ប្រជាពលរដ្ឋជាង២៤០០នាក់ មកពី១៤ភូមិ ក្នុងឃុំសសរស្តម្ភ ស្រុកពួក ខេត្តសៀមរាប បានទទួលសេវាពិនិត្យ និងពិគ្រោះជំងឺ ដោយឥតគិតថ្លៃ ពីក្រុមគ្រូពេទ្យស្ម័គ្រចិត្តនៃសមាគមឈុនប៊ូក ប្រទេសកូរ៉េខាងត្បូង ដែលបានរៀបចំឡើងនៅបរិវេណសាលាបឋមសិក្សាសសរស្តម្ភ ស្ថិតក្នុងឃុំសសរស្តម្ភ រយៈពេលពីរថ្ងៃ គិតចាប់ពីថ្ងៃទី១២និងទី១៣ ខែសីហា ឆ្នាំ២០១៩។
ការពិនិត្យ ពិគ្រោះ និងព្យាបាលលើជំងឺទូទៅ ក្នុងឱកាសនោះ មានដូចជាពិនិត្យភ្នែក ពិនិត្យមាត់ធ្មេញ ពិនិត្យរោគស្ត្រី វាស់សម្ពាធឈាម វាស់ចង្វាក់បេះដូង ព្យាបាលដោយចលនាលើជំងឺឈឺចង្កេះ ការព្យាបាលជង្គង់ និងតាមសន្លាក់ ដោយចាក់ម្ជុលវិទ្យាសាស្ត្រ ព្យាបាលដំបៅ ជាដើម។ល។ បន្ថែមពីនេះក្រុមគ្រូពេទ្យ ក៏បានផ្តល់ថ្នាំសង្កូវទៅតាមអាការៈរោគក្រោយការពិនិត្យ ការផ្តល់ជូនវ៉ែនតាក្រោយការវាស់កម្រិតភ្នែក និងផ្តល់អង្ករជូនដល់គ្រួសារក្រីក្រជួបការលំបាក ផងដែរ។
មានប្រសាសន៍ក្នុងឱកាសនោះ លោកពិន ប្រាកដ អភិបាលរងខេត្តសៀមរាប បានសម្ដែងនូវការគាំទ្រចំពោះសកម្មភាព របស់ក្រុមការងារគ្រូពេទ្យស្ម័គ្រចិត្ត នៃសមាគមឈុនប៊ូក ដែលបានចុះពិនិត្យ ពិគ្រោះ និងព្យាបាលជំងឺដោយឥតគិតថ្លៃ ជូនប្រជាពលរដ្ឋទូទៅនៅក្នុងឃុំសសរស្តម្ភ នាពេលនេះ។
លោក គូសបញ្ជាក់ថា សកម្មភាពដែលក្រុមគ្រូពេទ្យស្ម័គ្រចិត្តចុះមកដល់ខេត្តសៀមរាបនេះ គឺជាការងារមនុស្សធម៌ និង ការងារសង្គម ដែលបានចូលរួមជួយលើកកម្ពស់សុខុមាលភាព និងកាត់បន្ថយការចំណាយលើសេវាពិគ្រោះ ពនិត្យ និងព្យាបាលជំងឺជូនប្រជាពលរដ្ឋនៅតាមមូលដ្ឋាន ប៉ុន្តែប្រការសំខាន់ អាជ្ញាធរខេត្តសូមអំពាវនាវដល់បងប្អូនប្រជាពលរដ្ឋទាំងអស់ ត្រូវចេះថែទាំសុខភាពសុខភាពប្រចាំថ្ងៃរបស់ខ្លួន និងត្រូវប្រុងប្រយ័ត្ន ចំពោះការហូបចំណីអាហារ ដោយផ្តោតសំខាន់លើការហូបស្អាត រស់នៅស្អាត ដើម្បីជៀសវាងការមានជំងឺផ្សេងៗ។
មានមតិក្នុងឱកាសនោះដែរ លោកវេជ្ជបណ្ឌិត អាន់ ឈីហ្សក់ ប្រធានដឹកនាំក្រុមគ្រូពេទ្យស្ម័គ្រចិត្ត បានឱ្យដឹងថា៖ នេះជាលើកទី៧ហើយ នៃសកម្មភាពចុះជួយពិនិត្យ ពិគ្រោះ និងព្យាបាលជំងឺដោយឥតគិតថ្លៃ ជូនប្រជាពលរដ្ឋកម្ពុជាជាពិសេសខេត្តសៀមរាប បានរហូតទៅដល់៥លើក និង២លើកនៅរាជធានីភ្នំពេញ។ ក្នុងន័យនេះ វាក៏ជាការរឹតចំណងសាមគ្គីភាពឱ្យកាន់តែស្អិតរមួតប្រសើរឡើងថែមទៀត រវាងព្រះរាជាណាចក្រកម្ពុជានិងសាធារណៈរដ្ឋកូរ៉េ និងដើម្បីសុខុមាលភាពសាធារណៈសម្រាប់ប្រជាពលរដ្ឋកម្ពុជា ជាពិសេសអ្នករស់នៅទីជនបទដែលជួបការលំបាក។
លោកវេជ្ជបណ្ឌិត អាន់ បានថ្លែងអំណរគុណ ដល់ សប្បុរសជននៃប្រជាជនកូរ៉េ និងអ្នកស្ម័គ្រចិត្តដើម្បីជួយសហគមន៍ប្រទេសក្រីក្រ ដែលបានបរិច្ចាគប្រមាណជា១០ម៉ឺនដុល្លារ ក្នុងសកម្មភាពចុះជួយពិនិត្យ ពិគ្រោះ និងព្យាបាលជំងឺដោយឥតគិតថ្លៃ មួយលើកៗ។
ក្នុងនោះដែរ លោកវេជ្ជបណ្ឌិត មានការសោកស្ដាយ ដែលមិនអាច ធ្វើការបក ឬវះកាត់ភ្នែកជូន អ្នកជំងឺស្រវាំងភ្នែកមើលមិនសូវច្បាស់ មានភ្នែកឡើងបាយ និងដុះកន្ទុយថ្លែនបាន ដោយអាចត្រឹមជួយផ្តល់ជូនគាត់ តែការវាស់ភ្នែកនិងជូនវ៉ែនតាតែប៉ុណ្ណោះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
