ទីភ្នាក់ងារព័ត៌មានរ៉យទ័របានដកស្រង់សំដីប្រភពដែលស៊ាំនឹងបញ្ហានេះថា រដ្ឋាភិបាលក្រុងប៉េ កាំងបានព្រមានប្រទេសឥណ្ឌាថា ក្រុមហ៊ុនរបស់ឥណ្ឌាដែលកំពុង ប្រតិបត្តិការនៅក្នុងប្រទេសចិន អាចប្រឈមនឹងផលវិបាក ប្រសិនបើរដ្ឋាភិបាលទីក្រុងញូដេលី ព្យាយាមរារាំងក្រុមហ៊ុនបច្ចេកវិទ្យា Huawei ពីការធ្វើជំនួញនៅក្នុងប្រទេសឥណ្ឌា។
បើតាមសារព័ត៌មាន Sputnik ចេញផ្សាយកាលពីថ្ងៃទី៦ ខែសីហា ឆ្នាំ២០១៩ បានឱ្យដឹងថា នៅមុននេះ ទីប្រឹក្សាវិទ្យាសាស្ត្ររបស់នាយករដ្ឋមន្ត្រីឥណ្ឌាបានរាយការណ៍ថា ឥណ្ឌាគួរតែ ផ្តួចផ្តើមគំនិត 5G ដោយមិនមានការចូលរួមពីក្រុមហ៊ុន Huawei ។
គួរឲ្យដឹងថា ប្រទេសឥណ្ឌាកំពុងសម្លឹងរកការធ្វើឱ្យប្រសើរឡើងនូវបច្ចេកវិទ្យាបណ្តាញទូរស័ព្ទចល័តរបស់ខ្លួនដល់ 5G ត្រឹមឆ្នាំ ២០២០ ហើយកាលពីខែឧសភាកន្លងទៅនេះ រដ្ឋាភិបាលសហរដ្ឋអាមេរិកបានដាក់ ក្រុមហ៊ុន Huawei ទៅក្នុងបញ្ជីខ្មៅជុំវិញការចោទប្រកាន់ ទាក់ទងនឹងការស៊ើបការណ៍សម្ងាត់ជាមួយរដ្ឋាភិបាលចិន។
ការដាក់ទណ្ឌកម្មនេះ បានរារាំងក្រុមហ៊ុនអាមេរិកមិនឱ្យទាក់ទងជាមួយក្រុមហ៊ុន Huawei ដោយគ្មានអាជ្ញាប័ណ្ណពិសេស។
ហើយសហរដ្ឋអាមេរិកក៏បាននិងកំពុងជំរុញប្រទេសដទៃទៀតឱ្យចៀសវាងការប្រើប្រាស់ឧបករណ៍របស់ក្រុមហ៊ុន Huawei ខណៈពេលដែលប្រើប្រាស់បច្ចេកវិទ្យាបណ្តាញ 5G ។
ក្រោយមកនៅខែមិថុនា ប្រធានាធិបតីអាមេរិក ដូណាល់ ត្រាំ បានបន្ធូរសម្ពាធ ដែលអនុញ្ញាតឱ្យក្រុមហ៊ុនអាមេរិកលក់គ្រឿងបន្លាស់ ទៅឱ្យក្រុមហ៊ុន ទោះបីជាប់ក្នុងបញ្ជីខ្មៅក៏ដោយ៕
ប្រភព៖ ដើមអំពិល
ប្រែសម្រួលៈ ណៃ តុលា
