គ្រួសារទីទ័លក្រមួយ រស់នៅភូមិទ្រាំង សង្កាត់ស្លក្រាម ក្រុងសៀមរាប ដែលរងគ្រោះដោយសារមែកឈើបាក់សង្កត់លើ ត្រូវបាន សាខា កាកបាទក្រហម ខេត្តសៀមរាប អញ្ជើញជួបសំណេះសំណាល សួរសុខទុក្ខ និងនាំយកអំណោយមនុស្សធម៌ដល់គេហដ្ឋាន ថ្ងៃទី ១០ ខែសីហា ឆ្នាំ២០១៩។
ក្នុងឱកាសជួបសំណេះសំណេះ នៅគេហដ្ឋានរបស់លោក លោក ឈឿន ដារិទ្ធិ អាយុ ៤២ ឆ្នាំ ជាប្ដី និងជាឪពុកនៃកូន ៣នាក់ លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប តំណាងឯកឧត្តម ទៀ សីហា ប្រធានគណៈកម្មាធិការសាខា នាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួមនិងឯកឧត្តម ទៀ សីហា ផងដែរ។ លោកបន្តថា ថ្នាក់ដឹកនាំកាកបាទក្រហមកម្ពុជា តែងតែយកចិត្តទុកដាក់ដល់ជនរងគ្រោះ និងងាយរងគ្រោះនៅទូទាំងប្រទេស ដូចពាក្យស្លោកលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ។
ឆ្លៀតក្នុងឱកាសនោះដែរ លោក ស៊ុ សំអន បានផ្ដាំផ្ញើ ដល់ក្រុមគ្រួសាររងគ្រោះ ត្រូវមានការប្រុងប្រយ័ត្នចំពោះជំងឺផ្សេងៗ ពិសេសជំងឺគ្រុនឈាម ដែលបង្កឡើងដោយមូសខ្លា ត្រូវសម្រាកក្នុងមុង និងស្លៀកពាក់ខោអាវវែងៗជាប្រចាំ។ បើសិនជាឃើញសភាពមិនស្រួល ឬមានជំងឺគ្រុនក្ដៅ ត្រូវប្រញាប់ទៅមន្ទីរពេទ្យ ឬមណ្ឌលសុខភាពដែលនៅជិតបងប្អូនជាបន្ទាន់។
សូមជម្រាបថា លោក ឈឿន ដារិទ្ធិ បានជួបគ្រោះថ្នាក់មែកឈើបាក់សង្កត់ កាលពីថ្ងៃទី០៣ ខែសីហា ឆ្នាំ២០១៩ វេលាម៉ោង ៩:៣០នាទីព្រឹក បានរងរបួសជាទម្ងន់ ដោយបែកឆ្អឹងថ្ងាសខាងស្តាំ និងស្មាខាងស្តាំកំរើកមិនរួច។ ជាមួយនោះ អំណោយមនុស្សធម៌ដែលបានផ្ដល់ជូនមាន៖ មុង១ ភួយ១ សារុង១ ក្រមា១ អាវយឺត២ មី១កេស ត្រីខ១យួរ អង្ករ២៥គីឡូក្រាម និងថវិកា១សែនរៀល។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
