គណៈបញ្ជាការឯកភាពរដ្ឋបាលខេត្តសៀមរាបបានបើកកិច្ចប្រជុំប្រចាំខែកក្កដា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្ត និងជាប្រធានគណ:បញ្ជាការឯកភាពរដ្ឋបាលខេត្ត ដោយមានការចូលរួមពី លោក លី សំរិទ្ធ អភិបាលរងខេត្តនិងជាអនុប្រធានគណៈបញ្ជាការ លោកនាយក នាយករងរដ្ឋបាលសាលាខេត្តលោកប្រធានសាលាដំបូងព្រះរាជអាជ្ញាអមសាលាដំបូងមេបញ្ជាការមេបញ្ជាការរងកងកម្លាំងប្រដាប់អាវុធ អភិបាល អភិបាលរងក្រុង ស្រុក ថ្នាក់ដឹកនាំមន្ទីរអង្គភាពពាក់ព័ន្ធក្នុងខេត្តទាំងអស់ ដើម្បីបូកសរុបលទ្ធផលការងារសន្តិសុខ សណ្តាប់ធ្នាប់ទូទៅក្នុងខេត្តសៀមរាប ។
ក្នុងកិច្ចប្រជុំនោះមានរបៀបវារ:សំខាន់ចំនួន៣ ដូចជា÷
១- ពិនិត្យ ពិភាក្សាការងារសន្តិសុខ សណ្ដាប់ធ្លាប់ទូទៅនៅក្នុងខេត្តសៀមរាប។
២- បទល្មើសធនធានធម្មជាតិ ព្រៃឈើ និងបទល្មើសផ្សេងៗ ។
៣- បញ្ហាផ្សេងៗ (ការចូលរួមមតិយោបល់ស្ថាប័ន អង្គភាពពាក់ព័ន្ធ )។
មានប្រសាសន៍បើកអង្គប្រជុំឯកឧត្តម ប្រធានគណៈបញ្ជាការ បានលើកឡើងថា: ខេត្តសៀមរាប ជាខេត្តមួយមានសក្តានុពលខាងផ្នែកវិស័យទេសចរណ៍ ដែលមានភ្ញៀវជាតិ និងអន្តរជាតិជាច្រើនចូលចេញមកទស្សនា នូវប្រាង្គប្រាសាទ និងតំបន់រមណីយដ្ឋាននានាជាច្រើន ដូច្នេះរដ្ឋបាលខេត្តត្រូវយកចិត្តទុកដាក់ឲ្យបានខ្ពស់បំផុត ក្នុងការរៀបចំសន្តិសុខសណ្ដាប់ធ្នាប់ជូនភ្ញៀវទេសចរណ៍ទាំងនោះនិងប្រជាពលរដ្ឋយើងឲ្យបានល្អប្រសើរផងដែរ ។ ក្នុងកិច្ចប្រជុំពេលនេះ ខ្ញុំសូមឱ្យអស់លោកជាសមាជិក សមាជិកា ចូលរួមលើកមតិយោបល់ និងបញ្ហានានាដែលកើតមាននៅក្នុងមូលដ្ឋានរបស់ខ្លួន ដើម្បីធ្វើការកែលម្អដកពិសោធន៍ និងរៀបចំផែនការការពារសន្តិសុខសណ្ដាប់ធ្នាប់ឲ្យកាន់តែល្អប្រសើរថែមទៀតតទៅថ្ងៃអនាគត ។
លោកឧត្តមសេនីយ៍ទោទិត្យ ណារ៉ុង ស្នងការនៃស្នងការដ្ឋាននគរបាលខេត្តបានឲ្យដឹងតាមរយៈរបាយការណ៍ដែលថាកន្លងមកការងារសន្តិសុខ សណ្ដាប់ធ្នាប់នេះ ស្នងការនគរបាលខេត្ត អនុវត្តនិងបំពេញតួនាទីបានយ៉ាងល្អប្រសើរ ក្នុងនោះ ដូចជាការបង្ក្រាបបទល្មើសតូចធំបទល្មើសគ្រឿងញៀន បទល្មើសចោរលួចចោរប្លន់ បទល្មើសសេដ្ឋកិច្ចផ្សេងៗ ។ ល។ បានជោគជ័យនិងគ្រប់ករណីទាំងអស់ ក៏ប៉ុន្តែរាល់ករណីទាំងអស់នោះ មិនត្រូវបានចប់រលត់ជាស្ថាពរនោះទេ មានន័យថានៅកើតមកជាថ្មីបន្តបន្ទាប់ទៀតតម្រូវឱ្យកម្លាំងសមត្ថកិច្ចយើងខិតខំយកចិត្តទុកដាក់អនុវត្តទៀតផងដែរ ។
លោកឧត្តមសេនីយ៍ទោទិត្យ ណារ៉ុង បានបន្តទៀតថា ក្នុងរយ:ពេល២ខែកន្លងមកនេះ កម្លាំងសមត្ថកិច្ចដែនបង្ក្រាបនៅបទល្មើសធំៗរួមមាន: ករណីគ្រឿងញៀន, ករណីចោរលួចចោរប្លន់, សហការបង្ក្រាបករណីជនជាតិចិននាំប្រាក់ដុល្លារខុសច្បាប់ជាច្រើនចូលមកកម្ពុជាតាមច្រកព្រលានយន្តហោះ ,បង្ក្រាបករណីជនជាតិចិនជំរិតទារលុយតាមអ៊ីនធឺណិត ,ការភ្នាល់ល្បែងតាមអ៊ីនធឺណិត , បង្ក្រាបករណីដឹកឈើស្តុកឈើខុសច្បាប់ជាច្រើនកន្លែងនៅក្នុងខែត្ត និងនិងសហការចុះបង្ក្រាបសិប្បកម្មលាយផ្សំវេចខ្ចប់ជីកសិកម្មគ្មានច្បាប់អនុញ្ញាតកាលពីពេលថ្មីៗនេះ ។
ឯកឧត្តម ទៀ សីហា មានមតិបិទអង្គប្រជុំដោយលើកឡើងថា សូមថ្លែងអំណរគុណដល់សមាជិក សមាជិកាទាំងអស់ ដែលបានលើកមតិយោបល់បញ្ហាប្រឈម បញ្ហាសន្តិសុខសណ្ដាប់ធ្នាប់ បញ្ហាវិវាទដីធ្លី និងបទល្មើសនានា ឲ្យរដ្ឋបាលខេត្តបានដឹងនិងបូកសរុបការងារសន្តិសុខនេះសំដៅធ្វើការកែលម្អនិងរៀបចំឲ្យបានល្អប្រសើរជូនខេត្តសៀមរាប តទៅថ្ងៃអនាគត ។ ក្នុងនោះដែរឯកឧត្តមបានអំពាវនាវទាំងអស់ឲ្យខិតខំយកចិត្តទុកដាក់បំពេញការងារដែលនៅសេសសល់នឹងបន្តកើតមានឡើងធ្វើយ៉ាងណាឲ្យខេត្តសៀមរាបប្រកបដោយសុខសុវត្ថិភាពជាទីបំផុត ពីព្រោះថាខេត្តសៀមរាបជាកន្លែងទេសចរណ៍បើការងារសន្តិសុខសណ្ដាប់ធ្នាប់មិនល្អប្រសើរទេភ្ញៀវទេសចរនឹងមានគ្រោះថ្នាក់នឹងបញ្ហាកើតឡើងផ្សេងៗមួយចំនួនទៀតហើយបញ្ហានេះនិងលេចឮទៅខាងក្រៅឬបរទេសគេនឹងឈប់មកកម្ពុជាជាមិនខាន ។
