នៅវេលាម៉ោង ៩ និង ០០នាទីព្រឹក ថ្ងៃទី០២ ខែសីហា ឆ្នាំ២០១៩នេះ មានអគ្គីភ័យមួយបានកើតឡើង នៅផ្ទះលក់គ្រឿងទេសមួយកន្លែង បណ្ដាលឲ្យឆេះស្ទើរតែក្លាយជាចំណីភ្លើង បន្ទាប់ពីម្ចាស់ផ្ទះបូមសាំងដាក់ដប កំពប់ហៀរទៅប៉ះចង្ក្រានដែលកំពុងដាំបាយ នៅចំនុចភូមិស្ទឹង ឃុំបាគង ស្រុកប្រាសាទបាគង ខេត្តសៀមរាប ។
តាមការឲ្យដឹងពីនគរបាលមូលដ្ឋានបានបញ្ជាក់ថា ម្ចាស់ផ្ទះរងគ្រោះមានឈ្មោះ ក្រូច ពូច ភេទស្រី អាយុ ៧៤ ឆ្នាំ មុនពេលកើតហេតុ គេឃើញម្ចាស់ផ្ទះ កំពុងបូមសាំងបញ្ចូលដបទុកលក់នៅក្បែរចង្គ្រាន្ត ក្នុងពេលកំពុងបូម ស្រាប់តែសាំងហៀរកំពប់ទៅប៉ះនឹងចង្ក្រានដែលកំពុងដាំបាយដែលនៅឆ្ងាយពីកន្លែងបូមសាំងប្រមាណជាង ៤ម៉ែត្រ ទើបបណ្ដាយឲ្យភ្លើងឆេះដល់ផ្ទះតែម្ដង។
បើតាមម្ចាស់ផ្ទះបានឲ្យដឹងថា ផ្ទះរបស់គាត់ជាប្រភេទវីឡាតឿទំហំ ៥ × ១២ ម៉ែត្រ កំពស់ ៤ ម៉ែត្រ ជញ្ជាំងថ្មប្រក់ក្បឿង ត្រូវខូចខាត៤០ % រួមជាមួយនឹងអីវ៉ាន់គ្រឿងទេស អស់ប្រមាណជា១៥០០ដុល្លាអាមេរិក៕
អត្ថបទ និង រូបភាព៖ជា ស្រស់, ខេង ឧត្តម
កែសម្រួល៖ អ៊ុន ណារាជ្យ
