ក្នុងឱកាសជួបសម្តែងការគួរសមជាមួយឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប កាលពីព្រឹកថ្ងៃទី១៧ ខែកញ្ញា ឆ្នាំ២០១៨ ម្សិលមិញនេះ លោកវេជ្ជបណ្ឌិត Peter Studar ប្រធានថ្មីនៃមន្ទីរពេទ្យគន្ធបុប្ផា បានមានប្រសាសន៍ថា ក្នុងអំឡុងពេលដែលលោកវេជ្ជបណ្ឌិត Beat Richner កំពុងមានជម្ងឺនោះ លោក Beat Richner តែងតែមានការបារម្ភចំពោះអនាគតមន្ទីរគន្ធបុប្ផា ក្នុងការខ្វះខាតមូលនិធិទ្រទ្រង់មន្ទីរពេទ្យសម្រាប់ការព្យាបាលកុមារកម្ពុជា ព្រមទាំងគិតគូពីអនាគតកុមារកម្ពុជា នៅពេលដែលគ្មានរូបគាត់ ព្រោះលោកវេជ្ជបណ្ឌិត Beat Richner ដែលជាស្ថាបនិកដ៏សំខាន់ ក្នុងការស្វែងរកមូលនិធិពីរដ្ឋាភិបាល និង ប្រជាជនស្វីស ក៏ដូចប្រជាជនកម្ពុជា ភ្ញៀវទេសចរណ៍ជាដើម បានផ្តល់មូលនិធិទ្រទ្រង់រាល់សកម្មភាពរបស់មន្ទីរពេទ្យ ក្នុងការព្យាបាលកុមារ ប៉ុន្តែនៅពេលអវត្តមានរបស់លោកវេជ្ជបណ្ឌិត Beat Richner ក្នុងរយៈពេល១៦ខែមកនេះ ទាំងរូបលោក ដែលជាស្ថាបនិកជាមួយលោកវេជ្ជបណ្ឌិត Beat Richner និង ប្រជាជនស្វីស គឺនៅតែបន្តផ្តល់ជំនួយដល់មន្ទីរពេទ្យគុន្ធបុប្ផាដដែល ហើយបានដំណើរការទៅប្រកបទាំងបរិមាណ និង គុណភាព ព្រមទាំងមានអ្នកជម្ងឺកើនជាងឆ្នាំមុខប្រមាណ១៥ភាគរយទៀតផង ដែលជាការឆ្លើយតបទៅនឹងម្ចាស់ជំនួយ ។
លោកវេជ្ជបណ្ឌិត Peter Studar បានបញ្ជាក់ទៀតថា រូបលោក និង លោកវេជ្ជបណ្ឌិត Beat Richner បានចូលមកកម្ពុជាចាប់ពីឆ្នាំ១៩៩២ ដើម្បីធ្វើការស្តារឡើងវិញនូវមន្ទីរពេទ្យគន្ធបុប្ផា នៅរាជធានីភ្នំពេញ និង សាងសង់មន្ទីរពេទ្យគន្ធបុប្ផាខេត្តសៀមរាប ដែលមានឈ្មោះថាមន្ទីរពេទ្យជ័យវរ្ម័នទី៧ ហើយទស្សនៈរបស់លោក ក៏ដូចលោកវេជ្ជបណ្ឌិត Beat Richner គឺចង់ឲ្យមន្ទីរពេទ្យគន្ធបុប្ផា បានដំណើរការដោយប្រជាជនកម្ពុជា គ្រូពេទ្យកម្ពុជា ហើយលោកពិតជាសប្បាយចិត្តណាស់ ដែលបានឃើញការប្តេជ្ញារបស់បុគ្គលិកពេទ្យទាំងអស់ នៃមន្ទីរពេទ្យគន្ធបុប្ផា ទោះបីអវត្តមានរបស់លោកវេជ្ជបណ្ឌិត Beat Richner ក៏ពិតមែន ប៉ុន្តែមន្ទីរពេទ្យនៅតែដំណើរការបានល្អ ។
ក្នុងឱកាសនោះដែរ លោកវេជ្ជបណ្ឌិត Peter Studar បានសម្តែងការសប្បាយចិត្ត នៅពេលដែលមន្ទីរពេទ្យបានរៀបចំពិធីបុណ្យគោរពវិញ្ញាណក្ខ័ន្ធសពលោកវេជ្ជបណ្ឌិត Beat Richner និងបុគ្គលិកពេទ្យទាំងអស់ ធ្វើការទាំងស្មារតីគោរពចំពោះលោកវេជ្ជបណ្ឌិត Beat Richner ។
មានប្រសាសន៍ក្នុងឱកាសនោះ ឯកឧត្តមបណ្ឌិត ឃឹម ប៊ុនសុង ក៏បានសម្តែងនូវការសោកស្តាយយ៉ាងខ្លាំង នូវការបាត់បង់វេជ្ជបណ្ឌិត ដែលមានទឹកចិត្តដ៏សប្បុរសធម៌ចំពោះកុមារកម្ពុជា ដែលធ្វើឲ្យប្រជាជនកម្ពុជានូវនឹកអាឡោះអាល័យយ៉ាងក្រៃលែង ចំពោះលោកវេជ្ជបណ្ឌិត Beat Richner ដែលប្រជាជនកម្ពុជាបានដាក់ឈ្មោះ ជាគ្រូពេទ្យទេវតា ហើយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា សម្តេចតេជោ នៅតែបន្តទ្រទ្រង់ដល់មន្ទីរពេទ្យគន្ធបុប្ផា ឲ្យនៅតែដំណើរការដូចកាលដែលលោកវេជ្ជបណ្ឌិត Beat Richner នូវមានជីវិត ទាំងបរិមាណ និង គុណភាព មិនឲ្យបាត់រូបរាងឡើយ ។
ឯកឧត្តមបណ្ឌិត ឃឹម ប៊ុនសុង បានថ្លែងអំណរគុណ និង កោតសរសើរចំពោះស្មារតីរបស់គ្រូពេទ្យ នៃមន្ទីរពេទ្យគន្ធបុប្ផា ដែលបានខិតខំយកចិត្ត ទុកដាក់ក្នុងការពិនិត្យ ព្យាបាលជម្ងឺកុមារ និង ស្ត្រី មកគ្រប់ពីបណ្តាខេត្តនៃព្រះរាជាណាចក្រកម្ពុជា ហើយក្នុងនាមអាជ្ញាធរខេត្ត គឺនៅតែបន្តកិច្ចសហប្រតិបត្តិការជាមួយមន្ទីរពេទ្យ ឲ្យដំណើរការដូចកាលដែលលោកវេជ្ជបណ្ឌិត Beat Richner ជាស្ថាបនិកមន្ទីរពេទ្យ និង សូមស្វាគមន៍ចំពោះលោកវេជ្ជបណ្ឌិត Peter Studar ដែលបានមកទទួលភារកិច្ចថ្មីនៅកម្ពុជា ដើម្បីអនាគតកុមារកម្ពុជា ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
