កាលពីថ្ងៃទី១១ ខែសីហា ឆ្នាំ២០១៩នេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងឯកឧត្តម ទៀ សីហា ប្រធានគណៈកម្មាធិការសាខា បានដឹកនាំយុវជនកាកបាទក្រហមកម្ពុជា បានឧបត្ថម្ភថវិកាចំនួន២លានរៀល សម្រាប់កម្មវិធី “ជិះកង់ដើម្បីបរិស្ថាន និងសុខភាពកុមារ” ដែលប្រារព្ធឡើងដើម្បីជួយទ្រទ្រង់សកម្មភាពជួយសង្គ្រោះកុមារកម្ពុជា របស់មន្ទីរពេទ្យកុមារអង្គរ ។
មានប្រសាសន៍ក្នុងឱកាសនោះ លោកជំទាវ ទាង អេង ទៀ សីហា បានថ្លែងនូវអំណរគុណដល់មន្ទីរពេទ្យកុមារអង្គរ ដែលជួយសង្គ្រោះកុមារកម្ពុជា រាប់លាននាក់ដោយឥតគិថ្លៃ ក្នុងរយៈពេលកន្លង ហើយមន្ទីរពេទ្យនេះអាចដំណើរការទៅបានក៏អាស្រ័យលើកម្លាំងរួបរួមសាមគ្គីគ្នាដូចថ្ងៃនេះ ដែលមានចួលរួមយ៉ាងច្រើនកុះករ បង្ហាញពីភាតរភាព និងសាមគ្គីភាពដ៏រឹងមាំ ក្នុងការជួយកុមារកម្ពុជាយើង ហើយនាឱកាសឆ្នាំក្រោយៗទៀត យើងសង្ឃឹងថា នឹងមានការចូលរួមយ៉ាងច្រើនកុះករដូចថ្ងៃនេះ ដើម្បីបរិស្ថាន និងសុខភាព ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
