សំណង់ស្ពានបេតុងទី១ មួយកន្លែង ស្ថិតនៅក្នុងភូមិបត់ត្រង់ ឃុំសំបួរ ស្រុកក្រឡាញ់ ខេត្តសៀមរាប និង ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ឆ្លងកាត់ស្ទឹងស្រែង ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេចសាងសង់បានប្រមាណ៩០ភាគរយហើយ ។
សំណង់ស្ពានបេតុងនេះ មានបណ្តោយប្រវែង៤៤ម៉ែត្រ , មានទទឹងប្រវែង ៦ម៉ែត្រ និងមានកម្ពស់ប្រវែវ១២ម៉ែត្រ ដែលរាប់ពីបាតស្ទឹងដល់តួស្ពាន ហើយដែលអាចធានាការធ្វើចរាចរណ៍លើផ្លូវទឹកដោយទូកកាណូត ឆ្លងកាត់ក្រោមស្ពានបានក្នុងរដូវវស្សា ដែលស្ពាននេះ បានចាប់ផ្ដើមការសាងសង់នៅក្នុងអំឡុងខែមេសា ឆ្នាំ២០១៩នេះ ។
លោក តឹក សារិ វិស្វករនៃកងវិស្វកម្មសម្តេចតេជោ ហ៊ុន សែន ខេត្តសៀមរាប ដែលជាអ្នកគ្រប់គ្រងកិច្ចដំណើរការសាងសង់នៅការដ្ឋាននោះ បានឲ្យដឹងថា ៖ ស្ពានបេតុងនេះ គ្រោងនឹងបញ្ចប់ការដ្ឋាន ដាក់ឲ្យដំណើរការប្រើប្រាស់ នាដើមខែតុលា ឆ្នាំ២០១៩ខាងមុខ ការកសាងស្ពានបេតុងមួយនេះ គឺត្រូវបានភ្ជាប់ជាមួយនឹងការកសាងផ្លូវមួយខ្សែទៀតផងដែរ តភ្ជាប់ពីផ្លូវជាតិលេខ៦ ត្រង់ចំណុចទីរួមស្រុកក្រឡាញ់ ស្របតាមដងស្ទឹងស្រែង មកកាន់ឃុំសំបួរ ក្នុងស្រុកក្រឡាញ់ មានចម្ងាយប្រវែងជាង ១៦ គីឡូម៉ែត្រ ហើយផ្លូវនេះ កំពុងដំណើរការសាងសង់ជា២តំណាក់កាល គឺតំណាក់កាលទី១ ធ្វើការចាក់ក្រាលដីគ្រួសក្រហម និង ដំណាក់កាលទី២ គឺជាផ្លូវចាក់ក្រាលកៅស៊ូ ១០០ភាគរយ ។
ក្នុងឱកាសដែលចុះទៅពិនិត្យកិច្ចដំណើរការសាងសង់ស្ពាន កាលពីថ្ងៃទី០៧ ខែសីហា ឆ្នាំ២០១៩នេះ ឯកឧត្តមអ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប មានប្រសាសន៍ថា ស្ពាននេះ គឺជាសមិទ្ធផលថ្មីមួយទៀត ដែលជាអំណាយដ៏ថ្លៃថ្លារបស់សម្តេចតេជោ ហ៊ុន សែន ដែលបានផ្តល់ជូនប្រជាពលរដ្ឋស្រុកក្រឡាញ់ និង ស្រុកព្រះនេត្រព្រះ ជាមួយនឹងការផ្តល់អំណោយកសាងផ្លូវជាច្រើនខ្សែទៀតនារយៈពេលកន្លងមក ហើយស្ពាននេះ គឺជាស្ពានបេតុងទី១ ត្រូវបានស្ថាបនាឆ្លងកាត់ស្ទឹងស្រែង ដែលហូរកាត់ក្នុងភូមិសាស្ត្រ ស្រុកក្រឡាញ់ ខេត្តសៀមរាប និងជាដងស្ទឹងខណ្ឌចែកព្រំប្រទល់រវាងស្រុកក្រឡាញ់ ខេត្តសៀមរាប និង ស្រុកព្រះនេត្រព្រះ ខេត្តបន្ទាយមានជ័យ ។
ឯកឧត្តមអ្នកឧកញ៉ា សៀង ណាំ មានប្រសាសន៍បន្ថែមថា តាមរយៈនៃស្ពានបេតុងមួយនេះ ប្រជាពលរដ្ឋ នឹងទទួលបានអត្ថប្រយោជន៍ច្រើនយ៉ាង ដូចជាការធ្វើដំណើរ និង ការដឹកជញ្ជូនភោគផលដំណាំឆ្លងកាត់ស្ទឹង ដោយពុំមានក្តីបារម្ភអំពីហានីភ័យគ្រោះថ្នាក់ផ្សេងៗជាយថាហេតុ ដូចជាការចម្លងដោយទូក កាណូត នោះឡើយ ហើយដែលជាការដោះស្រាយក្តីព្រួយបារម្ភដ៏ធំដែរនោះ គឺសុវត្ថិភាព របស់សិស្សានុសិស្សកូនចៅប្រជាពលរដ្ឋឃុំប្រាសាទ ដែលត្រូវឆ្លងស្ទឹង ទៅរៀនសូត្រនៅភូមិបត់ត្រង់នេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
