នេះថ្ងៃទី១៨ ខែកញ្ញា ឆ្នាំ២០១៨នេះ បុរសម្នាក់ ដែលជាប់សង្ស័យពាក់ព័ន្ធនឹងករណីគ្រឿងញៀន រួមជាមួយនឹងវត្ថុតាង ត្រូវបានអង្គភាពនគរបាលគ្រឿងញៀនខេត្តសៀមរាប កសាងសំណុំរឿងបញ្ជូនទៅតុលាការខេត្ត ដើម្បីចាត់ការទៅតាមនីតិវិធីនៃច្បាប់ បន្ទាប់ពីសមត្ថកិច្ចឃាត់ខ្លួនបាន កាលពីវេលាម៉ោង២២ ថ្ងៃទី១៧ ខែកញ្ញា ឆ្នាំ២០១៨ម្សិលមិញនេះ ក្នុងប្រតិបត្តិការមួយរវាងកងកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត សហការជាមួយកម្លាំងការិយាល័យនគរបាលចរាចរណ៍ផ្លូវគោក និងកម្លាំងការិយាល័យការពារនិង អន្តរាគមន៍ ចុះបង្ក្រាបបទរក្សាទុកនិងជួញដូរដោយខុសច្បាប់នូវសារធាតុញៀន នៅចំនុចលើដងផ្លូវស្ថិតនៅភូមិបឹងដូនប៉ា សង្កាត់ស្លក្រាម ក្រុង សៀមរាប ។
ជនសង្ស័យមានឈ្មោះ ហួត ឡេង ភេទប្រុស ឆ្នាំកំណើត១៩៧០ មុខរបរកម្មករសំណង់ មានទីលំនៅភូមិស្វាយដង្គំសង្កាត់ស្វាយដង្គំ ក្រុងសៀមរាប ពាក់ព័ន្ធនឹងករណីរក្សាទុកនិងជួញដូរ ហើយមានសារធាតុញៀនក្នុងខ្លួន ព្រមទាំងបានដកហូតវត្ថុតាងមានម្សៅមេតំហ្វេតាមីន ប្រភេទទឹកកកចំនួន១៤កញ្ចប់ ស្មើនឹងទំងន់១,៩ក្រាម(ទំងន់សុទ្ធ) , ទូរស័ព្ទដៃចំនួន ០១គ្រឿង , ឧបករណ៍ប្រើប្រាស់និងសម្ភារវេចខ្ចប់គ្រឿងញៀនមួយចំនួន ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
