ខេត្តសៀមរាប គឺជាគោលដៅនៃភ្ញៀវទេសចរណ៍នៅលើពិភពលោកចូលមកទស្សនាកម្សាន្តដែលជាខេត្តប្រវត្តិសាស្ត្រ សម្បូរទៅដោយសម្បត្តិវប្បធម៌ ប្រាង្គប្រាសាទដ៏ល្បីល្បាយ និង រមណីដ្ឋានធម្មជាតិភ្នំគូលែន និង បឹងទន្លេសាប ។
យោងតាមប្រសាសន៍លើកឡើងរបស់ឯកឧត្តម ទៀ សីហា អភិបាលនៃគណៈអភិបាលខេត្ត នៅក្នុងឱកាសចែករង្វាន សិស្សឆ្នើមប្រចាំឆ្នាំ សិក្សា២០១៨.២០១៩ នៅវិទ្យាល័យ១០ មករា១៩៧៩ កាលពីពេលថ្មីៗកន្លងទៅនេះ ដោយបានបញ្ជាក់ជូនដល់បងប្អូនប្រជាពលរដ្ឋ អំពីគម្រោងធ្វើផ្លូវរបស់ខេត្តក្នុងក្រុងសៀមរាបមាន ចំនួន៣០គម្រោង ដោយសារបច្ចុប្បន្នផ្លូវមួយចំនួនបានកំពុងរៀបចំដាក់ប្រព័ន្ធលូ ក៏ដូចបង្កប់បំពុងក្រោមដីក្នុងការដាក់ប្រព័ន្ធខ្សែកាប និង ប្រព័ន្ធទឹកស្អាតឲ្យបានរួចរាល់ជាមុន ទើបធ្វើផ្លូវជាក្រោយ ដើម្បីជៀសវាងធ្វើផ្លូវហើយ ជីកកកាយដាក់លូ ឬប្រព័ន្ធខ្សែកាប និង ទឹកស្អាត ដែលនាំធ្វើឲ្យខូចខាតពី គុណភាពផ្លូវ ។
ក្នុងនោះដែរឯកឧត្តម ក៏បានសុំការអភ័យទោសពីប្រជាពលរដ្ឋដែលមានលំនៅដ្ឋានអមតាមដងផ្លូវដែលត្រូវស្ថាបនា និងសូមឲ្យបងប្អូនចូលរួមសហការជាមួយក្រុមជំនាញ ដើម្បីឲ្យ ការស្ថាបនាផ្លូវធ្វើទៅបានដោយរលូន ហើយក៏ជាផលប្រយោជន៍សម្រាប់យើងទាំងអស់គ្នាផងដែរ ។
ព័ត៌មានជាតិ ថ្មីៗ
ឯកឧត្តមក៏បានឲ្យដឹងផងដែរ អំពីការរៀបចំបណ្តាញមេ ប្រព័ន្ធទឹកស្អាត នៅតាមបណ្តាភូមិ សង្កាត់ក្នុងក្រុងសៀមរាប ព្រមទាំងបានតភ្ជាប់ចូលទៅផ្ទះប្រជាពលរដ្ឋបានប្រើប្រាស់ជាប្រចាំថ្ងៃទៀតផង ។ ម្យ៉ាងទៀត ចំពោះក្រុមហ៊ុននានា ដែលបានធ្វើការដាក់ បណ្តាញខ្សែ កាបរបស់ខ្លួន នៅតាមបង្គោលភ្លើង ដែលធ្វើឲ្យប៉ះពាល់សោភ័ណ្ឌភាពក្រុងនោះ គឺត្រូវបញ្ឈប់ការរាយបណ្តាញលើអាកាស ហើយមកដាក់បង្កប់នៅក្រោមដីវិញ ។
ក្នុងនោះឯកឧត្តមក៏បានអំពាវនាវឲ្យក្រុមហ៊ុន ដែលប្រកបអាជីវកម្មទាំងនោះ មកចូលរួមសហការជាមួយក្រុមការងារស្ថាបនាផ្លូវ ដើម្បីរៀបចំប្រព័ន្ធបំពុងបង្កប់ក្នុងដី ក្នុងការរាយបណ្តាញខ្សែកាបរបស់ខ្លួន ហើយ នៅពេលដែលក្រុមវិស្វកម្មបានស្ថាបនាផ្លូវរួចរាល់ហើយនោះ អាជ្ញាធរខេត្តមិនអនុញ្ញាតឲ្យធ្វើការជីកកកាយផ្លូវទាំងនោះ ដូចពេលមុនៗនោះឡើយ ។
សូមបញ្ជាក់ផងដែរថា ចំពោះផ្លូវវាងក្រុងភ្ជាប់ពីផ្លូវជាតិលេខ៦ពីភូមិចុងកៅស៊ូ សង្កាត់ស្លក្រាម ទៅដល់ភូមជន្លង់ សង្កាត់សាលាកំរើក មានប្រវែង ២ពាន់ម៉ែត្រ បានកំពុងរៀបចំដាក់លូ ដែលស្ថាបនាដោយមន្ទីរសាធារណការនឹងដឹកជញ្ជូនខេត្ត ដែលជាគម្រោងថវិការបស់ក្រសួងសាធារណការនឹងដឹកជញ្ជូន ដោយចាក់ក្រាលអ៊ុតកៅស៊ូបេទីម ។ ចំពោះការដាក់លូ នៅផ្លូវ៣០ម៉ែត្រ ក្នុងភូមិត្រពាំងសេះ សង្កាត់គោកចក នោះ ជាគម្រោងថវិការបស់សាលាខេត្តសៀមរាប ៕
អត្ថបទ និង រូបភាព ៖ ម៉ី សុខារិទ្ធ
កែសម្រួល៖ អ៊ុន ណារាជ្យ
