កោដ្ឋដាក់អដ្ឋិធាតុ ចំនួន២ ត្រូវបានក្រុមអ្នកបុរាណវិទ្យា នៃអាជ្ញាធរជាតិអប្សរា ធ្វើកំណាយឃើញនៅក្នុងបរិវេណប្រាសាទបន្ទាយក្តី ក្នុងខេត្តសៀមរាប ដែលបានកប់នៅជាប់ប៉មខឿនព្រះពុទ្ធសាសនា នៅថ្ងៃទី១២ខែសីហាឆ្នាំ២០១៩។
តាមការឲ្យដឹងពីលោក ញឹម សុធាវិន្ទ អ្នកស្រាវជ្រាវនៃសាកលវិទ្យាល័យសូហ្វីយ៉ាប្រទេសជប៉ុន បានបញ្ជាក់ថាកោដ្ឋដាក់អដ្ឋិធាតុ ចំនួន២ នេះ ក្រុមកំណាយនៅមិនទាន់កំណត់បានទេថា ស្ថិតក្នុងសម័យកាលណា ដោយរងចាំការសិក្សាស្រាវជ្រាវបន្ថែមទៀត។
លោក បានបន្តថា កាលពីឆ្នាំ១៩៩៦ ក្រុមមន្ត្រីជំនាញបុរាណវិទ្យា ក៏បានធ្វើកំណាយនៅក្នុងបរិវេណប្រាសាទបន្ទាយក្តីនេះរួចម្តងមកហើយដែរ ដោយពេលនោះគេបានរកឃើញកោដ្ឋចិនសម្រាប់ដាក់អដ្ឋិធាតុ ដែលក្រុមអ្នកជំនាញអះអាងថា កោដ្ឋទាំងនោះក៏ត្រូវបានគេយកមកបញ្ចុះនៅជុំវិញខឿនសាសនានេះដូចគ្នាផងដែរ។
ព័ត៌មានជាតិ ថ្មីៗ
លោក ថូ ថុន បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ នៃអាជ្ញាធរជាតិអប្សរា បានឱ្យដឹងដែរថា ការធ្វើកំណាយនេះ គឺមានសារៈសំខាន់ណាស់សម្រាប់អាជ្ញាធរជាតិអប្សរា ដើម្បីអាចឱ្យអ្នកគ្រប់គ្រងនៅតំបន់រមណីយដ្ឋានអង្គរនេះ បានដឹងច្បាស់ពីរចនាសម្ព័ន្ធសំណង់ប្រាសាទបុរាណ ដែលវាជាកត្តាដ៏សំខាន់សម្រាប់ធ្វើការងារអភិរក្ស និងអភិវឌ្ឍន៍តំបន់ប្រាសាទបុរាណ។
អត្ថបទ និង រូបថត ៖ លោក ខេង ឧត្តម , ជា ស្រស់, ឃុត សៅ
កែសម្រួលអត្ថបទ ៖ លោក លីវ សាន្ត
