ដោយបានការយកចិត្តទុកដាក់ខ្ពស់ពីសំណាក់គណៈអភិបាលខេត្តសៀមរាប កាលពីព្រឹកថ្ងៃទី១២ ខែសីហា ឆ្នាំ២០១៩ ម្សិលមិញនេះ ក្រុមគ្រូពេទ្យស្ម័គ្រចិត្តជនជាតិកូរ៉េ បានចាប់ផ្តើមដំណើរការព្យាបាលេជំងឺជូនសិស្សានុសិស្ស និងប្រជាពលរដ្ឋ ទូទាំងឃុំសសរស្ដម្ភ និងឃុំដែលនៅជិតៗគ្នា ដោយឥតគិតថ្លៃ នៅសាលាបឋមសិក្សាសសរស្ដម្ភ ឃុំសសរស្ដម្ភ ស្រុកពួក ខេត្តសៀមរាប។
ក្នុងកម្មវិធីនោះដែរ ក៏មានការអញ្ជើញចូលរួម ក្រោមអធិបតីភាព លោក លី សំរិទ្ធ និងលោក ពិន ប្រាកដ អភិបាលរង នៃគណៈអភិបាលខេត្តសៀមរាប លោកនាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ ដោយមានការចូលរួមពី តំណាងអជ្ញាធរស្រុកពួក លោកមេឃុំ សសរស្តម្ភ តំណាងមន្ទីរសុខាភិបាលខេត្តសៀមរាប បុគ្គលិកមន្ទីរពេទ្យពួក និងមណ្ឌលសុខភាព និងមានការចូលរួមពីសិស្សានុសិស្ស និងបងប្អូនប្រជាពលរដ្ឋមួយចំនួន ។
ជាលទ្ធផលនៃការព្យាបាលក្នុងថ្ងៃទីមួយទាំងសិស្សានុសិស្ស និងបងប្អូនប្រជាពលរដ្ឋ សម្រេចបានចំនួន ៧៦៥នាក់ ព្រមជាមួយនោះក្រុមការងារក៏បានចែកជូននូវអង្ករដល់សិស្ស និងគ្រួសារក្រីក្រផងដែរ ។
ក្នុងនោះដែរបងប្អូនប្រជាពលរដ្ឋក៏បានសូមគោរពថ្លែងអំណរគុណដ៏ជ្រាលជ្រៅចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្ត ក្រុមការងារខេត្ត និងក្រុមគ្រូពេទ្យស្មគ្រ័ចិត្តកូរ៉េ និងអ្នកពាក់ពន្ធ័ទាំងអស់ក្នុងការជម្រុញអោយសកម្មភាពមនុស្សធម៌នេះឡើង ។
សូមបញ្ជាក់ផងដែរថា ដំណើរការព្យាបាលជំងឺជូនសិស្សានុសិស្ស និងប្រជាពលរដ្ឋ ដោយឥតគិតថ្លៃនេះមានរយៈពេល ០២ថ្ងៃ គឺនៅថ្ងៃទី១២ ដល់ ថ្ងៃទី១៣ ខែសីហា ឆ្នាំ២០១៩ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល ៖ អ៊ុន ណារាជ្យ
