នៅថ្ងៃទី០៧ ដល់ថ្ងៃ០៩ ខែសីហា ឆ្នាំ២០១៩ មន្ត្រី-បុគ្គលិកមកពីនាយកដ្ឋាននានាចំណុះឱ្យអាជ្ញាធរជាតិអប្សរា ចំនួន៣០នាក់ បានសិក្សាវគ្គបណ្ដុះបណ្ដាលលើជំនាញមូលដ្ឋានគ្រឹះផលិតវីដេអូខ្លី រយៈពេល៣ថ្ងៃ នៅមជ្ឈមណ្ឌលបណ្ដុះបណ្ដាលអង្គរ។
វគ្គបណ្ដុះបណ្ដាលនេះ រៀបចំឡើងក្នុងគោលបំណងបង្កើនចំណេះដឹងលើផ្នែកចងក្រងឯកសាររូបភាព ព្រមទាំងចេះវិភាគលើមុំសំខាន់ៗនៃខ្លឹមសាររួមដើម្បីរំលេចនូវខ្លឹមសារគោលមានភាពច្បាស់លាស់ ងាយយល់ ងាយស្តាប់។ ពិសេសការសរសេរអត្ថបទ ចាប់មុំសរសេរសាច់រឿង ចាប់មុំការមេរ៉ា និងបច្ចេកទេសថតដើម្បីយកមកផ្សព្វផ្សាយបម្រើដល់ស្ថាប័នអាជ្ញាធរជាតិអប្សរា។
ក្នុងវគ្គបណ្តុះបណ្តាលនេះដែរ ក្រៅពីសិក្សាទ្រឹស្តី នឹងតម្រូវឱ្យសិក្ខាកាមចុះអនុត្តជាក់ស្តែងក្នុងការផលិតវីដេអូខ្លីៗផងដែរ និងយកមកកាត់តវីដេអូរៀបចំជាសាច់រឿង ដើម្បីអាចឱ្យសិក្ខាកាមហ្វឹកហាត់ព្រមគ្នាដើម្បីឱ្យការផលិតវីដេអូនេះមានស្តង់ដារ និងគុណភាព ហើយគ្រូបង្គោលនៃវគ្គសិក្សានេះ គឺលោក ប៉ោយ ឈុនលី ស្ថាបនិកប៉ោយស្ទូឌីយោ និងបាយម៉ានហ្វៀម ដែលមានបទពិសោធន៍លើវិស័យផលិតកុនរយៈពេលជាង ១៣ឆ្នាំមកហើយ ។
ព័ត៌មានជាតិ ថ្មីៗ
ក្រោយពីបញ្ចប់វគ្គបណ្តុះបណ្តាលនេះ សិក្ខាកាមនឹងទទួលបានចំណេះដឹងមូលដ្ឋានគ្រឹះវីដេអូខ្លីៗ យល់ដឹងពីការបង្កើតវីដេអូខ្លីៗ យល់ដឹងពីការប្រើប្រាស់កាមេរ៉ា យល់ដឹងពីកម្មវិធីបង្កើតវីដេអូខ្លីៗ អាចបង្កើតវីដេអូខ្លីៗមានរយៈពេល២នាទី។
គួរឲ្យដឹងដែរថា អាជ្ញាធរជាតិអប្សរាដើរតួនាទីយ៉ាងសំខាន់ក្នុងការគ្រប់គ្រងថែរក្សារមណីយដ្ឋានអង្គរ ភារកិច្ចជាច្រើនដែលអាជ្ញាធរជាតិអប្សរាបាននិងកំពុងអនុវត្តទាំងលើកិច្ចការអភិរក្ស និងអភិវឌ្ឍន៍រមណីយដ្ឋានអង្គរប្រកបដោយចីរភាព ហើយរាល់សកម្មភាពអភិរក្ស និងអភិវឌ្ឍន៍ទាំងឡាយចាំបាច់ត្រូវបានផ្សព្វផ្សាយព័ត៌មានក្នុងទម្រង់ជារូបភាព និងជាវីដេអូអំពីសមិទ្ធិផល និងសកម្មភាពការងាររបស់អាជ្ញាធរជាតិអប្សរាឱ្យបានទូលំទូលាយទៅកាន់សាធារណៈជនទូទៅ ៕
អត្ថបទ និងរូបភាព៖ អ៊ិន សីហរិទ្ធ
កែសម្រួល៖ អ៊ុន ណារាជ្យ
