បណ្ដាញលូមេសម្រាប់ប្រមូលទឹកកខ្វក់ក្នុងក្រុងសៀមរាប សរុបប្រវែង ៣.៧គីឡូម៉ែត្រ និងមុខកាត់ ១ម៉ែត្រ ដោយប្រើថវិកាអស់ជិត១៤ លានដុល្លារអាមេរិក ដែលបានចាប់ផ្ដើមដំណើរការសាងសង់កាលពីខែមេសា ឆ្នាំ២០១៩កន្លងមក គិតត្រឹមដំណាច់ខែកក្កដា ឆ្នាំ២០១៩នេះ គម្រោងកែលម្អបណ្ដាញលូមេប្រមូលទឹកកខ្វក់នេះសម្រេចបាន១៣.៦២%ហើយ ។ គម្រោងនេះបាននឹងកំពុងអនុវត្តតាមបណ្ដោយផ្លូវលេខ២៦៧ មុខវត្តចក និងឆ្ពោះមកផ្លូវស៊ីវត្ថា រហូតទៅដល់មុខសណ្ឋាគារសុខាអង្គរ ដោយប្រើបច្ចេកវិទ្យាខួងបំពង់ក្រោមដី ដែលមានជម្រៅពី៣ ទៅ ៨ម៉ែត្រ។ ក្រោមគោលនយោបាយរបស់រាជរដ្ឋាភិបាលកម្ពុជា ក្រសួងសាធារណការ និងដឹកជញ្ជូន ជាអ្នកអនុវត្តគម្រោង ហើយផ្តល់សិទ្ធសាងសង់ឲ្យក្រុមហ៊ុនBeijing Urban Construction Group (BUCG) នៃសាធារណរដ្ឋប្រជាមានិតចិន និងសហការសម្របសម្រួលដោយមន្ទីរសាធារណការ និងដឹកជញ្ជូនខេត្តសៀមរាប ក្រោមឥណទានថវិកាកម្ចីរបស់ធនាគារអភិវឌ្ឍន៍អាស៊ី ADB ។ ក្នុងគោលបំណងកែលំអ ពង្រីកសមត្ថភាពប្រមូលទឹកកខ្វក់ ក្នុងក្រុងសៀមរាបរាប ហើយធ្វើការចម្រោះឲ្យបានល្អប្រសើរមុននឹងបង្ហូរទៅចូលបឹង ស្ទឹងធម្មជាតិ ។
លោកគឹម ប៉ុណ្ណា ប្រធានមន្ទីរសាធារណការ និងដឹកជញ្ជូនខេត្តសៀមរាប បានឲ្យដឹងនៅល្ងាចថ្ងៃអាទិត្យទី២៨ ខែកក្កដានេះថា គម្រោងសាងសង់នេះនឹងសម្រេចឲ្យរួចរាល់នៅខែសីហា ឆ្នាំ២០២០ខាងមុខ ដោយមានសមត្ថភាពគ្របដណ្ដប់ទូទាំងក្រុងសៀមរាប សម្រាប់ឆ្នាំ២០២០ ដល់ឆ្នាំ២០៤០ ក្នុងករណីក្រុងសៀមរាប មានការអភិវឌ្ឍលើសពីនេះទៀតនៅក្រោយឆ្នាំ២០៤០នឹងធ្វើការកែលម្អបន្ថែមទៀត តាមការចាំបាច់។
លោកអ៊ឺម វិបុល មន្ត្រីបច្ចេកទេសនៃមន្ទីរសាធារណការនិងដឹកជញ្ជូនខេត្ត បានបញ្ជាក់ថា ប្រសិទ្ធិភាពនៃការធ្វើប្រព្រឹត្តិកម្មនេះ បម្លែងពីទឹកបម្ពុល ឬទឹកកខ្វក់ឲ្យទៅជាធម្មតាដែលអាចបង្ហូរចូលទៅក្នុងស្ទឹង បឹងធម្មជាតិ ហើយប្រើប្រាស់បានតែមិនអាចបរិភោគបានឡើយ ។
លោកអ៊ឺម វិបុល បានបន្ថែមថា គម្រោងនេះគ្រាន់តែជាជំហានដំបូងប៉ុណ្ណោះ នៅពេលក្រុងសៀមរាប មានការវិវត្តន៍បន្ថែមលើសពីតម្រូវការទៀតនោះ ក្រោយឆ្នាំ២០៤០ និងពង្រីកបន្ថែមទៀត ពីព្រោះថា ខេត្តសៀមរាប ជាខេត្តមួយស៊ីវីល័យដែលមានភ្ញៀវទេសចរជាតិ និងអន្តរជាតិ ចូលមកទស្សនាកំសាន្តកើនឡើងជាលំដាប់ ដូច្នេះដើម្បីធានាសុខុមាលភាពប្រជាពលរដ្ឋ ក៏ដូចជាភ្ញៀវទេសចរណ៍ជាតិ អន្តរជាតិ និងលើកកំពស់អនាម័យ បរិស្ថានក្រុងសៀមរាបទាំងមូលដែលជាក្រុងទេសចរណ៍ វប្បធម៌ ប្រវត្តិសាស្ត្រល្អស្អាតនោះទើបរដ្ឋាភិបាល និងអាជ្ញាធរខេត្ត បានយកចិត្តទុកដាក់ជម្រុញឲ្យមានគម្រោងនេះឡើងប្រកបដោយជោគជ័យ និងប្រសើរជាទីបំផុត ។
ប្រភព និងរូបភាពមន្ទីរសាធារណការ និងដឹកជញ្ជូនខេត្ត : អត្ថបទដោយលីវ សុខុន !!!
