សិក្ខាកាមនគរបាលអន្តរាគមន៍ព្រំដែនជំនាន់ទី២ ចំនួន៤៧០នាក់ ចំណុះឲ្យនាយកដ្ឋាននគរបាលព្រំដែនគោក នៃ អគ្គស្នងការដ្ឋាននគរបាលជាតិ បានបញ្ចប់វគ្គសិក្សារបស់ខ្លួន នាព្រឹកថ្ងៃទី០១ ខែសីហា ឆ្នាំ២០១៩នេះ នៅបញ្ជាការដ្ឋាន គណៈបញ្ជាការនគរបាលជាតិប្រចាំទិសភូមិភាគទី៤ ស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ។
តាមការបញ្ជាក់ពី នាយឧត្តមសេនីយ៍ ហ៊ូ សាគុណ អគ្គស្នងការរងនគរបាលជាតិ ប្រធាននាយកដ្ឋានកណ្តាលនគរបាលព្រំដែន និងជាគ្រូឧទ្ទសមួយរូបនៅក្នុងវគ្គបណ្តុះបណ្តាលនេះ បានបង្ហាញឲ្យដឹងថា ៖ កងកម្លាំងនគរបាលអន្តរាគមន៍ព្រំដែន បង្កើតឡើងដើម្បីជួយអន្តរាគមន៍ដល់អង្គភាពវរៈសេនាតូចនគរបាលការពារព្រំដែនទូទាំងប្រទេស ដែលមានភារកិច្ចរួមសហការជាមួយកងយោធពលខេមរភូមិន្ទ ការពារបូរណភាពទឹកដី និងអធិបតេយ្យជាតិ ទប់ស្កាត់ និងបង្ក្រាបសកម្មភាពបង្កចលនាបាតុកម្ម កុប្បកម្ម ដែលបង្កដោយពួកឧទ្ទាមក្រៅច្បាប់ និង បង្ក្រាបទប់ស្កាត់អំពើភេវរកម្មផ្សេងៗ សំដៅរក្សាសន្តិសុខសណ្តាប់ធ្នាប់ សេចក្តីសុខសាន្តជូនប្រជាពលរដ្ឋ ។
វគ្គបណ្តុះបណ្តាល ហ្វឹកហ្វឺន នគរបាលអន្តរាគមន៍ព្រំដែន ដែលមានរយៈពេល៣ខែកន្លងមកនេះ គឺជាវគ្គហ្វឹកហ្វឺនពិសេស នៅក្នុងបណ្តាវគ្គទាំង៩ ដែលបញ្ជាការដ្ឋាន គណៈបញ្ជាការនគរបាលជាតិប្រចាំទិសភូមិភាគទី៤ បានបើកបណ្ដុះបណ្ដាលជារៀងរាល់ឆ្នាំ និងបន្តបន្ទាប់ ដល់កងកម្លាំងនគរបាលការពារព្រំដែនទូទាំងប្រទេស ។
ព័ត៌មានជាតិ ថ្មីៗ
នៅក្នុងសេចក្តីសន្និដ្ឋាន នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ ប្រធានគណៈបញ្ជាការនគរបាលជាតិប្រចាំទិសភូមិភាគទី៤ និង ៥ បានវាយតម្លៃខ្ពស់ចំពោះលទ្ធផលនៃវគ្គបណ្តុះបណ្តាលនេះ ដែលធ្វើឲ្យពួកគេមានលទ្ធភាព និងសមត្ថភាពគ្រប់គ្រាន់ ក្នុងការអនុវត្តតួនាទី-ភារកិច្ចរបស់ខ្លួនយ៉ាងពិតប្រាកដ ។ នាយឧត្តមសេនីយ ខេង សុមេធ ក៏បានក្រើនរំលឹកទៅដល់សិក្ខាកាមទាំងអស់ ត្រូវខិតខំហ្វឹកហាត់ជំនាញ ដែលបានសិក្សាឲ្យបានជាប្រចាំ និង ត្រូវយកចំណេះដឹងដែលទទួលបាននេះ ទៅអនុវត្តន៍ក្នុងសកម្មភាពជាក់ស្ដែង និងតាមតួនាទីរបស់ខ្លួនឲ្យបានជោគជ័យ និង មានប្រសិទ្ធភាពខ្ពស់ ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
