សាលាបឋមសិក្សា មានជ័យ ស្ថិតក្នុងភូមិមានជ័យ ឃុំស្រណាល ស្រុកក្រឡាញ់ ខេត្តសៀមរាប ទទួលបានអគារសិក្សាថ្មី១ខ្នងមាន៥បន្ទប់ ជាអំណោយរបស់ឯកឧត្តម អ្នកឧកញ៉ា សៀង ណាំ និងលោកជំទាវ ព្រមទាំងសម្បុរសជន ត្រូវបានសម្ពោធដាក់អោយប្រើប្រាស់ជាផ្លូវការ នៅព្រឹកថ្ងៃទី២៧ខែកក្កដាឆ្នាំ២០១៩នេះ។
បើតាមការឲ្យដឹងពី លោកស្រី ម៉ននី រង្សី អភិបាលស្រុកក្រឡាញ់ នៅក្នុងស្រុកក្រឡាញ់ មានអគារសិក្សាសរុបចំនួន ១០៣ខ្នង ស្មើនឹង ៤៣៤បន្ទប់ ក្នុងនោះក៏មានអគាសិក្សា ដែលជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចគិត្តិព្រឹទ្ធបណ្ឌិត ប៊ុន រានី ហ៊ុន សែន មានចំនួន ១៥ខ្នង ស្មើនឹង ៨២បន្ទប់អគាសិក្សា អំណោយរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មានចំនួន ០២ខ្នង ស្មើនឹង១០បន្ទប់ និងអំណោយរបស់ ឯកឧត្តម អ្នកឧកញ៉ា សៀង ណាំតំណាងរាស្ត្រមណ្ឌលសៀមរាប និងសប្បុរសជនជប៉ុនមានចំនួន ៤៨ខ្នង ស្មើនឹង ១៤១បន្ទប់ ។
មានប្រសាសន៍សំណេះសំណាលនាពេលនោះដែរ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានមានប្រសាសន៍ថា ការងារអប់រំជាគន្លឹះមួយយ៉ាងសំខាន់បំផុត ក្នុងការកសាងធនធានមនុស្ស ដែលសង្គមទាំងមូល ត្រូវតែចូលរួមវិនិយោគឲ្យបានខ្លាំងក្លា។ ជាមួយនោះការអប់រំ ត្រូវប្រើប្រាស់ពេលវេលាយូរ ការអត់ធ្មត់ និង កបដោយការប្រុងប្រយ័ត្នបំផុត។
ឯកឧត្តម អ្នកឧកញ៉ា សៀងណាំ បានបន្តទៀតថា ក្រោមដំបូលគោលនយោបាយ ឈ្នះ ឈ្នះ របស់ សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំមកនូវសន្តិភាព ស្ថិរភាព សន្តិសុខ និង ការអភិវឌ្ឍលើគ្រប់វិស័យពេញផ្ទៃប្រទេស និយាយជារួម នៅក្នុងស្រុកក្រឡាញ់ មានការអភិវឌ្ឍន៍គួរឲ្យកត់សម្គាល់ពីមួយថ្ងៃទៅមួយថ្ងៃ ក្រោមកិច្ចប្រឹងប្រែងរួមគ្នាផងដែរ ។ ជាក់ស្តែងពិធីសម្ពោធដាក់ឲ្យប្រើប្រាស់អគារសិក្សា ០១ខ្នង នាពេលនេះ គឺពិតជាបានបង្កលក្ខណៈងាយស្រួលនិងផ្តល់ឱកាសឲ្យក្មួយៗ កុមារា កុមារី មានថ្នាក់រៀនគ្រប់គ្រាន់ និងសមរម្យ ស្របតាមទិសស្លោកថា “ ក្នុងសម័យសម្តេចតេជោសែន សាលារៀនរត់មក រកសិស្ស ” ។
អត្ថបទ និង រូបភាព ៖ លោក ទ្រា ពន្លឺ
កែសម្រួលអត្ថបទ៖ លោក សេង ផល្លី
