នៅថ្ងៃទី០៧ ខែសីហា ឆ្នាំ២០១៩ម្សិលមិញនេះ មន្ត្រីការិយាល័យការពារផ្លូវច្បាប់នៃមន្ទីរកិច្ចការនារីខេត្ត សហការជាមួយរដ្ឋបាលសាលាស្រុកក្រឡាញ់ បានបន្តរៀបចំធ្វើវេទិកាផ្សព្វផ្សាយ “ អនុសញ្ញាស្ដីពី ការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ” ដល់អាជ្ញាធរ និងប្រជាពលរដ្ឋនៅក្នុងឃុំស្រណាល ក្រោមអធិបតីភាព លោកស្រី ងិន សារិន អនុប្រធានមន្ទីរកិច្ចការនារីខេត្តសៀមរាប លោក ឡុក វួន មេឃុំស្រណាល លោក នី ណៃ មន្ត្រីប៉ុស្តិ៍រដ្ឋបាលស្រណាល ក្រុមប្រឹក្សាឃុំស្រណាល អ្នកទទួលបន្ទុកកិច្ចការនារី និងកុមារឃុំ ជំនួយការឃុំ មេភូមិ អនុភូមិ ប្រជាការពារភូមិ និងប្រជាពលរដ្ឋមកពីគ្រប់ភូមិនៅក្នុងឃុំស្រណាល សរុប ១០២ នាក់ផងដែរ។
ក្នុងឱកាសនោះ លោកស្រី ងិន សារិន បានមានប្រសាសន៍ គោលបំណងនៃវេទិកានៅពេលនេះ គឺដើម្បីបង្កើនការយល់ដឹងអំពីអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ) ការផ្តល់ការធានានូវការទទួលបានសិទ្ធិមនុស្ស និងសេរីភាពជាមូលដ្ឋាន ដោយស្មើភាពគ្នាជាមួយបុរស ។
លោកស្រី ងិន សារិន បន្តថា អនុសញ្ញាស៊ី-ដ ជាសន្ធិសញ្ញាអន្តរជាតិដំបូងតែមួយគត់ ដែលបានបញ្ជាក់យ៉ាងទូលំទូលាយអំពីសិទ្ធិរបស់ស្ត្រី ដែលត្រូវតែមានក្នុងបរិបទស៊ីវិល នយោបាយ ជីវិតសេដ្ឋកិច្ច សង្គមកិច្ច វប្បធម៌ និងជីវិតគ្រួសារ ជាពិសេសអនុសញ្ញាស៊ី-ដ នេះបានធ្វើឱ្យស្ត្រីទទួលបានសិទ្ធិពិតប្រាកដ រួចផុតពីការរើសអើង ការរំលោភលើគោលការណ៍សមភាពនៃសិទ្ធិមនុស្ស និងការគោរពសេចក្ដីថ្លៃថ្នូររបស់មនុស្សផងដែរ ។
លោកស្រី អនុប្រធានមន្ទីរកិច្ចការនារីខេត្ត បានឲ្យដឹងទៀតថា អនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ(ស៊ី-ដ) មានគោលការណ៍គ្រិះ៣ គឺការទទួលបានសមភាពពិតប្រាកដ ការមិនរើសអើង និងកាតព្វកិច្ចរបស់រដ្ឋភាគីក្នុងការធានាឱ្យស្ត្រីទទួលបានសិទ្ធិពេញលេញ ។
អនុសញ្ញាស៊ី-ដ នេះអនុម័ត និងបើកឱ្យចុះហត្ថលេខា ឱ្យសច្ចាប័ន និងឱ្យចូលជាសមាជិកតាមសេចក្ដីសម្រេចចិត្តលេខ ៣៤១១៨០ ចុះថ្ងៃទី១៨ ខែធ្នូ ឆ្នាំ១៩៧៩ របស់មហាសន្និបាតអង្គការសហប្រជាជាតិ បានចូលជាធរមាននៅថ្ងៃទី៣ ខែកញ្ញា ឆ្នាំ១៩៨១ ។
បច្ចុប្បន្នអនុសញ្ញាស៊ី-ដ មានរដ្ឋភាគីចំនួន១៨៥ ដែលបានចុះហត្ថលេខា និងផ្ដល់សច្ចាប័ន យកទៅអនុវត្ត នៅក្នុងនោះប្រទេសកម្ពុជា បានចុះហត្ថលេខានៅថ្ងៃទី២២ ខែកញ្ញា ឆ្នាំ១៩៩២ ហើយផ្ដល់សច្ចាប័ននៅថ្ងៃទី១៥ ខែតុលា ឆ្នាំ១៩៩២ យកមកអនុវត្តដោយឥតលក្ខខណ្ឌផងដែរ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
