អាជ្ញាធរជាតិអប្សរា បានសម្រេចបញ្ឈប់ទាំងស្រុង នូវការប្រកបរបរដាក់ជួលអង្រឹង និងកន្ទេលអង្គុយលេង របស់ប្រជាពលរដ្ឋនៅបរិវេណខាងមុខប្រាសាទអង្គរវត្ត រួមមាន នៅជុំវិញត្រពាំងសេស មុខប្រាសាទព្រហ្មកិល និងវាលស្មៅតាមកសិន្ធុអង្គរវត្ត។ នេះបើតាមសេចក្ដីជូនដំណឹង របស់អាជ្ញាធរជាតិអប្សរានៅថ្ងៃទី១៣ ខែសីហា ឆ្នាំ២០១៩នេះ។
ការបញ្ឈប់ លែងឲ្យមានការប្រកបរបរអាជីវកម្មនេះ បានចេញសេចក្ដីសម្រេចក្រោមហេតុផលថា ការដាក់ជួលកន្ទេល និងអង្រឹង លំហែកាយ រួមនិងលក់ចំណីអាហារ ជូនភ្ញៀវទេសចរក្នុងបរិវេណនេះ បានធ្វើឱ្យប៉ះពាល់ដល់តម្លៃបេតិកភណ្ឌវប្បធម៌ ក៏ដូចជាប៉ះពាល់ដល់បរិស្ថាន សណ្ដាប់ធ្នាប់សាធារណៈ នៃរមណីយដ្ឋានអង្គរ។
ក្នុងសេចក្ដីជូនដំណឹងដែលចុះហត្ថលេខាដោយ លោក ហង់ ពៅ អគ្គនាយកអាជ្ញាធរជាតិអប្សរា បានបញ្ជាក់ថា ពាក់ព័ន្ធនឹងករណីនេះ កន្លងមកក្រុមការងាររបស់អាជ្ញាធរជាតិអប្សរាសហការជាមួយអង្គភាពនគរបាលការពារបេតិកភណ្ឌ និងអាជ្ញាធរមូលដ្ឋាន ក៏បានធ្វើការណែនាំឱ្យ ក្រុមអាជីវករមិនឲ្យមានការដាក់ជួលអង្រឹង និងក្រាលកន្ទេលនៅបរិវេណនេះឡើយ ប៉ុន្តែពួកគាត់នៅតែបន្តប្រព្រឹត្តិដោយមិនខ្វល់ពីបំរាមឡើយ។ ក្រោយពីសេចក្ដីជូនដំណឹងចូលជាធរមាន អាជ្ញាធរនឹងទុកពេលឱ្យក្រុមអាជីវករទាំងអស់នៅទីតាំងខាងលើរយៈពេល៤៥ថ្ងៃ រាប់ចាប់ពីថ្ងៃជូនដំណឹងនេះតទៅ ដើម្បី បញ្ឈប់សកម្មភាពក្រាលកន្ទេល ដាក់អង្រឹង និងសម្ភារផ្សេងៗនៅជុំវិញត្រពាំងសេស មុខប្រាសាទព្រហ្មកិល និងលើវាលស្មៅជុំវិញកសិន្ធុប្រាសាទអង្គរវត្ត។ ក្នុងករណី អាជីវករនៅតែបន្តសកម្មភាពបែបនេះទៀត អាជ្ញាធរជាតិអប្សរា នឹងធ្វើការរឹបអូសសម្ភារៈ ដោយមិនទទួលខុសត្រូវរាល់ការខូតខាតណាមួយឡើយ។
គួរបញ្ជាក់ថា វាលស្មៅមុនប្រាសាទអង្គរវត្ត បានក្លាយជាកន្លែងដ៏ពេញនិយមសម្រាប់សាធារណជនមួយចំនួន ដែលចូលចិត្តអង្គុយហូបអាហារ និងជួបជុំគ្នារាល់ពេលល្ងាច។ ដោយមើលឃើញពីឱកាសនេះ ក្រុមអាជីវករបានប្រជែងគ្នាលក់ចំណីអាហារ ដាក់ជួលកន្ទេល និងអង្រឹង ដែលបង្កឲ្យងាប់ស្មៅ ការចោលសំរាមគ្មានសណ្ដាប់ធ្នាប់ រីឯក្រុមអាជីករ និងភ្ញៀវទេសចរមួយចំនួន ក៏មិនបានចូលរួមសំអាតផងដែរ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
