គ្រួសារអ្នករស់នៅជាមួយមេរោគអេដស៍ ចំនួន ១២គ្រួសារ ស្ថិតក្នុងស្រុកស្រីស្នំ ខេត្តសៀមរាប ទទួលអំណោយសប្បុរស ពីសាខាកាកបាទក្រហមកម្ពុជា ខេត្តសៀមរាប នៅថ្ងៃទី ២៦ ខែកក្កដា។
មានប្រសាសន៍សំណេះសំណាលសួរសុខទុក្ខ ជាមួយបងប្អូនអ្នករស់នៅជាមួយមេរោគអេដស៍ក្នុងឱកាសនោះ លោកជំទាវ សុខ ណារ៉ូ ពៅ ហេង អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប តំណាងឯកឧត្តម ទៀ សីហា ប្រធានគណៈកម្មាធិការសាខា បានបង្ហាញពីការយកចិត្តទុកដាក់ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងនាមសម្ដេចជា ឥស្សរជនឆ្នើមថ្នាក់ជាតិនៃវេទិការភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ចំពោះការឆ្លើយតបមេរោគអេដស៍-ជំងឺអេដស៍ នៅកម្ពុជា សម្ដេចបានខិតខំប្រឹងប្រែង ក្នុងបុព្វហេតុវិស័យមនុស្សធម៌ ជួយសង្គ្រោះជីវិតមនុស្ស ដោះស្រាយភាពខ្វះខាត និងទុក្ខលំបាករបស់ជនរងគ្រោះ និងជនងាយរងគ្រោះ ក្នុងន័យជួយពន្លឿនការកាត់បន្ថយអត្រាភាពក្រីក្រ អភិវឌ្ឍន៍សហគមន៍ និងការលើកកម្ពស់កម្រិតជីវភាពរស់នៅរបស់ប្រជាពលរដ្ឋក្នុងមូលដ្ឋានរាជធានីភ្នំពេញ ឱ្យកាន់តែមានភាពប្រសើរឡើង។
លោកជំទាវ ក៏បានធ្វើការលើកទឹកចិត្តដល់បងប្អូនទាំងអស់ កុំឲ្យអស់ក្តីសង្ឃឹមព្រោះជំងឺអេដស៍នាពេលបច្ចុប្បន្ន យើងមានថ្នាំប្រឆាំង ឲ្យតែបងប្អូនគោរពបានទៅតាមវេជ្ជបញ្ជារបស់គ្រូពេទ្យ និង ថែរក្សាសុខភាពខ្លួនឲ្យបានល្អ នោះយើងនឹងមានសុខភាពល្អដូចពលរដ្ឋទូទៅដែរ។
ឆ្លៀតក្នុងឱកាសនោះ លោកជំទាវក៏បានក៏បានអំពាវនាវ ដល់ប្រជាពលរដ្ឋទាំងអស់ បច្ចុប្បន្ននេះជារដូវភ្លៀងធ្លាក់សម្បូរដោយជំងឺផ្សេងៗ ពិសេសជម្ងឺគ្រុនឈាម ដែលបង្កឡើងដោយមូសខ្លា ហេតុនេះសូមបងប្អូនប្រុងប្រយ័ត្ន ចំពោះសុខភាពខ្លួនឯង និងកូនចៅតូចៗ ដោយត្រូវសម្រាកក្នុងមុង និងស្លៀកពាក់ខោអាវវែងៗជាប្រចាំ ។ បើសិនជាឃើញសភាពមិនស្រួល ឬមានជំងឺគ្រុនក្ដៅចាប់ពី៣ថ្ងៃឡើងទៅ ត្រូវប្រញាប់ទៅមន្ទីរពេទ្យ ឬមណ្ឌលសុខភាពដែលនៅជិតបងប្អូនជាបន្ទាន់។
សូមជម្រាបថា អំណោយមនុស្សធម៌ដែលបានផ្ដល់ជូននាពេលនោះ ក្នុងមួយគ្រួសារទទួលបាន៖ – មុង១ – ភួយ១ – សារុង១ – ក្រមា១ – មី១កេស – ត្រីខ១យួរ – ទឹកត្រី១យួរ – ទឹកដោះគោខាប់៣កំប៉ុង – ស្ករស១គីឡូក្រាម – អង្ករ៣០គីឡូក្រាម -អាវយឺត២ និងថវិកា ៤ម៉ឺនរៀលផងដែរ ៕
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ៖ លោក សេង ផល្លី
