នៅព្រឹកថ្ងៃទី២៩ ខែកក្កដា ឆ្នាំ២០១៩នេះ មានពិធីបិទវគ្គបណ្តុះបណ្តាល និង ប្រគល់វិញ្ញាបនបត្រជូនដល់មគ្គុទ្ទេសក៍ទេសចរណ៍ចម្រុះភាសា ថ្នាក់ជាតិជំនាន់ទី៤ និងសិក្ខាកាមមគ្គុទ្ទេសក៍ទេសចរណ៍ថ្នាក់តំបន់សៀមរាប ជំនាន់ទី២៥ និងជំនាន់ទី២៦ សរុបចំនួន ៦៩៤នាក់។
មានប្រសាសន៍នៅក្នុងសាកលវិទ្យាល័យសៅស៍អ៊ឹសថ៍អេយសៀ (USEA) ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានឲ្យដឹងថា ការបណ្តុះបណ្តាលមគ្គុទ្ទេសក៍ទេសចរណ៍ រួមនិងឯកសារសិក្សា ត្រូវបានក្រសួងទេសចរណ៍ធ្វើការរៀបចំយ៉ាងហ្មត់ចត់ រីឯការប្រឡងត្រូវបានចូលរួមពីគ្រប់ភាគីពាក់ព័ន្ធ ដូចជាអង្គភាពប្រឆាំងអំពើពុករលួយ សមាគមមគ្គុទ្ទេសក៍ទេសចរណ៍ និងអ្នកសារព័ត៌មាន ទៅតាមយន្តការដែលបានដាក់ចុះ។ សិក្ខាកាមដែលទទួលបានវិញ្ញាបនបត្របញ្ជាក់ការសិក្សានាពេលនេះ ត្រូវបានឆ្លងកាត់ការប្រឡងយ៉ាងតឹងតែងបំផុត ដែលទាំងនោះវាបានឆ្លុះបង្ហាញថា សញ្ញាបត្រទាំងនេះ កើតចេញពីសមត្ថភាពពិតរបស់សិក្ខាកាម ។
ឯកឧត្តម មានប្រសាសន៍ឲ្យគូសបញ្ជាក់ថា ៖ អ្នកប្រកបមុខរបរវិជ្ជាជីវៈជាមគ្គុទ្ទេសក៍ទេសចរណ៍ ត្រូវតែស្ថិតក្រោមស្មារតីនៃអនុក្រឹត្យ ស្តីពីមគ្គុទ្ទេសក៍ទេសចរណ៍ ដែលតម្រូវឲ្យមានការគ្រប់គ្រងច្បាស់លាស់ដោយអាជ្ញាធរមានសមត្ថកិច្ច ហើយមគ្គុទ្ទេសក៍ទេសចរណ៍ក៍ត្រូវបំពេញតួនាទីស្របតាមច្បាប់កំណត់ផងដែរ ។ ក្នុងស្មារតីនៃការពង្រឹងគុណភាពនិងការគ្រប់គ្រងមគ្គុទ្ទេសចរក៍ទេសចរណ៍ ក្រសួងបានដាក់ចុះនូវប្រព័ន្ធត្រួតពិនិត្យមគ្គុទ្ទេសក៍ទេសចរណ៍តាមប្រព័ន្ធ QR Code លើប័ណ្ណសំគាល់ខ្លួន និងវិញ្ញាបនបត្របណ្ដុះបណ្ដាលផងដែរ ។ ជាមួយគ្នានេះ ក្រសួងបានដាក់ចុះឲ្យអនុវត្តក្រមសីលធម៌វិជ្ជាជីវៈ និងក្រមប្រតិបត្តិវិជ្ជាជីវៈមគ្គុទ្ទេសក៍ទេសចរណ៍ សំដៅលើកកម្ពស់គុណភាពសេវាកម្មមគ្គុទ្ទេសក៍ទេសចរណ៍ កាន់តែខ្លាំងឡើងថែមទៀត ។
សូមជម្រាបថា សិក្ខាកាម ដែលទទួលបានវិញ្ញាបនបត្រមគ្គុទ្ទេសក៍ទេសចរណ៍ ចំនួនសរុប ៦៩៤នាក់នេះ ក្នុងនោះ សិក្ខាកាមមគ្គុទេសក៍ទេសចរណ៍ថ្នាក់ជាតិ ជំនាន់ទី៤ ចំនួន៥០នាក់ សិក្ខាកាមមគ្គុទេសក៍ទេសចរណ៍ថ្នាក់តំបន់សៀមរាប ជំនាន់ទី២៥ ចំនួន ៣០៤នាក់ និងជំនាន់ទី២៦ ចំនួន ៣០៤នាក់ ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
