ឯកឧត្តម ម៉ៃទ្រីប៉ាឡា ស្រ៊ីសេនា ប្រធានាធិបតី សាធារណរដ្ឋសង្គមនិយមប្រជាធិបតេយ្យ ស្រីលង្កា និងលោកជំទាវ នាព្រឹកថ្ងៃទី០៩ ខែសីហា ឆ្នាំ២០១៩ បានអញ្ញើញដល់ខេត្តសៀមរាប ប្រកបដោយសុវត្ថិភាព ដើម្បីទស្សនាប្រាសាទបាយ័ននិងប្រាសាទអង្គរវត្ត ដែលជាកំពូលស្ថាបត្យកម្ម កេរដំណែលដូនតាខ្មែរ និងជាបេតិកភណ្ឌនៃមនុស្សជាតិ ។
លោក ឡុង កុសល ប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា បានឲ្យដឹងថា ដំណើរទស្សនកិច្ចរបស់ប្រធានាធិបតីស្រីលង្កា ( ឯកឧត្តម ម៉ៃទ្រីប៉ាឡា ស្រ៊ីសេនា ) នៅតំបន់រមណីយដ្ឋានអង្គរនៅពេលនេះ គឺស្ថិតក្នុងអត្ថន័យពង្រឹងកិច្ចសហប្រតិបត្តិការយ៉ាងសំខាន់ផ្នែកវប្បធម៌ ទេសចរណ៍ និង សាសនា ដោយសារតែប្រទេសស្រីលង្កា មានជំនឿនិងគោរពព្រះពុទ្ធសាសនាសាសនាដូចកម្ពុជាដែរ ។
លោកបន្តថា តាមរយៈនៃដំណើរទស្សនៈកិច្ចរបស់ប្រធានាធិបតីស្រីលង្កានៅតំបន់រមណីយដ្ឋានអង្គរនេះ នឹងមានការផ្សព្វផ្សាយអំពីសម្បត្តិវប្បធម៌-ប្រវត្តិសាស្ត្រដ៏មហាសាលនៃកម្ពុជាទៅគាន់ស្រីលង្កា ដែលមិនត្រឹមតែមានតម្លៃមិនអាចកាត់ថ្លៃបាន ឆ្លុះបញ្ចាំងអំពីអរិយធម៌ដ៏រុងរឿងនៃកម្ពុជាប៉ុណ្ណោះទេ តែក៏ជាសក្តានុពលទេសចរណ៍វប្បធម៌-ប្រវត្តិសាស្ត្រ ដ៏ទាក់ទាញបំផុតរបស់កម្ពុជា ។ វាពិតជាស្ថិតក្នុងក្តីសង្ឃឹមផងដែរ ដែលសម្រាប់ថ្ងៃអនាគត តំបន់អង្គរនឹងទាក់ទាញបានភ្ញៀវទេសចរជនជាតិស្រីលង្កា មកទស្សនាកម្ពុជាកាន់តែច្រើន ក្នុងនោះក្រៅពីទេសចរណ៍វប្បធម៌-ប្រវត្តិសាស្ត្រ នឹងអាចមានភ្ញៀវទេសចរស្រីលង្កា ក្នុងវិស័យព្រះពុទ្ធសាសនា ផងដែរ ។
ឯកឧត្តម ម៉ៃទ្រីប៉ាឡា ស្រ៊ីសេនា បានបង្ហាញនូវអារម្មណ៍កោតស្ងប់ស្ញែងអំពីភាពដ៏អស្ចារ្យ នៃស្នាដៃរបស់បុព្វបុរសខ្មែរ ដែលបានកសាងប្រាង្គប្រាសាទជាច្រើន បង្កប់នូវរចនាបថ ដ៏ល្អឯក គ្មានពីរលើពិភពលោក ។
សូមបញ្ជាក់ថា ឯកឧត្តម ម៉ៃទ្រីប៉ាឡា ស្រ៊ីសេនា ប្រធានាធិបតី ស្រីលង្កា និងលោកជំទាវ អញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជាកាលពីថ្ងៃទី០៧ ខែសីហា ឆ្នាំ២០១៩នេះ និងបានអញ្ជើញមកដល់ខេត្តសៀមរាប នៅព្រឹកមិញនេះ ទស្សនកិច្ចនៅប្រាសាទបាយ័ន និងប្រាសាទអង្គរវត្តផងដែរ ៕
អត្ថបទ និង រូបភាព ៖ ងិន គឹមឡេង
កែសម្រួល៖ អ៊ុន ណារាជ្យ
