ក្រុមហ៊ុនទឹកបរិសុទ្ធ វីតាល់ បានចុះហត្ថលេខាលើកិច្ចព្រមព្រៀងឧបត្ថម្ភអង្ករ ចំនួន១០តោនក្នុងមួយឆ្នាំ រយៈពេលបីឆ្នាំជាប់ៗគ្នា ២០១៩-២០២១ ដល់មន្ទីពេទ្យកុមារអង្គរខេត្តសៀមរាប នាព្រឹកថ្ងៃទី១៤ ខែសីហា ឆ្នាំ២០១៩នេះ នៅក្នុងមន្ទីពេទ្យកុមារអង្គរ ក្រុងសៀមរាប។
លោក ជុនហៀង ថាវសិទ្ធិ ប្រធានផ្នែកពាណិជ្ជកម្ម នៃក្រុមហ៊ុនវីតាល់បានបញ្ជាក់ថា វីតាល់ គឺជាក្រុមហ៊ុន ដែលយកចិត្តទុកដាក់លើសកម្មភាពភាពមនុស្សធម៌ ក្នុងនោះមន្ទីពេទ្យកុមារអង្គរ កន្លងមកបានធ្វើការយ៉ាងសកម្ម ក្នុងការជួយសង្គ្រោះជីវិតកុមារកម្ពុជា ដោយមិនគិតថ្លៃ និងនិន្នាការអ្វីទាំងអស់។
លោក ទេព ណាវី នាយកប្រត្តិបត្តិការនៃមន្ទីពេទ្យកុមារអង្គរខេត្តសៀមរាប បានស្ញើចសរសើរដល់ក្រុមហ៊ុន វីតាល់ដែលជាក្រុមហ៊ុនជាតិគំរូ ផ្តោតសំខាន់ និងតែងតែយកចិត្តទុកដាក់ដល់កម្មវិធីមនុស្សធម៌ ជាពិសេសគឺការផ្តល់ជំនួយជំរុញដល់ការអភិវឌ្ឍប្រទេសកម្ពុជា។ សកម្មភាពសប្បុរសធម៌ទាំងនេះ បាននឹងកំពុងជួយលើកទឹកចិត្តដល់មន្ទីពេទ្យនិងក្រុមការងារ ឲ្យកាន់តែមានទឹកចិត្តបម្រើសេវាកម្មពិនិត្យ ពិគ្រោះ និងព្យាបាលជំងឺដោយមិនគិតថ្លៃ ប្រកបដោយប្រសិទ្ទភាពខ្ពស់ជូនដល់កុមារកម្ពុជា។
ថវិការជិត១ម៉ឺនដុល្លារទទួលបានមកពីគម្រោង «អ្នកជាវីរបុរស» ដែលបានបិទបញ្ចប់កាលពីខែឧសភា ឆ្នាំ២០១៩កន្លងទៅ។ ជាងនេះទៅទៀតវីតាល់ក៏បានបន្តគាំទ្រក្នុងការចុះកិច្ចព្រមព្រៀងឧបត្ថម្ភជាអង្ករ ១០តោនក្នុងមួយឆ្នាំរយៈពេលរហូតដល់ទៅ៣ឆ្នាំ ចាប់ផ្តើមពីឆ្នាំ២០១៩នេះដល់ឆ្នាំ២០២១។
សូមរំលឹកថា ក្រុមហ៊ុន វីតាល់ ធ្លាប់បានឧបត្ថម្ភអង្ករ ៣០តោន ក្នុងរយៈ៣ឆ្នាំជាប់ៗគ្នាម្ដងរួចមកហើយកាលពីឆ្នាំ២០១៦។ លើសពីនេះ ថវិកាជិត ១ម៉ឺនដុល្លារទទួលបានពីគម្រោង «អ្នកជាវីរបុរស» ដែលបានបិទបញ្ចប់កាលពីខែឧសភា ឆ្នាំ២០១៩កន្លងទៅ និងមូលនិធិ២៥៛ របស់វីតាល់ ក៏នឹងបម្រើដល់សកម្មភាពមនុស្សធម៌ និងកិច្ចការសង្គម ក្នុងប្រទេសកម្ពុជាផងដែរ។
អត្ថបទ និង រូបថត ៖ លោក យូ វង្ស, លោក ទ្រា ពន្លឺុ, លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
