សមត្ថកិច្ចនគរបាលខេត្តសៀមរាប បានឲ្យដឹងថា កាលពីល្ងាចថ្ងៃទី១១ ខែសីហា ឆ្នាំ២០១៩ម្សិលមិញនេះ កម្លាំងនគរបាលគ្រឿងញៀន នៃស្នងការដ្ឋាននគរបាលខេត្តសៀមរាប បានកសាងសំណុំរឿងបញ្ជូនមនុស្សចំនួន០៦នាក់ ក្នុងនោះស្រីចំនួន០២នាក់ ដែលជាប់សង្ស័យពាក់ព័ន្ធនឹងករណីគ្រឿងញៀន រួមទាំងវត្ថុតាងទៅសាលាដំបូងខេត្ត ដើម្បីចាត់ការតាមនីតិវិធីនៃច្បាប់ បន្ទាប់ពីកម្លាំងការិយាល័យប្រឆាំងគ្រឿងញៀនខេត្ត បានសហការជាមួយកម្លាំងអធិការដ្ឋាននគរបាលស្រុកពួក ចុះបង្ក្រាបបទរក្សាទុកជួញ ដូរ ចាត់ចែង និងប្រើប្រាស់ដោយខុសច្បាប់នូវសារធាតុញៀន នៅចំណុចលំនៅដ្ឋានមួយ ស្ថិតក្នុងភូមិចំបក់ហែ ឃុំពួក ស្រុកពួក ខេត្តសៀមរាប កាលពីវេលាម៉ោង២១ នាថ្ងៃទី ០៩ ខែសីហា ឆ្នាំ២០១៩ កន្លងទៅថ្មីៗនេះ ។
សមត្ថកិច្ច បានឲ្យដឹងបន្ថែមថា ជនសង្ស័យទាំង០៦នាក់នេះ រួមមាន ៖
១- ឈ្មោះ ធួក ប៊ុនថៃ ភេទប្រុស ឆ្នាំកំណើត ១៩៩៥ មុខរបរគ្មាន មានទីលំនៅភូមិចំបក់ហែ ឃុំពួក ស្រុកពួក ជាប់សង្ស័យពាក់ព័ន្ធនឹងករណីរក្សាទុក និង ជួញដូរ ប៉ុន្តែគ្មានសារធាតុញៀនក្នុងខ្លួន ,
២- ឈ្មោះ ហេង រដ្ឋា ភេទប្រុស ឆ្នាំកំណើត១៩៩៥ មុខរបរគ្មាន មានទីលំនៅភូមិចំបក់ហែ ឃុំពួក ជាប់សង្ស័យពាក់ព័ន្ធនឹងករណីចាត់ចែង , ប្រើប្រាស់ និង មានសារធាតុញៀនក្នុងខ្លួន ,
៣- ឈ្មោះ ទិត្យ ព្រេងសំណាង ភេទស្រី ឆ្នាំកំណើត១៩៩៦ មុខរបរគ្មាន មានទីលំនៅភូមិគោកជូន ឃុំពួក ជាប់សង្ស័យពាក់ព័ន្ធនឹងករណីចាត់ ចែង និងប្រើប្រាស់ ហើយមានសារធាតុញៀនក្នុងខ្លួន ,
៤- ឈ្មោះ គឹម សុគន្ធា ភេទស្រី ឆ្នាំកំណើត ១៩៩៣ មុខរបរគ្មាន មានទីលំនៅភូមិត្រពាំងសេះ សង្កាត់គោកចក ជាប់សង្ស័យពាក់ព័ន្ធនឹងករណីចាត់ចែង និង ប្រើប្រាស់ ហើយមានសារធាតុញៀនក្នុងខ្លួន ,
៥- ឈ្មោះ តឹក ដេត ហៅ វង់ ភេទប្រុស ឆ្នាំកំណើត២០០២ មុខរបរគ្មាន មានទីលំនៅភូមិចំបក់ហែ ឃុំពួកស្រុកពួក ជាប់សង្ស័យពាក់ព័ន្ធនឹងករណីចាត់ចែង និងប្រើប្រាស់ ហើយមានសារធាតុញៀនក្នុងខ្លួន
៦- ឈ្មោះ ឌី សុផល ហៅម៉ាប់ ភេទប្រុស ឆ្នាំកំណើត១៩៩១ មុខរបគ្មាន មានទីលំនៅភូមិត្រពាំងសេះ សង្កាត់គោកចក ជាប់សង្ស័យពាក់ព័ន្ធនឹងករណីចាត់ចែងនិងប្រើប្រាស់ ហើយមានសារធាតុញៀនក្នុងខ្លួន ។
សមត្ថកិច្ច បានឲ្យដឹងបន្ថែមទៀតថា ក្នុងប្រតិបត្តិការនេះ កម្លាំងនគរបាល បានដកហូតវត្ថុតាងបានមាន ៖ ម្សៅមេតំហ្វេតាមីនចំនួន៣០កញ្ចប់ ស្មើនឹងទំងន់៦៧,១ ក្រាមទាំងសំបក , សម្ភារវេចខ្ចប់និងឧបករណ៏ប្រើប្រាស់គ្រឿងញៀនមួយចំនួនទៀត និង ទូរស័ព្ទដៃចំនួន០៣គ្រឿង ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
