នាវាទំនើបមួយគ្រឿង ដែលមានតម្លៃជាង ២៤០លានបាត ត្រូវបានខូចខាតយ៉ាងដំណំ ដោយសារអគ្គិភ័យ នៅចំណុចផែមួយ ក្នុងស្រុកថាឡាង ក្នុងប្រទេសថៃ នៅថ្ងៃពុធម្សិលមិញនេះ។
នាវាទំនើបនេះមានឈ្មោះថា Lady D មានប្រវែង ៥៥ ម៉ែត្រ បានចតនៅខាងចុងនៃផែ Ao Por Grand Marina ដែលធ្វើឱ្យកិច្ចប្រឹងប្រែង ពន្លត់អគ្គិភ័យមានការលំបាក។
យោងតាមសារព័ត៌មានថៃ បាងកកប៉ុស្តិ៍ ចេញផ្សាយនៅថ្ងៃទី០៧ ខែសីហា ឆ្នាំ២០១៩ បានឱ្យដឹងថា អគ្គិភ័យបានចាប់ផ្តើម នៅព្រឹកថ្ងៃពុធ ដោយនាវិកម្នាក់នៅលើទូកនោះបានព្យាយាម ពន្លត់ភ្លើងដោយប្រើឧបករណ៍ ពន្លត់អគ្គិភ័យ ប៉ុន្តែឥតប្រយោជន៍ ដោយអណ្តាតភ្លើងបានឆាបឆេះនាវាកាន់តែខ្លាំង។
លោក Panya Sampaorat អភិបាលក្រុង Tambon Pa Krok បាននិយាយថា ភ្លើងបានឆាបឆេះដល់កាប៉ាល់ទូក ហើយរាលដាលយ៉ាងលឿន ទៅជាន់ខាងលើ ហើយរថយន្តពន្លត់អគ្គិភ័យចំនួន ៥ គ្រឿង ត្រូវបានបញ្ជូនទៅកន្លែងកើតហេតុ ដើម្បីពន្លុតផងដែរ។
លោកវរសេនីយ៍ឯក Theerawat Liamsuwan ប្រធានប៉ូលីសស្រុក Thalang បាននិយាយថា នាវា Lady D នេះទើបតែមកដល់ពី Langkawi ក្នុងប្រទេសម៉ាឡេស៊ី ហើយចំពោះមូលហេតុដែលបង្ករឲ្យមានអគ្គីភ័យនេះ គឺមន្ត្រីប៉ូលិស នៅមិនទាន់ដឹងច្បាស់នៅឡើយទេ ៕
ប្រភព៖ ដើមអំពិល
ប្រែសម្រួលៈ ណៃ តុលា
