្តចុះអនុវត្តការកាត់ខ្សែកាបអាកាសមកប្រើខ្សែកាបអុបទិកក្រោមដីវិញ លើកំណាត់ផ្លូវទី១១ ចាប់ផ្តើមពីផ្លូវជាតិលេខ៦ មុខសណ្ឋាគារអង្គរអេរ៉ា មកដល់ស្ពានមុខព្រះរាជដំណាក់ រួចវិលទៅផ្លូវម្ខាងទៀត ពីស្ពានថ្មព្រះរាជដំណាក់រហូតទៅដល់សណ្ឋាគារអង្គរអេរ៉ាវិញ ។
លោកសុខ សីហា ប្រធានមន្ទីរប្រៃសណីយ៍និងទូរគមនាគមន៍ខេត្ត មានប្រសាសន៍ថា យោងតាមសេចក្តីជូនដំណឹងលេខ ៥៣៣/១៨ សជណ របស់រដ្ឋបាលខេត្តសៀមរាប ចុះថ្ងៃទី១១ខែឧសភា ឆ្នាំ២០១៨ ស្តីពីការរៀបចំសោភ័ណភាពសណ្តាប់ធ្នាប់ និងរបៀបរៀបរយសាធារណៈ បណ្តាញខ្សែកាបអាកាសក្នុងក្រុងសៀមរាប រដ្ឋបាលខេត្តបានបង្កើតក្រុមការងារចម្រុះ ដើម្បីអនុវត្តការងារនេះ ហើយយើងបានអនុវត្តគិតចាប់ពីជំហានទី១ ដល់ជំហានទី១០ ដោយបានចាប់ផ្តើមអនុវត្តក្នុងមួយជំហានៗ ប្រើប្រាស់ពេលវេលាប្រមាណជាមួយខែ ឬលើសមួយខែ ទៅតាមស្ថានភាពជាក់ស្តែងនៃការងារ ជារួមយើងចាប់ផ្តើមអនុវត្ត ពីថ្ងៃទី១៦ ខែ សីហា ឆ្នាំ២០១៨ដល់ថ្ងៃទី២៤ ខែមិថុនាឆ្នាំ២០១៩ សរុបជាលទ្ឋផលសរុប ក្រុមការងារចុះអនុវត្តបាន ចំនួន១០លើក ស្មើនឹងប្រវែង ៤៤.៣០៥ ម៉ែត្រ តែយ៉ាងណាក៏ដោយ ក៏យើងនៅជួបបញ្ហាបញ្ហាប្រឈមខ្លះ ដោយសារតែបណ្តាញខ្សែភ្លើងអគ្គិសនីឆ្លងកាត់ផ្លូវ និងខ្សែភ្លើងស្របផ្លូវចូលផ្ទះប្រជាពលរដ្ឋ នៅមិនទាន់រៀបរយបានល្អនៅឡើយ ។
លោកស្រី យូ សុភា អភិបាលរងខេត្ត មានប្រសាសន៍ថា នេះមិនមែនជាលើកទី១នោះទេ ដែលក្រុមការងារចម្រុះរដ្ឋបាលខេត្តជួបប្រជុំគ្នា ដើម្បីកាត់ទម្លាក់ខ្សែកាបអាកាសគ្រប់ប្រភេទនៅតាមដងផ្លូវសាធារណៈ ក្នុងបំណងកែលំអសោភ័ណភាពក្រុងសៀមរាបរបស់យើង និងដើម្បីរក្សាបាននូវសុខសុវត្ថិភាព សណ្តាប់ធ្នាប់សាធារណៈនៅតាមដងផ្លូវ ព្រោះថា ខេត្តសៀមរាបយើង ជាខេត្តគោលដៅទេសចរណ៍ដ៏ទាក់ទាញ និងមានសក្តានុពល ដែលភ្ញៀវទេសចរជាតិ និងអន្តរជាតិ កំពុងទទួលការចាប់អារម្មណ៍ ដូចនេះ ដើម្បីកែលំសោភ័ណភាពក្រុងសៀមរាបរបស់យើង ទទួលបានកំណើនទេសចរណ៍បន្ថែមទៀត ទាមទារចាំបាច់យើងទាំងអស់ត្រូវសហការរួមគ្នា រៀបចំកែលំអនូវហេដ្ឋារចនាសម្ព័ន្ឋ ក៏ដូចជារៀបចំនូវសន្តិសុខ សណ្តាប់ធ្នាប់របៀបរៀបរយសាធារណៈបានល្អ ។
លោក ស្រី យូ សុភា មានប្រសាសន៍ទៀតថា ក្នុងនាមអាជ្ញាធរនិងថ្នាក់ដឹកនាំខេត្ត សូមអំពាវនាវដល់បងប្អូនប្រជាពលរដ្ឋ ដែលមានលំនៅដ្ឋាននៅអមសងខាងតាមបណ្តោយផ្លូវជាតិលេខ៦ និងអ្នកដែលកំពុងប្រើប្រាស់បណ្តាញខ្សែកាបនានា សូមមេត្តាអធ្យាស្រ័យ និងយោគយល់ ព្រោះការកាត់ទម្លាក់ខ្សែកាបអាកាស នេះអាចនឹងមានការរអាក់រអួលដល់ការប្រើប្រាស់ ប៉ុន្តែនៅពេលក្រុមការងារអនុវត្តតាមគម្រោងផែនការហើយ ប្រតិបត្តិករនៃបណ្តាក្រុមហ៊ុនខ្សែកាបនានា នឹងភ្ជាប់ប្រព័ន្ឋប្រើប្រាស់ក្រោមដីជូនបងប្អូនវិញ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
