ឯកឧត្តម ម៉ៃទ្រីប៉ាឡា ស្រ៊ីសេនា ( Maithripala Sirisena ) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា និងលោកជំទាវ អមដំណើរដោយសម្តេចចៅហ្វាវាំងវរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំងនិង ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ព្រមទាំងមន្ត្រីជាន់ខ្ពស់នៃរាជរដ្ឋាភិបាលកម្ពុជាជាច្រើនរូបទៀត បានមកដល់ទឹកដីនៃខេត្តសៀមរាបហើយ កាលពីវេលាម៉ោង ៨:៥០នាទី នាព្រឹកថ្ងៃទី០៩ ខែសីហា ឆ្នាំ២០១៩នេះ តាមយន្តហោះពិសេសពីរាជធានីភ្នំពេញ ។
វត្តមានរបស់ឯកឧត្តមប្រធានាធិបតីនៃប្រទេសស្រីលង្កានិងលោកជំទាវ នៅព្រលានយន្តហោះអន្តរជាតិសៀមរាប បាន ទទួលការស្វាគមន៍ពីយ៉ាងកក់ក្តៅពីសំណាក់ឯកឧត្ដម អ៊ឹង ហឿន ប្រធានក្រុមប្រឹក្សាខេត្តសៀមរាប និង ឯកឧត្ដម ទៀ សីហា អភិបាលខេត្តសៀមរាប ព្រមទាំងឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង មន្ត្រីអ្នកមុខអ្នកការសំខាន់ៗជាច្រើនរូបទៀត ។
គួររំលឹកថា វត្តមានរបស់ឯកឧត្តមប្រធានាធិបតីនៃប្រទេសស្រីលង្កា និងលោកជំទាវ នៅខេត្តសៀមរាបនាពេលនេះ តាមគម្រោងផែនការ ឯកឧត្តម Maithripala Sirisena និងលោកជំទាវ នឹងអញ្ជើញទស្សនាប្រាសាទអង្គរវត្ត និងប្រាសាទបាយ័ន ដែលជាប្រាសាទដ៏ល្បីល្បាញរបស់ខ្មែរ នៅក្នុងទឹកដីខេត្តសៀមរាប ដែលមានចំណាប់អារម្មណ៍ដូចគ្នាទៅនឹងប្រមុខរដ្ឋដទៃជាច្រើនទៀតដែរ និងបន្ទាប់ពីទស្សនាប្រាសាទអង្គរវត្ត និងប្រាសាទបាយ័នហើយនោះ ឯកឧត្តម ប្រធានាធិបតី និងលោកជំទាវ នឹងត្រូវទទួលអាហារថ្ងៃត្រង់ ដែលរៀបចំដោយឯកឧត្ដមអភិបាលខេត្ត ហើយនៅពេលរសៀល ឯកឧត្តម នឹងអញ្ជើញទស្សនានៅសិប្បកម្មផលិតវត្ថុសិល្បៈ នៅខេត្តសៀមរាប មុននឹងត្រឡប់មករាជធានីភ្នំពេញវិញ ។
សូមបញ្ជាក់ថា ឯកឧត្តម Maithripala Sirisena បានអញ្ជើញមកដល់កម្ពុជា នៅម៉ោងជាង១១ព្រឹក នាថ្ងៃទី០៧ ខែសីហា ឆ្នាំ២០១៩ ដើម្បីបំពេញទស្សនកិច្ចផ្លូវរដ្ឋ រយៈពេល៤ ថ្ងៃចាប់ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩ តបតាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។
ក្នុងរយៈពេលនៃការបំពេញទស្សនកិច្ចផ្លូវរដ្ឋនៅកម្ពុជា កាលពីនារសៀល ថ្ងៃទី០៧ ខែសីហា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងឯកឧត្ដម Maithripala Sirisena ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា បានអញ្ជើញចូលរួមវេទិកាធុរកិច្ចកម្ពុជា-ស្រីលង្កានៅសណ្ឋាគារសូហ្វីតែលភ្នំពេញដើម្បីបើកឱកាស និងពង្រីកការវិនិយោគ ក៏ដូចជាពាណិជ្ជកម្មប្រទេសទាំងពីរ ឱ្យកាន់ធំធាត់ថែមទៀត។
នៅព្រឹកថ្ងៃទី០៨ ខែសីហា ឆ្នាំ២០១៩នេះ ឯកឧត្ដម Maithripala Sirisena ប្រធានាធិបតីស្រីលង្កា និងលោកជំទាវ ចាយ៉ាន់ធី ស៊ីរីសេនា ភរិយារបស់ឯកឧត្តមប្រធានាធិបតី បានអញ្ជើញ ចូលគាល់ព្រះមហាក្សត្រកម្ពុជា ព្រះករុណា ព្រះបាទសម្តេចព្រះ បរមនាថ នរោត្តម សីហមុនី នៅព្រះបរមរាជវាំងកម្ពុជា និង បន្ទាប់មកឯកឧត្ដម Maithripala Sirisena ប្រធានាធិបតីស្រលង្កា និងលោកជំទាវ បានដឹកនាំគណៈប្រតិភូអញ្ជើញទៅបំពាក់កម្រងផ្កានៅវិមានឯករាជ្យ ព្រមទាំងគោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះវររាជបិតាជាតិខ្មែរ «ព្រះបរមរតនកោដ្ឋ»ផងដែរ។
នៅព្រឹកថ្ងៃទី០៨ ខែសីហា ឆ្នាំ២០១៩នេះដែរ ឯកឧត្ដម Maithripala Sirisena ប្រធានាធិបតីស្រលង្កា និងលោកជំទាវ អមដំណើរដោយឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននៃកម្ពុជា បានឆ្លៀតចូលទៅដើរលេងកម្សាន្តនៅផ្សារទំនើបអេអន១ ដែលកម្មវិធីដើរលេងកម្សាន្តនៅផ្សារអេអន១នេះ ជាកម្មវិធីមួយឯកជនមួយមិនស្ថិតក្នុងរបៀបវារៈនៃដំណើរទស្សនកិច្ចរបស់លោកប្រធានាធិបតីនៅកម្ពុជានោះឡើយ។
នៅរសៀល ថ្ងៃទី០៨ ខែសីហា ឆ្នាំ២០១៩នេះ ឯកឧត្ដម Maithripala Sirisena ប្រធានាធិបតីស្រីលង្កា និងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជួបពិភាក្សាទ្វេភាគី នៅវិមានសន្តិភាព ដើម្បីពង្រីក និងពង្រឹងចំណងទំនាក់ទំនងមិត្តភាពរវាងប្រទេសទាំងពីរដោយធ្វើយ៉ាងណាជំរុញទំនាក់ទំនងរវាងប្រទេសទាំងពីរ តាមរយៈវិស័យអប់រំ, វប្បធម៌, ទេសចរណ៍, ពាណិជ្ជកម្ម, អាកាសចរណ៍ស៊ីវិល និងពិសេសជំរុញឲ្យមានការហោះហើរត្រង់ មកកាន់ប្រទេសកម្ពុជា ឬពីប្រទេសកម្ពុជា ទៅប្រទេសស្រីលង្កាជាដើម។
បន្ទាប់មក ឯកឧត្ដម Maithripala Sirisena និងសម្តេចតេជោ ហ៊ុន សែន បានអញ្ជើញជាអធិបតីភាពរួមគ្នា ក្នុងពិធីចុះហត្ថលេខាលើកិច្ចព្រមព្រៀងចំនួន ២ ក្នុងនោះមាន ៖ ទី១. អនុស្សរណៈនៃការយោគយល់គ្នាស្តីពី កិច្ចពិគ្រោះយោបល់ រវាងក្រសួងការបរទេសនៃប្រទេសទាំងពីរ ដែលចុះហត្ថលេខាដោយលោកជំទាវ អ៊ាត សោភា រដ្ឋលេខាធិការក្រសួងការបរទេសកម្ពុជា និងឯកឧត្តម Vansantha Senanayake មន្ត្រីជាន់ខ្ពស់ក្រសួងការបរទេសស្រីលង្កា និង ទី២. អនុស្សរណៈនៃការយោគយល់គ្នា រវាងសភាពាណិជ្ជកម្មកម្ពុជា និងសភាពាណិជ្ជកម្មក្រុងកូឡំបូ ដែលចុះហត្ថលេខាដោយឯកឧត្ដមអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ជាមួយប្រធានសភាពាណិជ្ជកម្មស្រីលង្កា។
ក្នុងអំឡុងពេលស្នាក់នៅប្រទេសកម្ពុជា ឯកឧត្តមប្រធានាធិបតី នឹងអញ្ជើញទៅកាន់វត្តលង្កា និងប្រគេនសម្តេចព្រះមហាអរិយវង្ស សៅរ៍ ច័ន្ទថុល្ល ព្រះចៅអធិការវត្តលង្កា នូវកូនដើមពោធិ៍នៃមហាពោធិព្រឹក្សពីក្រុងអនុរាធបុរៈ ហើយបន្ទាប់មក ឯកឧត្តមនឹងអញ្ជើញចូលរួមក្នុងពិធីដើមឈើតំណាងប្រទេសស្រីលង្កា នៅមជ្ឈមណ្ឌលវិបស្សនាភ្នំឧត្តុង្គ ។
សូមបញ្ជាក់ថា ឯកឧត្តម ម៉ៃទ្រីប៉ាឡា ស្មីសេនា (Maithripala Sirisena) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា និងលោកជំទាវ បានអញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា មានរយៈពេល០៤ថ្ងៃ គឺចាប់ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩ តបតាមការអញ្ជើញរបស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ៕
អត្ថបទ ៖ លោក លីវ សាន្ត
រូបថត ៖ ក្រុមការងារមន្ទីរព័ត៌មានខេត្តសៀមរាប
