បណ្ណាល័យ សាលប្រជុំ និងអគារសិក្សា វិទ្យាល័យជីហែ និងផ្តល់ថវិកាដល់គ្រូស្ម័គ្រចិត្តបង្រៀនបំប៉នសិស្សប្រឡងបាក់ឌុប ក្នុងស្រុកកោះសូទិន ខេត្តកំពង់ចាម
ក្នុងឱកាសចុះបំពេញបេសកកម្មការងារនៅខេត្តកំពង់ចាម ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន រួមដំណើរដោយ ឯកឧត្តម ជារដ្ឋលេខាធិការ អនុរដ្ឋលេខាធិការ ប្រតិភូរាជរដ្ឋាភិបាលកម្ពុជា បានអញ្ជើញទៅពិនិត្យមើល ដំណើរការជួសជុល បណ្ណាល័យ សាលប្រជុំ និងអគារសិក្សា វិទ្យាល័យជីហែ និងផ្តល់ថវិកាដល់គ្រូស្ម័គ្រចិត្តបង្រៀនបំប៉នសិស្សប្រឡងបាក់ឌុប ក្នុងស្រុកកោះ សូទិន ខេត្តកំពង់ចាម នៅព្រឹកថ្ងៃទី ១៣ ខែ សីហា ឆ្នាំ ២០១៩ ។
តាមការបញ្ជាក់របស់ លោក ស៊ុយ ចន្ទ័រិទ្ធិ នាយកវិទ្យាល័យជីហែ បានឲ្យដឹងថា ដំណើរការជួសជុលបណ្ណាល័យ សាលប្រជុំ និងអគារសិក្សា វិទ្យាល័យជីហែ បានជិតរួចរាល់ហើយ ដោយក្នុងនោះ អគារបណ្ណាល័យ និង សាលប្រជុំ ដែលកំពុងដំណើរការជួសជុល គឺចំណាយ ថវិកាអស់ប្រមាណជាង ៧ ម៉ឺនដុល្លា បានមកពីការជួយរបស់ មូលនិធិ គីណាល់ តាមរយៈការរួមគ្នាផងដែរ ពីអតីតសិស្ស វិទ្យាល័យជីហែ និងបណ្តាសប្បុរសជននានា ទាំងក្នុង និង ក្រៅប្រទេស។
បន្ទាប់ពីការកសាងបន្ទប់សាលប្រជុំនេះរួចរាល់ ឯកឧត្តម រដ្ឋមន្ត្រី ខៀវ កាញារីទ្ធ និងលោកជំទាវ បានផ្តល់ថវិកាទិញម៉ាស៊ីនត្រជាក់ ដាក់នៅក្នុងបន្ទប់ សាលប្រជុំ និង បណ្ណាល័យ សរុប ៦ គ្រឿង ដោយពេលនេះបានបំពាក់រួចរាល់ ចំនួន ៤ គ្រឿងហើយ។ ដោយឡែកសម្រាប់ បន្ទប់នៃអគារសិក្សានីមួយៗ ឯកឧត្តមខៀវ កាញារីទ្ធ និងលោកជំទាវ បានទិញនូវ កង្ហាចំនួន ១១០ គ្រឿង ដាក់តាមបន្ទប់រៀនរបស់សិស្សផងដែរ។ ទាក់ទងទៅនឹងដំណើរការជួសជុល អគារសិក្សា ឡើងវិញនេះដែរ លោកនាយកវិទ្យាល័យជីហែ បានជម្រាបជូនថា ថវិកាជួសជុលសមិទ្ធផលទាំងនេះ ក៏បានទទួលពី សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ដោយក្នុងនោះបានជួសជុលកែលំអ អគារចំនួន ៤ សរុប ១៨ បន្ទប់ ហើយដំណើរការងារនេះ ក៏បានជិតរួចរាល់ផងដែរ។
នៅក្នុងឱកាសនោះដែរ ឯកឧត្តម រដ្ឋមន្ត្រី ខៀវ កាញារីទ្ធ បានជួបសំណេះ សំណាលជាមួយ លោកគ្រូ អ្នកគ្រូស្មគ្រ័ចិត្ត ចំនួន ២០ នាក់ ដែលត្រូវធ្វើការជួយ បង្រៀនបំប៉នដល់សិស្សក្នុង ស្រុកកោះសូទិន ខេត្តកំពង់ចាម ត្រៀមប្រឡង បាក់ឌុប នាពេលខាងមុខនេះ។
តាមការបញ្ជាក់របស់ថ្នាក់ដឹកនាំការិយាអប់រំស្រុក បានឲ្យដឹងថាសម្រាប់ ឆ្នាំនេះ នៅស្រុកកោះសូទិន មានសិស្សចំនួនជាង ៤០០ នាក់ក្នុងនោះ សម្រាប់ វិទ្យាល័យ ជីហែ មានសិស្សចំនួនជាង ១០០ នាក់ នឹងត្រូវធ្វើការ ប្រឡងបាក់ឌុប ហើយត្រូវបានគ្រូស្មគ្រ័ចិត្ត មកជួយបង្រៀបបន្ថែម ក្នុងនោះមាន នៅវិទ្យាល័យ ជីហែ វិទ្យាល័យមហាលាភ វិទ្យាល័យសៀក និងវិទ្យាល័យ កោះសូទិន ។
សម្រាប់គ្រូបង្រៀនស្មគ្រ័ចិត្តទាំង ២០ នាក់ ក្នុងស្រុកកោះសូទិន នេះ ឯកឧត្តម រដ្ឋមន្ត្រី ខៀវ កាញារីទ្ធ បានផ្តល់ជាថវិកាលើកទឹកចិត្ត ក្នុងម្នាក់ ២០ ម៉ឺនរៀល។ ជាមួយនេះ ជូនវិទ្យាល័យជីហែ ៨០ ម៉ឺនរៀល ទុកសម្រាប់ចាត់ចែង ការងារ ផ្សេងៗ។ ឆ្លៀតក្នុងឱកាសនោះដែរ ឯកឧត្តម រដ្ឋមន្ត្រី បានជម្រុញលើកទឹកចិត្តដល់ ក្មួយៗសិស្សានុសិស្សទាំងអស់ ដែលត្រូវប្រឡងបាក់ឌុប នាពេលខាងមុខនេះ ត្រូវប្រឹងប្រែង ឲ្យអស់ពីសមត្ថភាព ដើម្បីឲ្យបានប្រឡងជាប់ ហើយ សម្រាប់អ្នកដែលជាប់និទ្ទេស A ឯកឧត្តម សន្យាថានឹងទិញ ម៉ូតូ ឲ្យ ១គ្រឿង សម្រាប់ទុកជិះទៅបន្តការសិក្សានៅថ្នាក់ ឧត្តមសិក្សា ទៅមុខទៀត ។
ដោយឡែកនៅព្រឹកថ្ងៃដ៏ដែលនេះដែរ ឯកឧត្តម រដ្ឋមន្ត្រី ខៀវ កាញារីទ្ធ បាន អញ្ជើញទៅពិនិត្យមើលអគារទីចាត់ការ ១ខ្នង សាលាបឋមសិក្សា ប៉ាក់ណាម ស្ថិតក្នុង ឃុំ ពង្រ ស្រុលកោះសូទិន ខេត្តកំពង់ចាម ដែលមានសភាពចាស់ ទ្រុឌទ្រោមទៅ ហើយ។ អគារទីចាត់ការ ១ ខ្នង នេះ ជាអំណោយ របស់ មហាឧបាសិកា ខៀវ ថន និងឧបាសិកា ឡោ លាងហ៊ន ត្រូវជា ឱពុក និងម្តាយ បង្កើត ឯកឧត្តម ខៀវ កាញារីទ្ធ ដោយបានកសាងឡើងតាំងពីឆ្នាំ ១៩៩៥ មកម្ល៉េះ ដែលរហូតមកដល់ពេលនេះ មានសភាព ចាស់ ទ្រុឌទ្រោមទៅហើយ។
ក្នុងឱកាសចុះពិនិត្យផ្ទាល់ ឯកឧត្តម ខៀវ កាញារីទ្ធ បានសម្រេចឲ្យក្រុមការ ងារពិនិត្យ ដើម្បីកសាង អគារថ្មី ១ខ្នង ចំនួន ៥ បន្ទប់ រួមជាមួយ ការកសាង បន្ទប់ទឹក ឲ្យបានស្អាតផងដែរ។ ជាមួយនេះ ឯកឧត្តម ក៏ជួយ ដាក់អំពូល ភ្លើង តាមបន្ទប់ សិក្សា ក្នុងសាលាបឋមសិក្សា ប៉ាក់ណាម នេះផងដែរ។
តមក ឯកឧត្តម រដ្ឋមន្ត្រី ខៀវ កាញារីទ្ធ បានអញ្ជើញទៅពិនិត្យមើល ទីកន្លែង បំពេញការងារ របស់ ថ្នាក់ដឹកនាំ មន្ត្រី ឃុំ មហាលាភ ស្រុលកោះសូទិន ខេត្ត កំពង់ចាម ដែលទើបនិងកសាងហើយរួចរាល់ ។ ក្នុងឱកាសនោះ ឯកឧត្តម បានផ្តាំផ្ញើ ដល់ថ្នាក់ដឹកនាំ និងមន្ត្រី គ្រប់ជាន់ថ្នាក់ ត្រូវបន្តស្មារតីរួមសហការសាមគ្គីគ្នា បំពេញកិច្ចការងារបំរើប្រជាពលរដ្ឋ ឲ្យបានកាន់តែល្អប្រសើរបន្ថែមទៀត។
នៅក្នុងដំណើរចុះពិនិត្យការងារនៅស្រុកកោះសូទិន នោះដែរ ឯកឧត្តម ខៀវ កាញារីទ្ធ បានផ្តល់ចវិកាចំនួន ១០ លាន សម្រាប់ជួយធ្វើច្រាំងទន្លេ ក្នុង ឃុំ កំពង់រាប ផងដែរ៕
សូមជម្រាបថា វិទ្យាល័យជីហែ ស្ថិតក្នុងភូមិផ្សារថ្មី ឃុំពាមប្រធ្នោះ ស្រុកកោះសូទិន ខេត្តកំពង់ចាម ដោយបានកសាងឡើងក្នុង កំឡុងឆ្នាំ ១៩៥៦ ដោយថវិកា អាណាព្យាបាល សិស្ស និងសប្បុរសជន ហើយរួច រាល់ក្នុងឆ្នាំ ១៩៥៧ ក្នុងនោះ មានអាគារ ទីចាត់ការ ១ ខ្នង ២ ជាន់ និងអាគារ សិក្សា ៦ ខ្នង ស្មើ ២៥ បន្ទប់។ វិទ្យាល័យជីហែ ចាប់បើកទ្វារឲ្យបង្រៀន សិស្សក្នុងឆ្នាំ ១៩៥៧ ដែលមាន ឈ្មោះថា អនុ វិទ្យាល័យជីហែ ។ ក្នុងឆ្នាំ ១៩៧០ ដល់ ១៩៧៥ ក្នុង របបសាធា រណរដ្ឋ វិទ្យាល័យជីហែ ត្រូវបិទទា្វរ ដោយយកធ្វើជា ឃ្លាំងសម្ភារះ ។ ក្នុងឆ្នាំ ១៩៧៥ ដល់ ១៩៧៩ ក្នុងរបបកម្ពុជា ប្រជាធិបតេយ្យ វិទ្យាល័យជីហែ ក្លាយជា មន្ទីរពេទ្យស្រុក និងជាមន្ទីរឃុំឃាំង ។ ប៉ន្តែក្រោយថ្ងៃ រំដោះ ៧ មករា ១៩៧៩ ត្រូ បានដំណើរការរៀបចំសាលានេះឡើងវិញ ហើយ នៅឆ្នាំ ១៩៨០ ទើបបើក ដំណើរបង្រៀនរហូតមកដល់បច្ចុប្បន្ន ដែលមានការកសាងអគារសិក្សា រួមជា មួយសមិទ្ធិផលនានាដែលបំរើដល់ការងារអប់រំ ។
អត្តបទនិងរូបភាព៖ក្រសួងព័ត៌មាន
