លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប មានប្រសាសន៍ថា ដើម្បីបំពេញតម្រូវការ នៃការផ្តល់សេវាសុខភាពរបស់រដ្ឋជូនប្រជាពលរដ្ឋឱ្យបានគ្រប់គ្រាន់នោះ ឥឡូវនេះនៅមន្ទីរពេទ្យបង្អែកខេត្តសៀមរាប ចាប់ផ្តើមផ្តល់សេវាថែទាំ ពិនិត្យពិគ្រោះ និង ព្យាបាលជំងឺទូទៅរបស់កុមារនៅក្នុងមន្ទីរពេទ្យបង្អែកនេះតែម្តង ដោយមានក្រុមគ្រូពេទ្យជំនាញខាងកុមារ ដូចនៅមន្ទីរពេទ្យគន្ធបុប្ផា និងមន្ទីរពេទ្យកុមារអង្គរដែរ ហើយការចាប់ផ្តើមផ្តល់សេវាថែទាំ និងពិនិត្យពិគ្រោះព្យាបាលជំងឺទូទៅរបស់កុមារនេះ គឺដើម្បីបំពេញតម្រូវការរបស់ប្រជាពលរដ្ឋ ព្រោះថាកន្លងមក ប្រជាពលរដ្ឋតែងតែនិយាយថា នៅមន្ទីរពេទ្យបង្អែកខេត្ត មិនមានការផ្តល់សេវាសម្រាប់ជំងឺកុមារ ដែលតម្រូវឱ្យទៅតែមន្ទីរពេទ្យកុមារ តែឥឡូវនេះខាងមន្ទីរពេទ្យបានរៀបចំឱ្យមាន ដែលបានដំណើរការរយៈពេល១ខែកន្លងមកហើយ ហើយការព្យាបាលសម្រាប់កុមារនេះ គឺមិនយកលុយដូចនៅមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ។
លោកវេជ្ជបណ្ឌិត នួន បូរ៉ា ជំនាញឯកទេសខាងជំងឺកុមារ នៃមន្ទីរពេទ្យបង្អែកខេត្តសៀមរាប បានឱ្យដឹងថា សម្រាប់ការផ្តល់សេវាសុខភាពជំងឺទូទៅសម្រាប់កុមារនៅក្នុងមន្ទីរពេទ្យបង្អែកខេត្តសៀមរាបនេះ គឺយើងមានគ្រូពេទ្យជំនាញខាងកុមារចំនួន៣នាក់ ហើយគ្រូពេទ្យទាំងនេះសុទ្ធតែមានបទពិសោធន៍យូរឆ្នាំផ្នែកកុមារ និងធ្លាប់បម្រើការងារនៅមន្ទីរពេទ្យគន្ធបុប្ផា និង មន្ទីរពេទ្យកុមារអង្គរដែរ ដូច្នេះចាប់ពីពេលនេះទៅ សម្រាប់ប្រជាពលរដ្ឋដែលលោកគិតថា ទៅពិនិត្យជំងឺនៅមន្ទីរពេទ្យកុមារ មានកុមារច្រើន ឬចង្អៀតនោះ ប្រជាពលរដ្ឋអាចមកទទួលសេវាសុខភាពសម្រាប់កុមារបាននៅមន្ទីរពេទ្យបង្អែកខេត្តសៀមរាបនេះ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
