តាមការឲ្យដឹងពី មន្ត្រីនគរបាលចរាចរណ៍ខេត្តសៀមរាប បានឲ្យដឹងថា នៅវេលាម៉ោង០៦ និង៣០នាទីព្រឹក ថ្ងៃទី០៩ ខែសីហា ឆ្នាំ២០១៩នេះ មានមនុស្សចំនួន០៣នាក់បានស្លាប់នៅកន្លែងយ៉ាងអណោចអធ័ម និងព្រះសង្ឃ២អង្គរទៀត បានរងរបួសយ៉ាងធ្ងន់ធ្ងរ ក្នុងករណីគ្រោះថ្នាក់ចរាចរមួយរវាងម៉ូតូនិងម៉ូតូ បានបុកគ្នាពេញទំហឹង នៅជិតកន្លែងឆែកសំបុត្រអង្គរ ស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប។
ប្រភណដដែលបន្តថា ករណីគ្រោះថ្នាក់ចរាចរណ៍នេះ បង្ករឡើងរវាងម៉ូតូ និងម៉ូតូបើកបញ្ច្រាសទិសគ្នា ដោយម៉ូតូទី១ ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ភ្នំពេញ១CE ៧៧៨៤ បើកបរដោយឈ្មោះ នី យ៉ែង ភេទប្រុស អាយុ២២ឆ្នាំ រស់នៅភូមិជ្រៃ ឃុំសន្លុង ស្រុកទ្រាំង ខេត្តតាកែវ ទិសដៅពីកើតទៅលិច បានស្លាប់នឹងកន្លែង រួមដំណើរដោយព្រះសង្ឃ២អង្គ៖ ទី១/ភិក្ខុ ហ៊ន យុក ព្រះជន្ម២២វស្សា ស្រុកកំណើត ខេត្តតាកែវ រងរបួសធ្ងន់ ។ ទី២/សាមណេ ម៉េង ចិន្ដា ព្រះជន្ម១៥ វស្សា ស្រុកកំណើតនៅខេត្តកំពង់ធំ រងរបួសធ្ងន់ធ្ងរ ហើយព្រះសង្ឃទាំងពីរអង្គគង់នៅវត្ត បន្ទាយក្ដី ស្ថិតក្នុងភូមិស្រះស្រង់ត្បូង សង្កាត់នគរធំ ក្រុងសៀមរាប ខេត្តសៀមរាប។
ចំណែកភាគីម្ខាងទៀត ម៉ាកzoomer x ពណ៌ខ្មៅ-ស ពាក់ស្លាកលេខ សៀមរាប១z:៧២៤២ បើកបរដោយជនរងគ្រោះមិនស្គាល់អត្តសញ្ញាណ០២នាក់ ទិសដៅពីលិចទៅកើត បានស្លាប់ទាំងពីរនាក់ ។
នគរបាលចរាចរណ៍បន្តថា ក្រោយកើតហេតុ សាកសពជនរងគ្រោះមិនស្គាល់អត្តសញ្ញាណទាំងពីរនាក់ ត្រូវដឹកយកទៅតម្កល់ទុកនៅមន្ទីរពេទ្យខេត្តសៀមរាប ដោយឡែកសាកសពម្នាក់ទៀតត្រូវក្រុមគ្រួសារដឹកយកទៅធ្វើបុណ្យតាមប្រពៃណីនៅខេត្តតាកែវ។ ចំណែកម៉ូតូទាំងពីរគ្រឿង ត្រូវបាននគរបាលចរាចរណ៍ ដឹកយកទៅរក្សាទុកនៅការិយាល័យចរាចរណ៍ដើម្បីរង់ចាំដោះស្រាយតាមផ្លូវច្បាប់នៅពេលក្រោយ ៕
អត្ថបទ និង រូបភាព ៖ ជា ស្រស់
កែសម្រួល៖ អ៊ុន ណារាជ្យ
