អស់រយៈពេលមួយសប្តាហ៍នៃដំណើរបេសកកម្មនិងស្នាក់នៅ នៅក្នុងសាលាបឋមសិក្សាគូរ៉ាតាសាមគ្គីសហគមន៍ ស្ថិតក្នុងភូមិអញ្ជាញសង្កាត់នគរធំ ក្រុងសៀមរាបខេត្តសៀមរាប នៃនិស្សិតមួយក្រុមចំនួន១៥នាក់ក្នុងនោះស្រី៧នាក់និងសាស្ត្រាចារ្យដឹកនាំ២នាក់ផង មកពីសាកលវិទ្យាល័យខាំម្ញ៉ូងនៃប្រទេសកូរ៉េ បានបញ្ចប់បេសកកម្មរបស់ខ្លួនប្រកបដោយជោគជ័យនិងបាននាំយកលទ្ឋផលផ្លែផ្កាជាវិជ្ជមានពីកម្ពុជាសម្រាប់ជាបទពិសោធដល់និស្សិតជំនាន់ក្រោយៗរបស់ប្រទេសខ្លួន ។
នេះជាលើកទី៣ហើយ ដែលសមាគមន៍ស្ម័គ្រចិត្តនៃសាកលវិទ្យាល័យខាំម្ញ៉ុង សហការជាមួយក្រុមហ៊ុនទីភ្នាក់ងារទេសចរណ៍ចន្ឋីទួរប្រចាំខេត្តសៀមរាបមកកាន់សាលាបឋមសិក្សានេះ។ សកម្មភាពនិស្សិតនិងសាស្ត្រាចារ្យនៃសមាគមន៍សាកលវិទ្យាល័យខាំម្ញ៉ុងលើកដំបូងនេះ បានផ្តល់និងសាងសង់ជូនដល់សាលាបឋមគូរ៉ាតាសាមគ្គីសហគមន៍ នូវកន្លែងលាងសំអាតអនាម័យដៃ ទោងសម្រាប់ក្មេងលេង កៅអីបង់អង្គុយលេង អំពូលសូឡាសម្រាប់ជួយបំភ្លឺពេលយប់ គំនូរមិត្តភាពសិស្សកម្ពុជា កូរ៉េ ចំនួន២ផ្ទាំងផងដែរ។
ក្រុមប្រតិភូនៃសមាគមន៍ បានការទទួលនិងយកចិត្តទុកដាក់សម្រាប់ការស្នាក់នៅនិងបរិភោគនៅក្នុងសាលាបឋមសិក្សានេះ ពីលោកគ្រូអ្នកគ្រូ គណៈគ្រប់គ្រងសាលាយ៉ាងរាក់ទាក់កក់ក្តៅ។ សាលាបឋមសិក្សាគូរ៉ាតាសាមគ្គីសហគមន៍ជាសាលាកម្រងមួយក្នុងចំណោម៦សាលានៃកម្រងធ្លកអណ្តូងស្ថិតក្នុងសង្កាត់នគរធំក្រុងនិងខេត្តសៀមរាប សាលានេះនៅតែមានតម្រូវការការជួយពីបណ្តាសហគមន៍ និងសប្បុរជននានាទាំងក្នុងនិងក្រៅប្រទេសទាំងសំភារៈនិងបរិក្ខាដើម្បីអភិវឌ្ឍន៍ទៅលើបរិស្ថាន អនាម័យ។លោកស្រី វ៉ាន់ សុផាត នាយិកាសាលានិងលោក ឈុន ម៉េង តំណាងការិយាល័យអប់រំក្រុងសៀមរាប បានសំណូមពរដល់ថ្នាក់ដឹកនាំសមាគមន៍សូមបន្តជួយឧបត្ថម្ភគាំទ្រ ជ្រោមជ្រែងដល់សាលាជាបន្តទៀត។
លោក អាន វ៉ុនស៊ុល បានឲ្យដឹងថា សមាគមន៍ស្ម័គ្រចិត្តនៃសាកលវិទ្យាល័យខាំម្ញ៉ុងបង្កើតឡើង១២ឆ្នាំមកហើយ ផ្តោតសំខាន់លើការងារមនុស្សធម៌និងការងារសង្គមជាពិសេសជាមួយសិស្សសាលាក្រីក្រនៃបណ្តាប្រទេសនានាក្នុងពិភពលោក ការងារនេះធ្វើឡើងដោយស្ម័គ្រចិត្តរវាងនិស្សិតនិងគណៈគ្រប់គ្រងសាលានិងសមាគមន៍ ក្នុងប្រទេសកូរ៉េ ដើម្បីជួយដល់ការងារសង្គមដោយស្ម័គ្រចិត្ត មិនសំដៅតែកម្ពុជាឬប្រទេសណានោះទេ គឺធ្វើទៅតាមលទ្ឋភាពនិងផ្តោតសំខាន់ប្រទេសដែលកំពុងជួបភាពខ្វះខាតរបស់សិស្សានុសិស្សដែលកំពុងជួបការលំបាកក្នុងការសិក្សា ដោយការបណ្តុះនូវទឹកចិត្តស្រឡាញ់និងអាណិតអាសូរនិងជាឱកាសមួយចែករំលែកបទពិសោធរវាងនិស្សិតកំពុងសិក្សានៅសាកលវិទ្យាល័យខាំម្ញ៉ុងប្រទេសកូរ៉េជាមួយប្រទេសផ្សេងទៀត ដើម្បីឱ្យពួកគាត់មានឱកាសបានស្វែងយល់ពីប្រពៃណីទំនៀមទំលាប់ វប្បធម៌សាសនានិងជីវភាពរស់នៅជាក់ស្តែងរបស់ប្រទេសមួយចំនួនជិតខាង សម្រាប់ជាគន្លឺះនិងបទពិសោធ ដើម្បីកែលំអនិងអភិវឌ្ឍនូវសមត្ថភាពរបស់ខ្លួនឱ្យកាន់តែរឹងមាំនិងខ្លាំងក្លាឡើងថែមទៀត សម្រាប់ជាចក្ខុវិស័យនិងជាបំណិនជីវិតរបស់យុវវ័យជំនាន់ក្រោយ។
លោកបន្តថា សកម្មភាពនៃដំណើរទស្សនកិច្ចសិក្សានេះធ្វើឡើងដោយស្ម័គ្រចិត្តពីការចូលរួមរបស់និស្សិតមួយចំនួន នៃសាកលវិទ្យាល័យខាំម្ញ៉ុងប្រទេសកូរ៉េ តាមរយៈការគាំទ្របរិច្ចាកថវិកាសប្បុរសធម៌ផ្ទាល់ខ្លួនពីអ្នកស្ម័គ្រចិត្តរបស់លោកគ្រូអ្នកគ្រូ សាស្ត្រាចារ្យនិងមាតាបិតាអាណាព្យាបាលសិស្សនិងថវិកាបដិភាគបានមកពីបណ្តាសាលាដៃគូក្នុងសមាគមន៍ ។
លោក វ៉ូស៊ុល លើកឡើងផងដែរថា៖ថ្វីបើប្រទេសកូរ៉េរីកចំរើនជឿនលឿនជាងកម្ពុចាក៍ដោយ តែសម្រាប់សិស្សនិងនិស្សិតជាច្រើនពួកគាត់មិនសូវបានដឹងពីការលំបាកនិងជីវភាពរស់នៅ វប្បធម៌ប្រពៃណី ទំនៀមទម្លាប់របស់ប្រទេសកំពុងអភិវឌ្ឍឡើយ ហេតុនេះ ទើបបង្កើតឱកាសដល់ពួកគាត់បានមកកម្ពុជានិងប្រទេសផ្សេងៗទៀតដើម្បីរឹតចំណងសាមគ្គីភាព បង្កើតក្តីស្រឡាញ់ ចែករំលែកចំណេះដឹង និងដកស្រង់បទពិសោធ រវាងគ្នាទៅវិញទៅមក ជាដើម។
អត្ថបទ និង រូបភាព ៖ យូ វង្ស
កែសម្រួល៖ អ៊ុន ណារាជ្យ
