ផ្អែកលើគោលនយោបាយរបស់រាជរដ្ឋាភិបាល ក៏ដូចជា គោលការណ៍ក្រសួងអប់រំ យុវជននិងកីឡា គ្រឹះស្ថានសិក្សាឯកជនគ្រប់កម្រិត គឺជាដៃគូដ៏សំខាន់ ជាមួយគ្រឹះស្ថានសិក្សារបស់រដ្ឋ ដែលបានធ្វើឲ្យវិស័យអប់រំជាតិ មានភាពរឹងមាំ និង មានសក្តានុពល សម្រាប់ការអភិវឌ្ឍន៍ជាតិនាពេលអនាគត។ នេះបើតាមការលើកឡើងរបស់ លោក សុខ ដានី អនុប្រធានមន្ទីរ អប់រំយុវជ និងកីឡាខេត្តសៀមរាប ក្នុងពិធីចែកវិញ្ញាបនបត្រ និងជូនរង្វាន់លើកទឹកចិត្ត ដល់សិស្សជ័យលាភីឆ្នាំសិក្សា២០១៨-២០១៩ នៃសាលាអន្តរជាតិឧត្តមបញ្ញា ក្នុងក្រុងសៀមរាប នាថ្ងៃទី១២ ខែសីហា ឆ្នាំ២០១៩។
លោក បានបន្តថា បច្ចុប្បន្ន វិស័យអប់រំផ្នែកឯកជនមានការរីកចម្រើនខ្លាំងគួរឲ្យកត់សម្គាល់ តាមរយៈការបង្កើតសាលាឯកជនថ្មីៗជាច្រើនលើគ្រប់កម្រិត ចាប់ពីថ្នាក់ទារកដ្ឋាន មត្តេយ្យសិក្សា បឋមសិក្សា មធ្យមសិក្សា រហូតដល់ដ្នាក់ឧត្តមសិក្សា។
មានប្រសាសន៍ក្នុងឱកាសនោះ លោក អ៊ុង សិរីឌី នាយកសាលាអន្តរជាតិឧត្តមបញ្ញា បានបញ្ជាក់ថា បានបើកដំណើរការនៅឆ្នាំ២០១៧ សម្រាប់ឆ្នាំសិក្សា២០១៨-២០១៩នេះ សាលាទទួលបានសិស្សចូលរៀនចំនួន ៥១២នាក់ ក្នុងនោះស្រី២៧៦នាក់ ដែលនេះជាសក្ខីភាពនៃកំណើនសិស្សកើនឡើងពីមួយឆ្នាំទៅមួយឆ្នាំ។
លោក បានអំពាវនាវដល់ អាណាព្យាបាល មាតាបិតាសិស្ស ចាំបាច់ត្រូវវិនិយោគលើការរបស់បុត្រធីតារបស់ខ្លួនតាំងពីតូចៗទៅ ទោះបីការវិនិយោគនេះវាចំណាយពេលវេលាវែង តែវានឹងផ្តល់ផលដល់កូនចៅយើងជារៀងរហូត ពោលគឺចំណេះដឹងរបស់ពួកគាត់ជាចន្ទល់នៅក្នុងគ្រួសារ និងជាសសរទ្រូងសម្រាប់រួមចំណែកអភិវឌ្ឍន៍សង្គមជាតិយើងទាំងអស់គ្នា។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
